ఓం నమో భగవతే శ్రీ రమణాయ
మస్తాన్ ఒక మహమ్మదీయుడు; ఊరు తిరువణ్ణామలై ప్రక్కన. చేనేత పని చేసేవాడు. మహర్షి కొరకు బట్టలు నేసేవాడు. మహర్షిని 1914 లో మొదటిసారిగా దర్శించుకున్నాడు.
అనుకోకుండా మహర్షి దృష్టి ఒకసారి మస్తాన్ మీద పడింది. ఇక అంతే; మస్తాన్ అలసట లేకుండా సంపూర్ణమైన శాంతితో "ఎనిమిది గంటలు" అలానే నిలబడ్డాడు.
మహర్షి గురించి మస్తాన్ ఇలా చెప్పాడు ...
ఆ రోజులలో మహర్షి కేవలం ఒక్క చూపుతోనే మా హృదయ ద్వారాలు తెరచేవారు. ఆ చూపు మమ్మల్ని మార్చేసేది. తమ చూపుతోనే మమ్మల్ని కూడ తమ వంటి వాళ్ళుగా చేసేసేవారు. కాబట్టి ఇక ప్రశ్నల అవసరమే ఉండేది కాదు.
మస్తాన్ గురించి బాగా తెలిసిన
ఒక భక్తురాలు ఇట్లా చెప్పారు ...
మహర్షికి సేవ చేద్దామని నేనూ, మస్తాను వస్తూ ఉండేవాళ్ళం. చిత్రమైన మనిషి మస్తాను. తిరువణ్ణామలైకి నలభైమైళ్ళ దూరంలో ఉన్న మా గ్రామం నుండి మహర్షిని చూడడానికి వచ్చేవారం. ఒక్కొక్కసారి తన నేత పనిని ప్రక్కకు నెట్టి మహర్షితో గడపటానికని నాలుగైదు నెలలు వెళ్ళిపోయేవాడు. ఆ కాలంలో బిచ్చమెత్తుకొని కాలక్షేపం చేసేవాడు.
మహర్షి ఒకసారి మస్తాన్ గురించి
ఇలా సెలవిచ్చారు ....
“మస్తాన్ వృత్తి వల్ల అతనికిగాని, అతని తల్లిదండ్రులకిగాని తిండి దొరకటం అంతంత మాత్రమే. నాకు మాత్రం బట్టలు లభించేవి.”
కానీ అరుణాచలేశ్వరుని అనుగ్రహంతో మస్తాన్ కుటుంబానికి కావలసిన వనరులు ఏదో ఒక విధంగా లభిస్తూ ఉండేవి.
*భగవాన్ శ్రీ రమణులు🙏*
No comments:
Post a Comment