****పెళ్ళి అంటే

 (143) (10.01.2025)

పెళ్ళి అంటే (1)

 

పెళ్ళి చూపులతో మొదలవుతుంది

అప్పగింతలతో ముగుస్తుంది

మధ్యలో ఎన్నో మలుపులు

ఆపై  ఎన్నో కన్నీటి చుక్కలు //

 

పెళ్ళి చూపులు(2)

 

మంచి అబ్బాయి / అమ్మాయిని వెతుక్కుని

జాతకాలు చూపించుకుని

మంచి రోజు చూచుకుని

ఆపై  అటు  వైపు వారిని ఆహ్వానించుకుని //

అమ్మాయి ఇంట  అబ్బాయికి చూపులు

అవే  ఇద్దరికి తొలి చూపులు

ఇంట  పెద్దలకి నచ్చాలి

జంట ఒకరిని ఒకరు మెచ్చాలి

కాబోయే వధూవరులు మాట్లాడుకున్నాక

ఆపై  ఇద్దరు అంగీకారం తెలిపినాక //

మంచి రోజు చూచుకుని పెట్టుబడి  మాటలు

ఆపై  పెళ్ళిలో జరపాల్సిన ఆచార వ్యవహారాలు

ఇరువురి పెద్దలను కూర్చోబెట్టి

ఇచ్చి పుచ్చుకోవాల్సిన లిస్ట్ రాసి పెట్టి

ఎంగేజ్ మెంట్ కి  మంచి రోజు నిర్ణయిస్తారు

అప్పటికి ఎవరి ఇళ్లకు వాళ్ళు చేరుకుంటారు //

 

ఎంగేజ్ మెంట్(3)

 

పెళ్ళి ముహూర్తం నిర్ణయించుకుని

ఇద్దరు పెద్దలు ఓ మాట  అనుకుని

బంధుమిత్రులకు శుభవార్త చెప్పుకుని

ఆపై  అందరిని ఆహ్వానించుకుని //

అంగ  రంగ  వైభవంగా

దగ్గరి బంధువులు వేంచేయగా

పురోహితుని సమక్షంలో

పెద్దల పర్యవేక్షణలో

అటు-ఇటు  తాంబూలాలు పుచ్చుకుంటారు

ఆపై  కాబోయే వధూవరులు ఉంగరాలు మార్చుకుంటారు //

వచ్చిన బంధువుల  శుభాకాంక్షలు

ఆపై ఫొటోలకు వివిధ భంగిమలలో ఫోజులు

ఫొటోలకు అంతే ఉండదు

బిల్ చూస్తే కళ్ళు తిరగకుండా ఉండదు //

ఎక్కడలేని ఫోజులు అన్ని  అక్కడే చూస్తాము

కొన్నికొన్ని చూడలేక కళ్ళు మూసుకుంటాము

పెద్ద వాళ్ళ మూతి ముడుపులు

వయసు వాళ్ళ కేరింతలు

మొత్తానికి ఫొటో సెషన్ మమ  అని  అనిపిస్తారు

ఆపై  విందు మొదలు పెడతారు //

బంధువులను పేరు పేరునా పలకరించి

అందరిని భోజనాలకు ఆహ్వానించి

ముందుగా మగ  పెళ్ళి వారికి గౌరవం ఇవ్వాలి

ఆపై  అమ్మాయి తరుపు బంధువులను పిలవాలి //

సాయంత్రం  వరకు  ఇరువురు  కబుర్లు చెప్పుకుని 

ఆపై  ఒకరి  కొకరు  వెళ్ళి  వస్తాము  అనుకుని 

ఎవరి  ఇళ్లకు  వాళ్ళు  చేరుతారు 

ఆపై  వచ్చిన  బంధువులను  సాగనంపుతారు  //

 

ఫొటో  సెషన్(4)

 

