*అవతార్ మెహర్ బాబా - 34*

🪷

రచన: శ్రీ శార్వారి

*టర్నింగ్ పాయింట్ :*

అక్టోబరు 15-1922. మెహర్ బాబా జీవితంలో ఒక మలుపు. ఉదయమే సదాశివంతో కలిసి మెహర్ బాబా సాకోరికి చేరుకున్నారు. అదేరోజు దౌలత్ మాయి తన ఇద్దరు కూతుళ్లు ఫ్రయినీ, మెహరాల తో సాకోరి వచ్చింది. ఉపాసినీ మహరాజ్ మేనకోడలు 'గంగా' వారిని ఆహ్వానించి లోపలకు తీసుకుపోతుండగా ఎవరో వస్తున్న చప్పుడు వినిపించింది. చూడగా మెహర్ బాబా. ఆయన ఉపాసినికి ప్రియ శిష్యుడన్న గౌరవం అందరికీ ఉంది. వారిని గమనించకుండానే మెహర్ లోపలకు వెళ్లాడు. అప్పుడే మెహరా మెహర్ బాబాను క్రీగంట చూచి పులకించింది. మౌనంగానే ఆయన వైపు ఆకర్షితురాలైంది.

"ఇతను నా వాడు!” అనుకున్నది స్థిరంగా. హృదయాన్ని రంజింపచేసినవాడు జీవితేశ్వరుడే కదా! హృదయాన్ని అర్పించేది హృదయేశ్వరి!

దౌలత్ మాయికి సాకోరి కొత్తకాదు. లోగడ ఉపాసినీ మహరాజ్ ని, మెహర్ బాబాను కలిసింది. ఆ సంగతులు కూతురు మెహరాకు తెలియవు.

ఉపాసినీ మహరాజ్ పర్ణశాలలో తల్లీ కూతుళ్లు కూర్చుని ఉండగా మెహర్ బాబా లోపలికి వచ్చి, బాబా ఎదురుగా చేతులు కట్టుకుని నిలబడ్డాడు. ఉపాసిని వెంటనే "బయటకు వెళ్లు - మామిడిచెట్టు క్రింద ఉండు” అని ఆజ్ఞాపించారు. వెంటనే మెహర్ బాబా బయటకొచ్చి ముమ్మారు పర్ణశాలకు ప్రదక్షిణం చేసి వెళ్లి చెట్టు క్రింద కూర్చున్నాడు.

వంగి వంగి మెహర్ వైపు దొంగచూపులు చూస్తూ మెహరా అనుకుంది. "నేను నీ దానిని, నీవు నా వాడివి. ఒకరికోసం ఒకరం మనం జన్మించాం".

https://chat.whatsapp.com/IWSgPdEjJqNHgK1WdzQkJe

తర్వాత ఉపాసినీ మహరాజ్ పర్ణశాల నుండి బయటకొచ్చి, మామిడిచెట్టు క్రింద ఉన్న మెహర్ తో మాట్లాడాడు. దీపావళికి రెండు రోజులు ముందుగా సాకోరి రమ్మని ఆదేశించాడు. "ఏర్పాట్లు అన్నీ నీవే చూసుకోవాలి”.

మెహర్, సదాశివం అహ్మద్ నగర్ బైలుదేరారు. టాంగాలో ఎక్కి కూర్చోగానే ఉపాసినీ మహరాజ్ భక్తులు బిలబిలా వచ్చారు పాదనమస్కారాలకు. మెహర్ బాబా ఎవరినీ తనకు నమస్కరించడానికి అవకాశం ఇవ్వలేదు. అది గురుస్థానం. సద్గురువును తప్ప వేరెవ్వరిని గురువుగా భావించి నమస్కరించినా అది గురుద్రోహం అవుతుంది.

ఈసారి సాకోరికి ప్రయాణం ప్రేమ చూపులకే అన్నట్లయింది. మెహర్ బాబా, మెహరాలు చూపులతోనే ఒక్కటైనారు. అదే మెహర్ బాబా సాకోరికి చివరిసారి రావడం. ఆ తర్వాత 19 సంవత్సరాలకు 1941లో మెహర్ బాబా ఉపాసినీ మహరాజ్ ని కలవడం జరిగింది. రెండు దశాబ్దాలు గురుశిష్యులు ఎడమొహం పెడమొహంగానే ఉన్నారు.

