*కస్తూరి తిలకం లలాటఫలకే*

*వక్షస్థలే కౌస్తుభం నాసాగ్రేనవమౌక్తికం*

*కరతలేవేణుం కరేకంకణం*

*సర్వాంగేహరిచందనం కంఠేచముక్తావళీ*

*గోపసస్త్రీ పరివేష్ఠితం విజయతే* 

*గోపాల చూడామణీ !!*

*వసుదేవ సుతం దేవం - కంస చాణూర మర్దనం*

*దేవకీ పరమానందం - కృష్ణం వందే జగద్గురుమ్ !!*

*శ్రీకృష్ణుని జననం, జీవితం అన్నీ కూడా ఓ అద్భుతమే. యుగ యుగాలుగా, తరతరాలుగా శ్రీకృష్ణుడి జీవితం సమస్త మానవాళిని ఎంతో ప్రభావితం చేస్తోంది. అయితే... ఉత్తరప్రదేశ్‌లోని మధురలో శ్రీకృష్ణుడు  జన్మించినట్లు మన పురాణాలు చెబుతున్నాయి. వివరాల్లోకెళ్తే.. మధురలో ఉగ్రసేనుడు అనే యాదవ మహారాజు ఉండేవాడు. ఈ మహారాజుకి కంసుడు అనే కొడుకు, దేవకి అనే కూతురు ఉండేవారు. అయితే ఉగ్రసేనుడు వృద్ధుడు కావడం వల్ల అత్యాశపరుడు, పరమ రాక్షసుడు అయిన అతని కొడుకు కంసుడు తండ్రి అయిన ఉగ్రసేనుడిని కారాగారంలో పెట్టి అధికారాన్ని సొంతం చేసుకుంటాడు.*

*మరోవైపు కంసుడి చెల్లెలు అయిన దేవకి యాదవరాజైన వసుదేవుడిని వివాహం చేసుకుంటుంది. అయితే పెళ్లయిన తర్వాత కొత్త దంపతులను కంసుడు తన రథంలో తీసుకెళుతున్న సమయంలో ఆకాశవాణి భవిష్యత్తు పలుకుతుంది. అదేమిటంటే... ఓ కంసా! నీ చెల్లెలి వివాహం తర్వాత నీవు ఎంతో ఆనందంగా ఆమెను తీసుకువెళ్తున్నావు. కానీ నీ చెల్లెలికి పుట్టే అష్టమ సంతానం నిన్ను వధిస్తాడు. ఇదే నీ అంతం అని ఆకాశవాణి భవిష్యత్తు చెబుతుంది. ఇది విన్న కంసుడు ఒక్కసారిగా ఉగ్రరూపం దాల్చుతాడు. ఆహా... ఆమె 8వ సంతానం వచ్చి నన్ను చంపుతుందా? నేను ఇప్పుడే ఆమెను చంపేస్తాను. ఆమె 8వ బిడ్డకు ఎలా జన్మనిస్తుందో చూస్తాను అంటూ హూంకరిస్తాడు.*

*అంతటితో ఆగకుండా అక్కడే ఉన్న కత్తి తీసి తన చెల్లెలు అయిన దేవకి తల నరకబోతాడు. అప్పుడు దేవకి భర్త, కొత్త పెళ్లి కొడుకు అయిన వసుదేవుడు దయచేసి ఆమె ప్రాణం తీయకు... మా 8వ సంతానమే కదా నిన్ను చంపుతుంది అనుకునేది. కాబట్టి నేను మాకు పుట్టిన పిల్లలు అందరికనీ నీకిస్తాను. నువ్వు వాళ్లిని చంపవచ్చు.. కానీ నా భార్య అయిన దేవకిని వదిలిపెట్టు అని కంసుడిని వేడుకుంటాడు. అయితే కంసుడు తన చెల్లెల్ని, బావ అయిన వసుదేవుడిని చంపకుండా తన ప్రాణం మీద ఉన్న తీపితో వాళ్లను గృహనిర్బంధంలో ఉంచుతాడు. అంతే కాకుండా వాళ్లను అనుక్షణం గమనించడానికి కాపలా కూడా ఉంచుతాడు.*