ఫొటో  గ్రాఫర్  ని  మాట్లాడుకుని 

వాడికి  కొంత ఎడ్వాన్స్  ఇచ్చుకుని 

వాడు  చెప్పిన  చోటుకి  వెళ్ళాలి

వాడు  చెప్పిన  ఫోజులు  పెట్టాలి  //

ఎక్కడ లేని ప్రేమంతా అక్కడే ఒలకపోస్తూ

వివిధ భంగిమల్లో ఫోజులు ఇస్తూ

వాటిల్లో కొన్ని చూడలేము

వాటిని ఇతరులకు వివరించలేము  //

ఫొటోల కోసం రకరకాల దుస్తులు

కొండలు-గుట్టల్లో వెరైటీ ఫోజులు

ఫొటోగ్రాఫర్ కి  లక్షల్లో ఆదాయము

ఫొటోలు చూడటానికి మనకుండదు సమయము //

స్వదేశం నుంచి విదేశం వరకు ప్రయాణము

వధూవరుల రాకకై ఇంట్లో ఎదురు చూడటము

నాలుగు రోజులు ఈ తంతు ఉంటుంది

వధూవరులు అలిసినాక తంతు ముగుస్తుంది //

 

పెండ్లి పిలుపులు (5)

 

మంచి రోజు చూచి పెళ్ళి పత్రికలు అచ్చు వేయించి

వాటికి పసుపు-గంధం అద్దించి

తొలి పత్రిక దేవునికి అందిస్తారు

ఆపై పిలుపులకు బయలు దేరుతారు //

ఊళ్ళో వాళ్ళకి స్వయంగా పిలుపులు

ఊరి వాళ్ళకు పోస్టులో పంపకాలు

చరవాణిలో సమాచారం పంపించి

తప్పకండా రావాలని పేరు పేరునా తెలియపరిచి //

హితులు-స్నేహితుల నందరిని పెళ్ళికి ఆహ్వానిస్తారు

ఎవరి పేరైనా మరిచినామా అని గుర్తు చేసుకుంటారు

అక్కడితో పిలుపుల తంతు ముగుస్తుంది

ఆపై ఓ చిన్న భారం ముగుస్తుంది //

మెహందీ (6)

 

చేతులకు గోరింటాకు పేరుతో అంతా గుమిగూడి

మెహందీ పెట్టే వానికి అదొక రాబడి

చిన్నా-పెద్దా అన్న బేధం ఉండదు

ఎవరూ మెహందీ వద్దనేది లేదు //

పెళ్ళి కూతురు మొదలు పండు ముదసలి దాకా

చిన్న వాళ్ళ నుంచి పెద్ద వాళ్ళ దాకా

అందరూ గోరింటాకు పెట్టించుకునే వారే

ఆపై  ఇంట్లో మగవాళ్ళకి పని  చెప్పే వారే //

గోరుముద్దలు తినిపిస్తూ

మంచినీళ్ళు అందిస్తూ

శ్రీవారు శ్రీమతికి సేవ  చేయాలి

ఆపై  వాళ్ళ చుట్టూ తిరుగుతుండాలి //

బట్టలకు అంటుకోకుండా

పక్క వాళ్ళకు అంటించకుండా

ఎర్రగా పండేలా చూచుకోవాలి

పెళ్ళైన వాళ్ళు భర్త ప్రేమ తెలుసుకోవాలి //

 

సంగీత్(7)

 

గాన  గంధర్వులంతా ఒక  చోట  చేరి

స్వరాల కోసం కత్తులు నూరి

తమ  గొంతులకు పని  చెపుతారు

కొందరు తమ  నాట్య కౌశలాన్ని చూపుతారు //

కొత్త-పాత  పాటల కలయిక

పెద్ద-చిన్న అంతా అచటికి చేరుకోగ

చెవులు పోయేలా శబ్దాలు

గాడిదలు పారిపోయేలా పాడటాలు //

ఈ పాటలను మెచ్చి వన్స్ మోర్ అంటే

ఆహా  ఏమి  గొంతు అని  పొగుడుతుంటే

పెద్ద గాయకుల్లా ఓ ఫోజ్ పెట్టి

దానికి మళ్ళి ఓ నాట్య భంగిమ పెట్టి

కమల్ హాసన్ లా  ఫీలింగ్

చూడలేక జనాలకు బోరింగ్

మొత్తానికి సంగీత్ అయిందని పిస్తారు

ఆపై  వచ్చిన వారి  ప్రాణాలు కాపాడుతారు  //

 

పెళ్ళి (8)

 