అహ్మద్ నగర్ లో గుల్మాయి ఇంట్లో దిగారు. ఆమె మంజిల్ కి వెళ్లడం ఆ ఇంట ఎవరికీ ఇష్టం ఉండదు. ఉపాసినీ బాబా పట్ల వారెవరికి గౌరవంలేదు. ఆయన బ్రాహ్మణుడని. ఆ ఇంటి వారికి మెహర్ బాబా మహత్తులపై నమ్మకంలేదు. గుల్మాయికి అత్తమామల సతాయింపు, వేధింపులు ఎక్కువైనాయి. అయినవారి 'పరమహింస' భరించలేక గుల్మాయి పారిపోయి మంజిల్ చేరుకుంది.

ఒకసారి మెహర్ బాబా స్విచ్ పైన వేలు పెట్టి గుల్మాయితో అన్నాడు.

"చూడమ్మా! ఈ స్విచ్ కి అక్కడి బల్బుకు కనెక్షన్ ఉంది. ఇక్కడ స్విచ్ నొక్కితే, అక్కడ బల్బు వెలుగుతుంది. అలాగే సద్గురువు ఒక్క సంకల్పం చేస్తే చాలు శిష్యులలో జ్ఞానం కలుగుతుంది.”

బాబా మంజిల్ లో లేని సమయం మండలికి ఆటవిడుపు. కళ్లెంలేని గుర్రాల్లా రెచ్చిపోతారు. రుస్తుం, నావల్ తలాతీ ఇద్దరూ మేఘ మల్హార్ రాగం మీద చర్చ చేశారు. 'మేఘరాగం' ఆలపిస్తే వర్షం వస్తుందని ఒకరు, 'అసంభవం' అని రెండవవారు వాదించారు. అక్కడ రాగం, రాగాలాపన ముఖ్యం కాదు. యోగశక్తి, తపశ్శక్తి ప్రధానం అంటారు మరొకరు.

అందరు మెహర్ బాబా వివరణకై ఆసక్తిగా ఎదురుచూచారు. బాబా వివరణ:

“నావల్ చెప్పింది కరెక్టే. మేఘ మల్హార్ రాగం ఆలపిస్తే వర్షం కురుస్తుంది. దానికి యోగశక్తితో పనిలేదు. ఆ రాగానికి యోగ బలం ఉంది. ప్రకృతి సహకరిస్తుంది. ఆ రాగ నాద తరంగాలు మేఘాల్సి తయారు చేస్తాయి. మన రేడియో. టి.వి. తరంగాలు అలాంటివే.

ఒక నాదం ఉత్పత్తి జరిగిన తర్వాత అది నశించదు. బయటకు పోయి గాలిలో కలిసి ఉంటుంది. అయితే సాంద్రత, వేగం పలచబడుతుంది. శబ్దానికి మూలం నిశ్శబ్దం. ఓంకార ప్రణవం. ప్రణవంలోంచి వాక్కు పుట్టింది. అర్ధం ఐనా కాకపోయినా, ప్రార్ధనలన్నీ ప్రణవక్రియలే. ప్రార్ధన లోంచి శక్తి ఉద్భవిస్తుంది. అంటే శక్తికి మూలం శబ్దం. దానిని నాదబ్రహ్మం, శబ్దబ్రహ్మం అంటారు. అన్నింటికంటే పైది పరబ్రహ్మం.

https://chat.whatsapp.com/IWSgPdEjJqNHgK1WdzQkJe

మనో నేత్రం ఒకటి ఉంటుందని మీకు తెలియదు. మనం ప్రపంచాన్ని చూసేది రెండు కళ్లతో. కంటికి కనిపించని కన్ను మరొకటి ఉంది. అది మనో నేత్రం. మనసుతో చూడడం మనోనేత్రం. జ్ఞానంతో తెలుసుకోగలగడం జ్ఞాన నేత్రం. తపస్సు చేసిన వారికి మనో నేత్రం ఏర్పడుతుంది. యోగులకు జ్ఞాననేత్రం ఏర్పడుతుంది. రెండూ ఒక్కటే అయినా వేరువేరు క్రియాత్మకాలు.”

