*29-Nov-25, Enlightenment Story*

🔸♦️🔹🔸♦️🔹🔸♦️🔹♦️

*కష్టపడకుండా విజయం దొరికితే అది అదృష్టం కాదు, ఒక శాపం అని చెప్పే ఈ సీతాకోకచిలుక అనుభవం ప్రతి మనిషికీ ఒక హెచ్చరిక లాంటిది*

 ఒక తోటలో ఒక వ్యక్తి సీతాకోకచిలుక గూడును గమనించాడు.ఆ గూడుకు ఒక చిన్న రంధ్రం పడింది, లోపల ఉన్న సీతాకోకచిలుక బయటకు రావడానికి తీవ్రంగా కష్టపడుతూ ఉంది.

గంటల తరబడి అది ఆ చిన్న రంధ్రం నుండి బయటపడటానికి పోరాడుతూనే ఉంది కానీ, అది ఎంత ప్రయత్నించినా రంధ్రం పెద్దగా అవ్వలేదు.

సీతాకోకచిలుక బయటకు రాలేకపోయింది, అది అలసిపోయి ఇక తన వల్ల కాదని ఆగిపోయినట్లు అనిపించింది.ఆ దృశ్యం చూసిన ఆ వ్యక్తికి జాలి వేసింది, పాపం అది ఎంత కష్టపడుతోందో అని అనుకొని తన జేబులోంచి ఒక చిన్న కత్తెర తీసి ఆ గూడును నెమ్మదిగా కత్తిరించాడు.

దాంతో సీతాకోకచిలుక ఎలాంటి కష్టం లేకుండా సులభంగా బయటకు వచ్చేసింది కానీ, బయటకు వచ్చిన ఆ సీతాకోకచిలుకను చూసి ఆ వ్యక్తి ఆశ్చర్యపోయాడు.

దాని శరీరం వాచిపోయి ఉంది, రెక్కలు ముడుచుకుపోయి చాలా చిన్నవిగా ఉన్నాయి.కాసేపట్లో దాని రెక్కలు విచ్చుకుంటాయి, శరీరం గట్టిపడుతుంది, అది అందంగా ఎగురుతుంది అని ఆ వ్యక్తి ఎదురుచూశాడు కానీ అది జరగలేదు.

ఆ సీతాకోకచిలుక తన జీవితాంతం వాచిన శరీరంతో ముడుచుకుపోయిన రెక్కలతో నేలమీద పాకుతూనే ఉండిపోయింది, అది ఎప్పటికీ ఎగరలేకపోయింది.

*ఆ వ్యక్తికి తెలియని విషయం ఏంటంటే ఆ గూడు నుండి బయటకు రావడానికి చేసే పోరాటమే సీతాకోకచిలుకకు అవసరం*.

ఆ చిన్న రంధ్రం గుండా కష్టపడి బయటకు వచ్చే క్రమంలోనే దాని శరీరంలోని ద్రవాలు రెక్కల్లోకి ప్రవహించి రెక్కలు దృఢంగా మారుతాయి, ఆ కష్టమే దానిని ఎగరగలిగేలా తయారుచేస్తుంది.

దేవుడు సృష్టించిన ప్రకృతి నియమం అది, సులభంగా బయటకు తీయడం ద్వారా ఆ వ్యక్తి దాని పోరాటాన్ని అడ్డుకున్నాడు తద్వారా దాని ఎగరే శక్తిని శాశ్వతంగా చంపేశాడు.

జీవితంలో కూడా ఇదే సూత్రం వర్తిస్తుంది, ప్రారంభంలో వచ్చే కష్టాలు అడ్డంకులు ఆర్థిక ఇబ్బందులు ఇవన్నీ ఆ గూడు లాంటివే.వాటిని ఎదుర్కొని స్వయంగా పరిష్కరించుకున్నప్పుడే ఒక మనిషిగా మీ సామర్థ్యం పెరుగుతుంది, మీ  రెక్కలు బలపడతాయి.

ఎవరైనా వచ్చి సులభంగా డబ్బు ఇచ్చేసినా లేదా కష్టపడకుండా విజయం దొరికినా అది ఆ సీతాకోకచిలుకలాంటిదే.బయటకి గొప్పగా అనిపించవచ్చు కానీ పోటీని తట్టుకుని ఎగిరే శక్తి ఆ మనిషికి ఉండదు. 

*సమస్యలు మన శత్రువులు కాదు, మనల్ని బలపరిచే మిత్రులు అని గుర్తుంచుకోండి*.

*సేకరణ- చంద్రశేఖర కోట*