🔥అంతర్యామి 🔥

# సుఖాలే కావాలా?...

☘️సమాజంలో మూడు రకాల మనుషులను చూస్తుంటాం. ఏమాత్రం శ్రమించకుండా సుఖభోగాలను అనుభవించాలనుకునేవారు ఒక రకం. శ్రమకు తగ్గ ఫలితం లభిస్తే చాలనుకుంటారు ఇంకొందరు. సౌఖ్యాన్ని దృష్టిలో పెట్టుకోకుండా జీవితాంతం శ్రమిస్తూండే వాళ్లు మూడో రకం. ఈ చివరి రకం వాళ్లను ఉత్తములుగా భావించవచ్చు. ఇటువంటి నిస్వార్థపరుల వల్లే సమాజానికి శ్రేయస్సు చేకూరుతుంది. జాతి అభ్యున్నతి చెందుతుంది.

☘️'శ్రమ ఏవ జయతే'... శ్రమ వల్లనే విజయం చేకూరుతుంది. అది శాశ్వతకీర్తిని తెచ్చిపెడుతుంది. కష్టపడకుండా అడ్డదారుల్లో సంపద, పదవి, కీర్తిని కాంక్షించేవాళ్లుంటారు. ఎప్పుడో ఒకప్పుడు అటువంటి వారి అసలు రంగు బయటపడుతుంది. చరిత్రహీనులవుతారు. దేవుడిచ్చిన జన్మను మనిషి సార్థకం చేసుకోవాలి. ఉన్నంతలో ఇతరులకు ఇవ్వడానికే ఆలోచించాలి తప్ప పుచ్చుకోవడానికి అంగలార్చకూడదు. కానీ నేడు మనిషి అదే చేస్తున్నాడు. చిన్న చిన్న కష్టాల్ని కూడా భరించలేకపోతున్నాడు. వేసవి వస్తే చినుకులు పడాలనుకుంటాడు. కాస్త చలిగా ఉంటే ఎండ కోరుకుంటాడు. ఎప్పుడూ సుఖంకోసం వెంపర్లాటే ఈ ఆరాట- పోరాటాలతో కాలాన్ని వ్యర్థంగా గడిపేస్తున్నాడు. కార్యసాధకుడనేవాడు బద్ధకించడు, వాయిదాలు వేయడు. పనిని పరమాత్మ పూజగానే భావిస్తాడు.

☘️ఆకలి తీర్చుకోవడానికి ఎవరైనా శ్రమించాల్సిందే. ఆ శ్రమ ఫలితంగా తన అవసరాన్ని మించి సంపాదిస్తే దాన్ని దాచుకోకుండా వితరణ చేయాలని 'సాధన పంచకం' చెబుతోంది. అంతులేని సంపాదన సంతాపం కలగజేస్తుందే తప్ప సంతృప్తినివ్వదు. అసలైన సౌఖ్యం సంతృప్తిలోనే ఉంది. 'ఇవాల్టికి.... నాకు, నా కుటుంబానికి, నా ఇంటికొచ్చే అతిథులకు, సరిపడే ఆహారం ఇస్తే చాలు స్వామీ!' అని ప్రార్థిస్తాడు సంత్ కబీర్దాసు. రేపు పనిచేస్తే, మళ్లీ ఆయనే ఇస్తాడులే... అని ఆయన ధైర్యం. పోతనామాత్యుడు తన పొలాన్ని, హలాన్నే నమ్ముకున్నాడు. గ్రంథాలను అమ్ముకోలేదు. ఎవరెంత ప్రలోభపెట్టినా అప్పడుపు భుజించుటకన్న కందమూలాలను తింటూ బతకలేనా? అని దీటుగా బదులిస్తాడు. ధర్మబద్ధమైన శ్రమ సత్ఫలసిద్ధినే కలిగిస్తుంది. లౌకిక సుఖాల కోసం ధనార్జన అనివార్యమైనా పారలౌకిక ధార్మిక సాధనే సర్వోత్తమ

లక్షణం. రుషులు, అవధూతలు, తపోధనులు లోక కల్యాణం కోసమే శ్రమించారు తప్ప సొంత సుఖాల కోసం కాదుకదా! వారు పంచిన ఉపనిషద్, పురాణ, కావ్య ప్రబంధ, విజ్ఞాన శాస్త్ర పరిజ్ఞానం సమస్త మానవజాతి పురోగతి కోసం, రేపటి తరాల ఆనందమయ జీవితం కోసమన్నది అక్షర సత్యం.

☘️'నాకు రాజ్యం, స్వర్గం, పునర్జన్మ- ఇవేవీ వద్దు. కష్టాల్లో ఉన్నవారి కన్నీరు తుడిచే శక్తి ప్రసాదించు 'ప్రభూ!' అని పరమాత్మను ప్రార్థించాడు రంతి దేవుడు. నేను చేస్తున్న శ్రమ నా కోసం కాదు అనుకోవడంలో ఎంత సుఖం ఉంది! ఒక కష్టానికి, మరో కష్టానికి మధ్యలో దొరికే కొద్ది క్షణాల ఆనందం ఎంతో సౌఖ్యాన్నిస్తుంది. పనిచేసే వాడికి దారి దొరుకుతుంది. చేయనివాడికి సాకు దొరుకుతుంది.🙏

✍️- చిమ్మపూడి శ్రీరామ మూర్తి

🌺 శ్రీ రామ జయ రామ జయ జయ రామ 🌺