📖

ఒక రోజు రాత్రి బాబా చెప్పారు. “రేపు నవంబరు 1 నుండి నాలో యోగా వర్కింగ్ తీవ్రంగా సాగుతుంది. దానిని తట్టుకోగల వాళ్లు ఇక్కడ ఉండవచ్చు. భరించలేని వారు దయచేసి వెళ్లిపోండి. ఉన్నవాళ్లు ఎన్ని కష్టాలు, అవరోధాలు ఏర్పడినా కదలకూడదు.”

కారణాలు తెలియవు గాని, అప్పట్లో మెహర్ బాబాపై చాలా వ్యతిరేక ప్రచారం సాగింది. ఆయన 'మండలి'ని అడ్డం పెట్టుకుని అక్రమ వ్యాపారాలు ఏవో చేస్తున్నాడని ప్రచారం. ఒక ఇరానీ యోగి గా నటిస్తూ ప్రజల్ని మోసం చేస్తున్నట్లు పత్రికలు రాశాయి. అది కూడా తన యోగా వర్కింగ్ లో ఒక భాగమే అంటారు బాబా.

ఆ వ్యతిరేక ప్రచారాల వల్ల మెహర్ బాబాకి ఒక విధంగా మేలు జరిగింది. బాబా ప్రవర్తన మారింది. అంతవరకు కర్కశంగా, కఠినంగా, నియంతలాగా ప్రవర్తిస్తున్నవాడు సౌమ్యంగా మారాడు. ప్రేమాస్పదుడైనాడు. మెహర్ బాబా ప్రేమి బాబా అయినారు. తన శిష్యులకు పూర్తి స్వేచ్ఛ లభించింది. ఇప్పుడు ఎవరిష్టం వారిది. నిబంధనలు లేవు. నియమాలు లేవు. క్రమశిక్షణ పేర శిక్షలు లేవు.

*జ్ఞాన ప్రసూనాలు :*

గాడ్ రియలైజేషన్, సెల్ఫ్ రియలైజేషన్ అనేవి జ్ఞానానికి రెండు పార్శ్వాలు. రెండు అంచులు. అసలు రియలైజేషన్ అంటేనే జ్ఞానం ఆవిష్కరించబడటం. అది ఆత్మ జ్ఞానమా? దివ్యజ్ఞానమా? ఇంగితమా? పరేంగితమా? అవధూతల జ్ఞానం, ధ్యానుల జ్ఞానం వేరువేరు రంగుల్లో రుచుల్లో ఉన్నట్లు అనిపిస్తుంది కాని అంతా జ్ఞానమే. బంగారం బంగారమే నగలు వేరు వేరు. అన్నింటి విలువ, వినిమయం ఒకేలా ఉంటాయి.

గురువు, సద్గురువు, మహాగురువు, పరమ గురువు అంతస్తులలో తేడా. అభివ్యక్తి ఒక్కటే, వ్యక్తీకరణలో భేదం. ఫకీరు, కుతుబ్, మజా్బూత్, ప్రవక్త. అవగాహన తో ఒక అంతస్తు చేరిన తర్వాత ఏ కొంచెం యోగం, ధ్యానం చేసినా అతీంద్రియశక్తి ఇబ్బడి ముబ్బడిగా ఉత్పత్తి అవుతుంది. పొంగి ప్రవహిస్తుంది. ఆ యోగశక్తి ప్రవాహం లో పరిసరాలలోని వారు తడిసి పునీతుల వుతారు. ఉక్కిరి బిక్కిరవుతారు. ఆ శక్తిని భరించే ఓర్మి, నిగ్రహించే సహనం గురువులకు ఉంటుంది. గురువుల్ని ఆశ్రయించిన వారికి అది సంక్రమిస్తుంది. గురువు ప్రత్యేకంగా ధారాదత్తం చేయక పోయినా వెంటనంటి తిరిగే శిష్యులకు కొంతశక్తి సంక్రమిస్తుంది.

ఒక గురువుకు, సద్గురువుకు (మాస్టర్) మధ్య తేడా అంత తేలికగా గుర్తించ వీలు కాదు. జ్ఞానం విషయంలో ఇద్దరూ సమానమే నన్న నమ్మకం కలిగిస్తారు. గురువు కేవలం మార్గం చూపగలడు. సద్గురువు ఎందరికైనా శక్తిని అనుగ్రహించ గలడు. గురువులో పనిచేసే ప్రజ్ఞ సద్గురువుదే అవుతుంది.

