రామాయణానుభవం....251

సీతా దేవి ఈనాడు రాక్షసులకు వశమైనా, ఈ రాక్షసులను గాని, యీ వనాన్ని గాని చూడకుండా ఏకాగ్రచిత్తంతో రాముణ్ణి ధ్యానిస్తోంది. మనస్సులో అతట్టే నిలుపుకుంది.

ఇలా ఆలోచిస్తున్న హనుమంతుడికి సాయం చెయ్యడానికా అనిపించేలా చంద్రుడు మరొకసారి మేఘాల చాటునించి బయటకు వచ్చాడు.

ఆ తెల్లని వెన్నెలకాంతిలో హనుమంతుడు సీత చుట్టూ ఉన్న రాక్షసస్త్రీలను చూసాడు. ఒంటి కన్నుదీ, ఒంటి చెవిదీ, చెవులే లేనిదీ, దొప్పచెవులదీ, వేలాడుతున్న పెదాలున్నదీ, వేలాడే పొట్ట ఉన్నదీ, ఎత్తుపళ్ళదీ, వంకరమూతిదీ- యిలా రకరకాల వికృతరూపాలున్న రాక్షస స్త్రీలు ఆమె చుట్టూ కాపలా ఉన్నారు.

లేళ్ళు, పందులు, దున్నపోతులు, గుంటనక్కలు, మేకలు, పులులు వంటి ముఖాలు కలవాళ్ళూ; గుర్రంపాదాలు, ఏనుగుపాదాలు, ఒంటె పాదాలు వంటి పాదాలు కలవాళ్ళు, రకరకాల వంకర ముక్కులు, వికృత నేత్రాలు కలవాళ్ళు ఆమె చుట్టూ కాపలా ఉన్నారు.

వాళ్ళు యినుముతో చేసిన శూలాలు, కూటాలు, ముద్గరాలు ధరించి ఉన్నారు. చూస్తేనే చాలు కోపిష్ఠివాళ్ళు అని తెలుస్తోంది. ఆపైన మద్యపానం చేస్తున్నారు. వాళ్ళ శరీరంపై అంటుకున్న రక్తమాంసాలు చూస్తే వాళ్ళకి అవే ఆహారమని తెలుస్తోంది.

చూస్తేనే ఒళ్ళు జలదరించేలా ఉన్న ఆ క్రూర రాక్షసస్త్రీల వలయం మధ్య సీత  శృతిచేయని వీణలా ఉంది. సింహాల మధ్య చిక్కిన ఆడఏనుగులా ఉంది. అంతలో తెల్లవారు వచ్చింది. షడంగవేదవిదులైన బ్రహ్మరాక్షసులు వేదాలు వల్లించడం మొదలుపెట్టారు.

ఈ శబ్దాలకు రావణుడు మేలుకున్నాడు. లేవగానే ధరించిన వస్త్రాలూ, పూలమాలలూ జారిపోతుంటే అతడికి సీత గుర్తుకొచ్చింది. ఆమెపట్ల కామాన్ని అణుచుకోలేక లేచినవాడు లేచినట్లే అశోకవనం వైపు వెళ్ళాడు..

మహేంద్రుడి వెంట దేవ, గన్ధర్వ స్త్రీలు వెళ్ళినట్లు రాక్షసేంద్రుడి వెంట వందమంది స్త్రీలు వెళ్ళారు. అందులో కొందరు శ్వేతచ్ఛత్రం పట్టారు. కొందరు బంగారు దీపాలను, మరికొందరు వింజామరలను, మరికొందరు విసనకర్రలను ధరించారు. కొందరు బంగారు పాత్రలలో నీళ్ళు తీసుకుని ముందు నడవగా, మరికొందరు విచ్చుకత్తులతో అనుసరించారు. మరికొందరు మద్యం నింపిన రత్నఖచితపాత్రలు పట్టుకుని అతడికి కుడి పక్కన నడిచారు.

రావణుడి భార్యలు, నిద్రమత్తులో కళ్ళు మూతలు పడుతుంటే, మేఘాన్ని అనుసరించే మెరుపుతీగల్లా వీరుడైన తమభర్తను అనుసరించారు.

శింశుపావృక్షం మీద కూర్చున్న హనుమంతుడికి ఆ స్త్రీల అందెల చప్పుళ్ళూ, వడ్డాణాలకు ఉన్న మువ్వలు చేస్తున్న చప్పుళ్ళూ వినిపించాయి. ఆ శబ్దం వచ్చిన దిశలో చూడగా. అశోకవనద్వారాన్ని సమీపిస్తున్న మహాబలశాలి రావణుడు కనిపించాడు.

        .........సశేషం.......

చక్కెర.తులసీ కృష్ణ.