🪷అభేదాన్ని దర్శించడమే పరమం🪷 చిన్న కలకు ఆధారం- జడమైన గాఢనిద్ర.
పెద్ద కలకు ఆధారం - గాఢమైన అజ్ఞానం.
* * *
కల లేని నిద్ర,
ఇల లేని నిద్ర
రెండూ ఒకటి కావు.
గురువుగారుచెప్పే గాఢనిద్ర, ఇల లేని నిద్ర.
అనగా అభేదస్థితి... అదే తురీయము.
ఏమీ తెలియకపోవడమే "పరమం" అయితే,
కోమాలో ఉండే ప్రతి ఒక్కణ్ణీ ఋషి అనవలసి వస్తుంది.
* * *
ఈ ద్వైత ప్రపంచంలో ఉంటూనే అభేదాన్ని దర్శించడమే పరమం.
అదే తురీయం.
ఆ స్థితి ఎలా వస్తుంది? అంటే,
"నిరంతర గురుసాంగత్యం" ఒక్కదానివల్ల మాత్రమే వస్తుంది.
ఇక రెండవ మార్గం లేనేలేదు.
అని చెప్పడమే నేను వ్రాసిన "నా గురువు" వ్యాసములయొక్క ప్రధానోద్దేశము.
* * *
"మరి మా పనీపాటలు వదిలేసి
ఎల్లకాలమూ గురుసాంగత్యం చేయడం ఎలా?
మా నిత్యవ్యవహారానికీ భంగమే,
వారి నిత్యవ్యవహారానికీ భంగమే కదా?" అని అంటారేమో...
అలా కాదు...
మీరు నిత్యవ్యవహారంలో ఉంటూనే, "ఇది ఒక కల"
అనే వారి ప్రధాన బోధను సదా జ్ఞప్తిలో ఉంచుకోవడం కూడా
సదా సద్గురు సాంగత్యంలో ఉండడమే అవుతుంది.
* * *
తెలియటం తెలియకపోవటం అవుతుంది.
తెలియకపోవటం తెలియటం అవుతుంది.
జాగ్రదవస్థలో తెలిసినతనం కూడా తెలియనితనమే.
గాఢనిద్రలో తెలియనితనం కూడా తెలిసినతనమే.
* * *
గురువుగారు ప్రసాద్ వైపు తిరిగి-
నేను అంటే ప్రసాద్ అని తెలుస్తోందిప్పుడు...
నేను అంటే ఏమీ తెలియనప్పుడు...
నీకు తెలియవలసింది తెలిసినట్టు...
అన్నారు.
* * *
బాబుతో కలిసి నీవు మాట్లాడితే అది సమావేశం.
నిజానికి నీవు ప్రసాద్ తో ఉండటమే సమావేశం...
అన్నారు ప్రసాద్ తో.
* * *
నిజానికి ప్రసాద్ కుటుంబ సమస్యనొకదానిని గురువు దగ్గర ప్రస్తావించాలని వచ్చాడు ఈరోజు....
ప్రసాద్ అడగకనే పరిష్కారం దొరికినట్లైంది...
మొత్తానికి ప్రసాద్ సమస్యకు ఇదే పరిష్కారమన్నమాట....
అన్నాడు ప్రసాదు.
అసలు సమస్యే లేదు....పరిష్కారం ఎక్కణ్ణుంచి వచ్చింది?
అన్నారు గురువుగారు.
కాసేపాగి, ప్రసాదుకు సమస్య కాదు, "ప్రసాదే సమస్య" అన్నారు.
* * *
తెలిసి మాట్లాడినా తెలియక మాట్లాడినా తెలిసినట్టే.
అన్నారు గురువుగారు.
అంటే, తెలుసు అనటానికి, తెలియదు అనటానికి
రెంటికీ "తెలివి" ఆధారంగా ఉంది కాబట్టా? అన్నాడు బాబు...
"అవును" అన్నారు గురువుగారు.
భగవాన్ సూక్తిని ఉదహరించాడు బాబు...
"ఉండటమే నీ స్వరూపం.
అట్లుండుట, ఇట్లుండుట కాదు."
గురువుగారు నవ్వుతూ-
ఆ మాట కూడా అనకుండా "ఉంటటం" మంచిది...అన్నారు.
* * *
గురుసన్నిధి నుండి మా షాప్ కు రాగానే బెంగుళూరు రవి వాట్సప్ లో ఓ ప్రశ్న పంపాడు...
రవి: కలను కనేవాడు కలలో ఉన్నవాడా? లేక నిద్రపోయి కల కనేవాడా?
బాబు: ఈ మొత్తాన్ని కలగా కలిగి ఉన్నవాడే(భగవంతుడే).
కలలోని తాను- రెండవ తాను.
కలను కనే తాను- మొదటి తాను.
ఈ రెండు తానులను కనేవాడు - అసలు తాను.
ఈ "తాను" కే దైవం అని పేరు.
మన కలకు "కల" అని పేరు.
దేవుని కలకు "ఇల" అని పేరు.
మన కలకు, దేవుని కలకు తేడా ఏమంటే-
కల అని తెలియక కనే కల మనది.
కల అని తెలిసి కనే కల దేవునిది.
ఇది కల అని మరచి నిజమని ఉంటాం.
ఇది కల అని తెలిసి ఉంటే మనమే దైవం.
* * *
జ్ఞానశిశువు
No comments:
Post a Comment