గురువు మార్గదర్శి అయితే, మాస్టర్ మార్గ నిర్దేశకుడవుతాడు. ఎవరికి ఏ మార్గం అనుకూలమో ఆ మార్గం చూపగలవాడు సద్గురువు. గురువు తనకు తెలిసిన మార్గం ఒక్కటే చూపగలడు. మాస్టర్ వరల్డ్ వైడ్. గురువు శక్తి పరిమితం. సద్గురువు అనుగ్రహం అపరిమితం. గురువులు భౌతికంగా ఉన్నంతకాలమే శక్తినివ్వగలరు. మాస్టర్లు భౌతిక శరీరం లేకపోయినా విశ్వ వ్యాపకులు, జ్ఞాన సంవాహకులు.

https://chat.whatsapp.com/IWSgPdEjJqNHgK1WdzQkJe

మహాత్ముల సమాధుల వద్ద మహాశక్తు లుంటాయి. అవి ఎప్పటికీ తరిగిపోవు. కరిగిపోవు. ఆ శక్తిని అందుకోగల సంస్కారం, స్వచ్ఛత ఉన్నవారికే వాటివల్ల ఉపయోగం. భక్తుల కోరికలన్నీ భౌతిక సంబంధాలే. సాయి సమాధి దర్శన మాత్రం చేత కోరికలు నేరవేరడం మనకు తెలిసిందే. ఆధ్యాత్మికంగా అభివృద్ధి కలగాలంటే ఫిజికల్ మాస్టర్ ఉండి తీరాలి. సమాధి సందర్శనాలతో ఎవరికీ  ఆధ్యాత్మజ్ఞానం కలగదు. కలిగినాపెరగదు. దర్గాల దర్శనం వల్ల ఆధ్యాత్మికలబ్ది చేకూరుతుంది. మనశ్శాంతి కలగడం కూడా భౌతికమే. ఒక గురువు యొక్క దయకు పాత్రమైనవారు, ఆ గురువు భౌతికంగా ఉన్నా లేకపోయినా స్మరణ మాత్రంచేత లబ్ది పొందగలుగుతారు. అశరీరులైన మాస్టర్లు అందరికన్నా మిన్న.

వాస్తవంగా మన బయట ఏమీ లేనట్లే లోకాలు, గోళాలు, భూమికలు, గందర గోళాలు అన్నీ మన లోపలివే, మనలో ఉన్నవే. సాధకునిలో లేనిది ఏదీ కొత్తగా గురువు ఇవ్వడు. ఉన్నవాటినే ముసుగు తీసి చేతికందిస్తాడు. సాధకునిలో దాగిన శక్తులు, సంపదలు దాచిన గది 'తాళం' తెరవడం వరకే గురువు చేసేపని. శరీర భ్రాంతి బ్రతుకుపై వ్యామోహం గురువుకు ఉండవు కనుక ఎప్పుడు శరీరం విడిచిపెట్టి ఆత్మతో శాశ్వతంగా ఉందామా అని తొందరపడతాడు. సమయం రాగానే సంతోషంగా నిష్క్రమిస్తాడు. బాధపడుతూ చనిపోయే యోగి ఒక్కడూ ఉండడు. ఎందుకంటే మృత్యువు రాక ముందే మరణశాసనం రాసుకుని తయారుగా ఉంటారు గనక. 'అవతారం' అంటే ఒక సద్గురువు మరల జన్మకు రావడమే.

ఆధ్యాత్మిక వారసత్వానికి గొప్ప ఉదాహరణ సాయిబాబా. సాయిగురువు 'కుతుబ్' జర్జరి జరబక్ష్ 1850లో ఔరంగా బాదులో సాయికి తన సర్వజ్ఞతను, సర్వశక్తుల్ని ప్రసాదించిన సద్గురువు, మహాయోగి.

🪷

*సశేషం*

꧁☆•┉┅━•••❀❀•••━┅┉•☆꧂

*కథల ప్రపంచం* 

https://chat.whatsapp.com/IWSgPdEjJqNHgK1WdzQkJe

*తెలుగు భాషా రక్షతి రక్షితః* 

*ఏడాది చందా 120/-, ఫోన్ పే & గూగుల్ పే నెంబర్ 9849656434*

*1 YEAR* *SUBSCRIPTION 120/-*

*phone pe & Gpay to 9849656434*

꧁☆•┉┅━•••❀❀•••━┅┉•☆꧂