*దత్తాత్రేయ క్షేత్రం..*

               *కురువపురం ...!!*

                   ➖➖➖

*దత్తాత్రేయుడు.. భక్తులను అనుగ్రహించే సాక్షాత్తు త్రిమూర్తి స్వరూపుడు.*

*ఆయన అనుగ్రహం ఉంటే చాలు అన్ని రకాల బాధలు పోతాయి, సకల శుభాలు కలుగుతాయి.*

*మనదేశంలో అనేక దత్తక్షేత్రాలు ఉన్నాయి. వాటిలో ముఖ్యమైనది.. కురువపురం.*

*దీన్నే కురువాపురం, కురుంగడ్డ మొదలైన పేర్లతో పిలుస్తారు. ఈ శ్రీపాద శ్రీవల్లభ క్షేత్రం తెలంగాణ, కర్ణాటక సరిహద్దుల్లో వుంది.*

*హైదరాబాద్ నుంచి మంత్రాలయం , కాని రాయచూర్ వెళ్ళే బస్సులో మెహబూబ్ నగర్ జిల్లాలోని మక్తల్ వరకు వెళ్ళాలి.*

*ఆతరువాత అనుగొండ వెళ్ళే బస్సులో పంచదేవ్ పహాడ్ గ్రామాన్ని, అక్కడి నుంచి దగ్గరలోనే కురువపురం చేరుకోవచ్చు.*

*కర్ణాటక రాష్ట్రం లోని రాయ్ చూర్ దగ్గర నుంచి కూడా కురువపురం వెళ్ళచ్చు.*

*ఇటైనా, అటైనా కృష్ణానది దాటాలి. కురువపురం ఒక ద్వీపంలో వుంది. చుట్టూ కృష్ణానది. ఆనది దాటితే ఆలయం.*

*శ్రీపాద శ్రీవల్లభులు చాలా సంవత్సరములు ఇక్కడే తపస్సు చేశారు.*

*ఆంధ్ర ప్రాంతంలోని పిఠాపురంలో జన్మించిన దత్తాత్రేయుని అంశమైన శ్రీపాద శ్రీవల్లభులు 16 సంవత్సరములు తల్లితండ్రుల వద్ద గడిపి అనంతరం కురువపురం వచ్చి తపస్సు చేశారు.*

*ఇక్కడే శ్రీపాద వల్లభులు తమ మహిమ లెన్నిటినో చూపారు. ఇప్పటికీ ఇక్కడే సూక్ష్మ రూపులై వుంటారని భక్తుల నమ్మకం.*

*విశేషాలు..*

*ఈ క్షేత్రంలో శ్రీపాద శ్రీవల్లభుడు.. ఆశ్వీయుజమాస కృష్ణద్ద్వాదశి, హస్తా నక్షత్రం రోజున కృష్ణానదిలో     వారు అంతర్దానమయ్యారు.*

*శ్రీగురుచరిత్ర,  శ్రీవల్లభుల చరిత్ర,                 శ్రీ నృసింహ సరస్వతీ స్వామి చరిత్ర, మొదలైన సిద్ధపురుషుల చరిత్రలు చదివేవారికి ఈ క్షేత్రం గురించి తెలుస్తుంది.*

*ఈ ప్రాంతంలో శ్రీపాద వల్లభులు కృష్ణానది ఇటు వేపు సూర్యనమస్కారాలు చేసేవారని, దర్బారు నడిపేవారని ఇక్కడి వారు చెప్తారు.*

*అటు కర్నాటక సరిహద్దు కృష్ణానది ఒడ్డున తపస్సు చేసుకునేవారు. అందుకే ఈ రెండు ప్రాంతాలు ప్రసిద్ధమైన క్షేత్రంగా భాసిల్లుతోంది.*

*శ్రీపాదుల వారు యోగముద్రలో సిద్ధాసనం వున్న ప్రదేశంలో ప్రస్తుత ఆలయం వుంది.*

*అదే కురుపురం (కురువాపురం). శ్రీపాద శ్రీవల్లభ క్షేత్రం, కురుపురాన్ని బుట్టీల (పుట్టీలు) ద్వారా కృష్ణానదిలో ప్రయాణించి చేరుకోవచ్చు ఇది చాలా మహిమగల శ్రేత్రం.*