పెళ్ళి రోజు రానే వచ్చింది

బంధుమిత్రులతో మండపం వెలిగిపోతుంది

మగ  పెళ్ళి వారిని మేళ తాళాలతో ఆహ్వనించి

వారికి కేటాయించిన విడిది చూపించి

వారి అవసరాలు చూడటానికి ఓ వ్యక్తిని కేటాయిస్తే

చేయవలసిన పనులు అతనికి పురమాయిస్తే

ఆడపెళ్ళి వారు ఊపిరి తీసుకోవచ్చు

ఆపై  వాళ్ళ పనులు హాయిగా చేసుకోవచ్చు // 

ముందుగా ఫలహారాలు అంది చేసి

కాఫీ-టీ  రూముల్లో పెట్టించేసి

వడ్డనకు ఓ మనిషిని పురమాయించేసి

లోటు పాట్లు రాకుండా చూచుకోమని చెప్పేసి //

అచట  నుండి ఆడపెళ్ళి వారు తప్పుకుంటె

మధ్య మధ్యలో ఏమైనా కావాలి అని  అడుగుతుంటె

మగ పెళ్ళి వారి ముఖంలో ఆనందం వెలుగుతుంది

ఆడ  పెళ్ళి వారికి టెన్షన్ తగ్గుతుంది //

ఉదయం జరగాల్సిన కార్యక్రమాలు కానించేసి

ఆపై  మేళతాళాలతో పెళ్ళి వారిని భోజనానికి ఆహ్వానించేసి

షడ్రసోపేత భోజనాలు వడ్డించి

పేరు పేరునా అందరిని పలకరించి

అందరి భోజనాలు అయిందని అనిపించాలి

అపుడే ఆడ  పెళ్ళి వారు ఊపిరి తీసుకోవాలి //

ఎదుర్కోలు(9)

 

ఇదొక సరదా ప్రహసనము

ముఖ్య బంధువుల పరిచయము

ముఖ్యులను ఆసనాలలో కూర్చో పెట్టి

మధ్యలో పురోహితుని నిలబెట్టి

మగ  పెళ్ళి వారిని గంధం – సెంటుతో ఆహ్వానించి

వారికి చేయాల్సిన మర్యాదలు చేసి

లగ్న పత్రిక చదవగానే

వారికి పెట్టాల్సిన బట్టలు పెట్టగానే

ఆనందంతో పానకం తాగిస్తారు

మిగతా వారికి పళ్ళ రసం  అందిస్తారు //

ఇలాగే ఆడ పెళ్లి వారికి తంతు జరిపించేసి

సాయంకాలపు అల్పాహారం అందిం చేసి

మమ  అని  అనిపించాలి

ఆపై  తరువాతి కార్యక్రమానికి తయారు కావాలి //

 

రిసెప్షన్(10)

 

బంధుమిత్రులంతా కల్యాణ మండపానికి చేరుకోగా

ఆడ  పెళ్ళి వారు ఒక్కొక్కరిని ఆహ్వానించగా

కూర్చోవడానికి ఆసనాలు చూపించి

తాగడానికి పళ్ల రసాలు అందించి

ఓ చిరునవ్వు పారేస్తే

వచ్చిన వారు ఆనందంగా స్వీకరిస్తే 

ఓ పని  అయిపోతుంది

ఆపై  మరొకరిని ఆహ్వానించే ఛాన్సు వస్తుంది //

వధూవరులు స్టేజి పైకి చేరుకోగానే

ఫొటోగ్రాఫర్లు ఫొటోలకు పని  చెప్పగానే

ఒక్కొక్కరు పైకి చేరుకోవడం

ఆపై  వారితో ఫొటో తీసుకోవడం //

ఈ తంతు   ఓ రెండు గంటలు

ఆపై  జనాల కడుపులో పరుగెడతాయి ఎలకలు  

ఈ లోపు భోజనాలకై పిలుపులు

నోట్లో వేసుకుంటారు రెండు మెతుకులు //

ఇక  మిగిలేది ముఖ్య బంధువులు

వారంతా ఇస్తారు ఫొటోలకి ఫోజులు

గబగబా భోజనాలు కానివ్వాలి

ఆపై  పెళ్ళికి తయారు కావాలి //

 

