రామ్మోహన్: 

శక్తిపూర్ణమైన జ్ఞానం

జ్ఞానపూర్ణమైన శక్తి

దానికదే సంభవిస్తుందా ?

లేక మన ప్రయత్నమేమైన ఉన్నదా?

జ్ఞానశిశువు: 

ప్రయత్నిస్తే లభించేది ఉత్తజ్ఞానం(పాండిత్యం) 

లేదా ఉత్తశక్తి(సిద్ధులు).

వీటివల్ల పారమార్థిక ప్రయోజనం సున్న.

శక్తి సహిత జ్ఞానం, జ్ఞానసహిత శక్తి

అప్రయత్నంగానే లభిస్తుంది.

* * *

ప్రయత్నంతో పొందినవాడు 

'స్థితి' నుండి  జారే అవకాశం ఉంది.

ఉదా.విశ్వామిత్రుడు.

అప్రయత్నంగా పొందినవాడు 

'స్థితి' నుండి  జారడు.

ఉదా.రమణుడు.

ఇదే ప్రయత్న-అప్రయత్నానికి తేడా.

* * *

జ్ఞానంతో  కూడిన శక్తి

శక్తితో కూడిన జ్ఞానం

ఇవి ఫలప్రదములు.

ఉత్త శక్తి, ఉత్త జ్ఞానం

వీటివల్ల ప్రయోజనం లేదు.

* * *

రమణుడు పైకి జ్ఞాని.

లోపల శక్తుడు.

బాబా పైకి శక్తుడు.

లోపల జ్ఞాని.

అప్పాజీ: విశ్వము ఎలా, ఎవరు, ఎందుకు సృష్టించారు...?

జ్ఞానశిశువు: నీ మెలకువతో పాటు నీతో సహా సకలసృష్టి నీలోనుంచే పుట్టింది.

తిరిగి నీవు నిద్రపోయాక నీతో సహా సకలసృష్టీ నీలోనే లయం అయిపోతుంది.

అప్పాజీ: ఎవరి కోరిక విశ్వసృష్టి?

కోరిక ఎందుకు పుట్టింది?

జ్ఞానశిశువు: నిద్రలోఈ ప్రశ్నలేవీ ఉండవు. మెలకువలో సమాధానం ఉండదు.

గణేష్: 

ఎఱుక - మఱపు గురించి చెప్పండీ....

జ్ఞానశిశువు: 

నిద్రలో -  నేనున్నాననే ఎఱుక మోక్షం.

మెలకువలో - నేనున్నాననే మఱపు మోక్షం.

ప్రశ్న: ఆధ్యాత్మికలక్ష్యం ఏమి?

జ్ఞానశిశువు: నీ నామం-రూపం ప్రపంచంలో ఉన్నంతకాలం

అనగా నామరూపాలు నీకు తోస్తున్నంతకాలం

నీతో సహా యెవడూ ముక్తి పొందనట్లే.

* * *

దేహాత్మభావంతో ముక్తి పొందాలనుకోవడం

మసిగుడ్డతో అద్దాన్ని శుభ్రం చేయాలనుకోవడమే.

* * *

కల నుండి మేలుకున్నాక

కలలో ఉన్నవారందరూ మాయమై

నీవొక్కడివే మిగిలినట్టు

* * *

నీవొక్కడు ముక్తి పొందితే 

'అందరూ' అనే భావం పోయి 

ఏకాత్మరూపుడువైన నీవొక్కడివే 

మిగులుతావు. 

* * *

'ఒక్కడు' లేదా 'ఒక్కటి' మిగలడమే

ఆధ్యాత్మిక ఏకైక లక్ష్యం.

రామ్మోహన్: మన గాఢ సంకల్పం యెక్క ఫలితమే  "భగవదిచ్ఛ" అన్నారు...వివరించండి.

జ్ఞానశిశువు: అవును... మనం బ్యాంకులో అప్పుడప్పుడు  పొదుపుచేసిన ఒక్కొక్క రూపాయి చివరకు 'పెద్దమొత్తం'గా డ్రా చేసుకున్నట్లు మనం చేసే ప్రతి సంకల్పం, లేదా ప్రతి కర్మ పెద్దమొత్తంగా మనకు తిరుగుటపాలో రావడమే ప్రారబ్ధం, విధి, లేదా భగవదిచ్ఛ.

* * *

కర్తృత్వంతో చేసే ప్రతి కర్మా "ప్రారబ్ధం" పేరుతో ప్రతిఫలిస్తుంది.

అకర్తగా ఉండి చేసే ప్రతికర్మా "దైవానుగ్రహం"గా ప్రతిఫలిస్తుంది. 

* * *

"విధి"ని - భగవదిచ్ఛ అని అనుభవిస్తావో.... లేక పురుష ప్రయత్నంతో ఎదిరిస్తావో... నీ ఇష్టం.

పట్టెయ్య: మాయా దర్పణం అంటే ఏమి?

జ్ఞానశిశువు: మామూలు దర్పణంలో-

బింబం - అద్దానికి వెలుపల ఉంటుంది.

ప్రతిబింబం - అద్దంలో ఉంటుంది.

మాయాదర్పణంలో-

బింబము(దేవుడు), ప్రతిబింబము(జీవుడు) 

రెండూ అద్దంలోనే ఉంటాయి.