*కొన్ని రోజుల తర్వాత మొదటి బిడ్డ పుట్టగానే కాపలా ఉండేవాళ్లు ఈ విషయాన్ని కంసుడికి చేరవేస్తారు. వెంటనే కంసుడు వస్తాడు. ఆయన రాగానే దేవకీ వసుదేవులు ఈ బిడ్డను వదిలేయ్‌.. 8వ బిడ్డ కదా నిన్ను చంపేది అని ప్రాధేయపడతారు. కానీ కంసుడు కనికరించకుండా బిడ్డను చంపుతాడు. ఇలా ప్రతీ సారీ పుట్టిన బిడ్డలను చంపేస్తాడు. దేవకీ వసుదేవులు ఎంత ప్రాధేయపడినా వినడు.*

*ఈ క్రమంలో దేవకి వసుదేవులకు బహుళ పక్షం అష్టమి రోజు భారీ ఉరుములతో కూడిన వర్షం పడుతున్న సమయంలో 8వ బిడ్డ పుడతాడు. ఆ రాత్రి సమయంలో ఒక అద్భుతం జరుగుతుంది. దేవకీ వసుదేవులు బంధీలుగా ఉన్న కారాగారం తలుపులు వాటంతటవే తెరుచుకుంటాయి. కాపలా ఉండే వాళ్లు అందరూ నిద్రలోకి జారుకుని ఉంటారు. వసుదేవుడి సంకెళ్లు సైతం తెగిపోతాయి. ఆ క్షణంలో దేవకి వసుదేవుడు ఇదంతా దైవలీలగా భావిస్తారు. వెంటనే వసుదేవుడు బిడ్డను ఎత్తుకుని యమునా నదివైపు నడుస్తాడు. ఆ ప్రాంతమంతా వరద నీటితో మునిగి ఉన్నా ఆశ్చర్యకరంగా వసుదేవుడు నదిని దాటే మార్గం మాత్రం స్పష్టంగా తెరుచుకునే ఉంటుంది. అలా నదిని దాటిన వసుదేవుడు నంద, యశోదల ఇంటికి వెళ్తాడు. యశోద కూడా ఆ సమయంలోనే ఒక ఆడపిల్లకు జన్మనిస్తుంది. అది కష్టమైన ప్రసవం కావడంతో యశోద స్పృహలో ఉండదు. అప్పుడు వసుదేవుడు ఆ ఆడపిల్ల స్థానంలో తనకు జన్మించిన 8వ బిడ్డ (శ్రీకృష్ణుడు)ను ఉంచి, ఆ ఆడబిడ్డను తీసుకుని తిరిగి కారాగారానికి చేరుకుంటాడు. అప్పుడు ఆ ఆడబిడ్డ ఏడుస్తుంది. నిద్రపోతున్న కాపలావాళ్లు లేచి కంసుడికి ఈ వార్త చేరవేస్తారు.  కంసుడు అనుమానంతో కాపలావాళ్లను గట్టిగా ప్రశ్నించగా వాళ్లు భయపడి పుట్టింది ఆడబిడ్డేనని...  చెబుతారు.*

*అప్పుడు దేవకీ వసుదేవులు... పుట్టింది ఆడబిడ్డ... నిన్ను చంపలేదు... మగ బిడ్డ అయి ఉంటే చంపేవాడేమో... ఈ ఆడబిడ్డను వదిలిపెట్టు అని కంసుడిని వేడుకుంటారు. అయినా కంసుడు కనికరించడు. ఆ ఆడబిడ్డను నేలకేసి కొట్టబోతాడు. కంసుడి చేతి నుంచి బిడ్డ జారిపోయి బయటికెళ్లి పడుతుంది. అప్పుడు ఆ బిడ్డ నిన్ను చంపేవాడు ఎక్కడో ఉన్నాడు అని చెప్పి వెంటనే మాయమవుతుంది. కంసుడికి ఏమీ అర్థంకాక అంతా వెతుకుతాడు. అయినా ఫలితం ఉండదు.*

*ఆ విధంగా గోకులం చేరిన కృష్ణుడు, రాజు కొడుకే అయినా ఒక సాధారణమైన గోవుల కాపరిలానే పెరిగాడు. శ్రీమహావిష్ణువు ఎనిమిదో అవతారమైన శ్రీకృష్ణుడు జన్మించిన అష్టమినే కృష్ణాష్టమిగా నేడు జరుపుకుంటున్నాం.* 

                     *అందరికి* 

     *శ్రీ కృష్ణ జన్మాష్టమి శుభాకాంక్షలు*

*┈┉┅━❀꧁హరే కృష్ణ꧂❀━┅┉┈*

         *SPIRITUAL SEEKERS*

🍁🦚🍁 🙏🕉️🙏 🍁🦚🍁