ముహూర్తం (11)

 

ఎదురెదురుగా కాబోయే వధూవరులను కూర్చోబెట్టి

మధ్య తెరసెల్ల అడ్డుపెట్టి

వివాహా తంతు మొదలు పెడతారు

ముహూర్తం వేళకి జీలకర్ర-బెల్లం పెట్టిస్తారు //

బంధుమిత్రులంతా వారిని దీవించి

తీసుకొచ్చిన బహుమతులు అందించి

ముఖ్యులు మాత్రమే మిగులుతారు

మిగిలిన వాళ్ళు ఇళ్ళకు చేరుతారు //

మిగతా కార్యక్రమాలు జరిపించేసి

వధూవరుల చేత  మమ  అని  అనిపించేసి

ఇక  అప్పగింతలకు రెడీ అవమంటారు

కొద్ది వ్యవధిలో అప్పగింతలు ఆరంభిస్తారు //

 

అప్పగింతలు(12)

 

ఎంత  కాదను కున్నా కంటిలో చుక్కలు

కారకుండునా ఒకటి-రెండు నీటి బొట్టులు

ఇన్నాళ్ళు అపురూపంగా పెరిగింది

ఇక  మెట్టినింటికి వెళుతోంది //

పెంచిన మమకారం గుర్తుకు రాగా

కన్న వారిని విడిచి రావాల్సిన సమయం అవగా

బాధతో అడుగులో అడుగు వెసుకుంటూ

ఒక్కొక్కరిని పలకరించుకుంటూ //

ఆడపిల్ల ఆడ పిల్లే అవుతుంది

బాధా తప్త హృదయంతో మెట్టినిల్లు చేరుతుంది

అచట  అంతా కొత్త వారు

ఎవరూ పరిచయం లేని వారు  //

 

గృహప్రవేశం(13)

అత్త వారింట అడుగు పెట్టి

దేవుని ముందు దీపం పెట్టి

స్టౌ మీద  పాల  గిన్నె పెట్టి

అందరి చేతిలో కలిపిన కాఫీ పెట్టి //

కొత్త కోడలు మార్కులు కొట్టేస్తుంది

కొత్తల్లో మంచి కొడలు అని అనిపించుకుంటుంది

సత్యనారాయణ వ్రతం కానించేసి

బంధుమిత్రులకు వీడ్కోలు చెప్పేసి

మరల  పుట్టినింటికి చేరుతుంది

ఆపై  పున:సంధానానికి రెడీ అవుతుంది //

 

పున:సంధానం(14)

 

ఓ మంచి రోజు చూచి

పంతులుతో ముహూర్తం పెట్టించేసి

దంపతులిద్దరిని గదిలోనికి పంపుతారు

మిగిలిన వారు నిదురకు ఉపక్రమిస్తారు //

మూడు రోజుల తంతు

ముచ్చటైన తంతు

జీవితంలో మరిచిపోలేని తంతు

జీవితాంతం గుర్తు పెట్టుకునే తంతు //

కొత్త దంపతులు ఎదురు చూచే తంతు

పేరు చెప్పగానే బుగ్గలు కందే తంతు

పిల్లలకు జవాబు చెప్పలేని తంతు

అనుభవజ్ఞులు గుర్తు చేసుకునే తంతు //

 

హానిమూన్(15)

ఇద్దరి మధ్య బంధం పెరగడానికి

ఇద్దరి మధ్య అవగాహాన కలగడానికి

ఒకరి గురించి ఇంకొకరు తెలుసుకోవడానికి

ఇద్దరి మధ్య ప్రేమ కలగడానికి //

హానీమూన్ పేరుతో వేరొకచోటికి వెళతారు

అక్కడ ఏకాంతంగా కొద్ది రోజులు గడుపుతారు

కొత్త కొత్త ప్రదేశాలు చూస్తూ

నచ్చినవి జంటగా ఫొటోలు తీస్తూ

జీవితాన్ని ఎంతో ఆనందంగా గడుపుతారు

ఆపై  ఇంటికి చేరుతారు //

 

కొత్త కాపురం (16)

 