*వెయ్యి సంవత్సరాల పైనే వయసు వున్న మర్రి చెట్టు కింద శ్రీపాద శ్రీవల్లభులు తపస్సు చేసిన ఈ ప్రాంతంలో ఒక చిన్న గుడి వుంది.*

*దగ్గరలో వాసుదేవానంద సరస్వతి స్వామివారు తపస్సు చేసిన గుహ, దాని పైన వున్న శివాలయం దర్శించుకోవచ్చు.*

*కురు మహరాజుకు ఙ్ఞానోపదేశం అయిన ప్రాంతం కాబట్టి కురువపురమనే పేరు వచ్చింది.*

*కురువపురం ఆలయంలో ప్రతిరోజూ అభిషేకం, పల్లకీసేవ జరుగుతాయి. శ్రీపాదశ్రీవల్లభుల జయంతి, దత్తజయంతి, వంటి ఉత్సవాలు జరుగుతాయి.*

*అలాగే కృష్ణానదిలో అంతర్థానమైన శ్రీపాదవల్లభుల గుప్తదినం (ఆశ్వీయుజ బహుళ ద్వాదశి), గురుద్వాదశి, (మాఘ బహుళ పాడ్యమి) శ్రీనృసింహ సరస్వతి గుప్తదినాలు కూడా ఉత్సవాలు నిర్వహిస్తారు.*

*గురు పౌర్ణమి సందర్భంగా శ్రీపాద శ్రీవల్లభ క్షేత్రం, కురుపురంలో విశేష పూజలు జరుగుతాయి. ఆ రోజు భక్తుల కూడా ఎక్కువ మందే దర్శించుకుంటారు.*

*దర్శించతగ్గ ప్రదేశాలు:*

*పంచపహడ్..ఈ ప్రాంతంలో ఐదుగురు దేవతలు కొలువై పూజలందుకుంటున్న ప్రాంతం ఇది. పాండురంగస్వామి, శ్రీలక్ష్మీనరసింహస్వామి, ఆంజనేయస్వామి, రాఘవేంద్రస్వామి, విఘ్నేశ్వరుడు. ఇంకా అనఘ దత్త దేవాలయం, ఒకే చోట వున్నాయి.*

*శ్రీశ్రీశ్రీ దత్తాత్రేయస్వామి మహాసంస్థానపీఠము:*

*ఈ ప్రాంగణంలో అనేక ఆలయాలున్నాయి.*

*శ్రీపాద శ్రీ వల్లభుల దర్బార్.*

*ఇక్కడ శ్రీపాద శ్రీవల్లభుల దర్బార్ జరిగే ప్రాంతం ఉంది. ఇక్కడ ఆలయంలో శ్రీపాద శ్రీవల్లభులు తపస్సు చేసుకునేటప్పడు తన కమండలం ఆన్చిన రాయి (త్రిశూలం) కూడా వుంది.*

*ఈ ఆలయంలో 27 ప్రదక్షిణలు చేసి కోరుకుంటే కోరిన కోరికలు తీరుతాయని భక్తుల విశ్వాసం.*

*సత్రాలు.. వసతి :*

*కురుపురంలోను, రుక్మిణీ సహిత పాండురంగ ఆలయంలో నిత్యాన్నదానం జరుగుతుంది.*

*ఇక్కడ ఉచిత రూములు వున్నాయి.. పంచదేవతాపహాడ్ దగ్గరలో శ్రీదత్తాత్రేయ స్పిరిచ్యువల్ సొసైటీ,                 శ్రీ పాద దత్తసాయి సొసైటీవారి అధ్వర్యంలో శ్రీపాద ఛాయ ఆశ్రమం నిర్మించారు.*

*ఇక్కడ దత్తాత్రేయుని ఆలయం ఉంది. అన్ని వసతులు, ఆధునిక కట్టడాలతో రూములు లభ్యమవుతున్నాయి.*

           * శ్రీకృష్ణార్పణమస్తు*

🙏🙏🙏🙏🙏