మంచి రోజు చూచి కాపురం పెట్టిస్తారు

మధ్య మధ్యలో పుట్టింటి-మెట్టింటి వాళ్ళు వచ్చి వెళుతుంటారు

అపుడపుడు కలతలు – కన్నీళ్ళు తప్పవు

ఒకరి గురించి ఒకరు తెలుసుకోక తప్పవు //

వచ్చి రాని వంటతో చేతులు కాల్చుకుంటూ

అపుడపుడు బయట  నించి తెచ్చుకుంటూ

కాలక్షేపం చేస్తారు

జీవితాన్ని ఆనందంగా గడిపేస్తారు //

కాపురంలో ఒక్కొక్క వస్తువు సమకూర్చుకుంటూ

స్వంత ఇంటికై ప్రయత్నాలు చేసుకుంటూ

కొత్త కాపురంలో కష్టాలు పడుతుంటారు

అనుభవాలు పంచుకుంటారు //

ఇంతలో ఇంట్లో వాళ్ళ నుంచి ఒకటే పోరు

మనవడు-మనవరాలు కావాలంటూ చెవిలో  హోరు

ఇపుడే వద్దు అని  అనుకున్నామంటూ

ఇంకా జీవితంలో స్ధిర పడలెదంటూ

డొంక తిరుగుడు సమాధానం చెపుతారు

కొన్నాళ్ళు ప్రయత్నానికి గండి కొడతారు //

 

గర్భవతి(17)

 

దంపతు లిద్దరూ కూడబల్కొని

కన్న వాళ్ళకి శుభవార్త అని 

త్వరలో మీ  కోరిక నెరవేరబోతోందని

మేము తల్లిదండ్రులం అవుతున్నామని

శుభవార్త చెవిలో చెబుతారు

పెద్దల  మోములో ఆనందం చవిచూస్తారు //

పెద్ద వాళ్ళ ఆనందాన్ని వర్ణించలేము

ఇక  వారిని ఆపలేము

ఎన్నాళ్ళ నుంచో ఎదురు చూస్తే

ఈ రోజే ఆ వార్త చెవిన వేస్తే //

ఈ విషయాన్ని నలుగురికి చెప్పుకుని

ఒకరినొకరు తీపి తినిపించుకుని

ఈ వయసులో ఎంతో ఆనందిస్తారు

వారిలో వారే అభినందనలు చెప్పుకుంటారు //

పుట్టబోయే బిడ్డను తలుచుకుంటూ

బిడ్డకు ఎవరి పేరు పెట్టాలా అని తర్జన భర్జనలు పడుకుంటూ

రోజులు గడిపేస్తారు

పేరు మటుకు నిర్ణయించకుంటారు //

 

శ్రీమంతం (18)

 

ఓ మంచి రోజు చూచుకుని

అమ్మాయిని ఇంటికి తెచ్చుకుని

నలుగురు బంధువులను పిలుచుకుని

శ్రీమంతం అనే  పండుగ జరుపుకుని

పండంటి బిడ్డకై ఎదురు చూస్తారు

పండంటి బిడ్డ పుట్టగానే ఎంతో మురుస్తారు //

 

నామకరణం (19)

 

ఆచారాలను బట్టి ఓపిక వచ్చినాక

ఏమి  పేరు పెట్టాలో నిర్ణయించుకున్నాక

బంధుమిత్రులను పిలుచుకుని

బారసాల పేరుతో ఓ వేడుక చేసుకుని

అందరూ నచ్చిన – మెచ్చిన పేరు పెడతారు

పుట్టిన బిడ్డను ఎంతో అపురూపంగా పెంచుతారు //

 

చదువు & పెళ్ళి (20)

 

4 సంవత్సరాలు రాగానే బడిలో చేర్పించి

వానికి విద్యా బుద్ధులు నేర్పించి

వాడిని ప్రయోజకుడిని చేస్తారు

వాని కొలువు చూచి ఎంతగానో మురుస్తారు //

వయసు  మీద  పడుతుంటె

బాధ్యతలు పెరుగుతుంటె

కడుపున పుట్టిన బిడ్డకి వివాహాం జరిపిస్తారు

ఆపై  కృష్ణా రామ మంత్రం  జపిస్తారు //

 

 మధిర వెంకట రమణ, హైదరాబాద్