*గండకి*
💦🫧
రచన : భాస్కర్
గండకి ఒక అందమైన యువతి. భక్తిపరురాలు. సంస్కారవంతురాలు. పెద్దలను గౌరవించడం, సాధుసన్యాసు లకు భిక్ష పెట్టడం. అతిథులను ఆదరించడం ఆమె నిత్యకృత్యాలు. ఇన్ని సుగుణాలున్న గండకి తల్లి ఒక వెలయాలు. ఆమె కడుపున పుట్టినందు వల్ల గండకి కూడా ఆ వృత్తినే స్వీకరించక తప్పని దుస్థితి. ఒకవేళ గండకి వేరే వృత్తిలో ఉదరపోషణ చేసుకుందామన్నా, ఆనాటి సమాజం అందుకు అంగీకరించేది కాదు. ఎవరు ఏ వృత్తిలో ఉంటే ఆ వృత్తి ని స్వీకరించక తప్పదు.
దాంతో గండకి తల్లి లాగే వేశ్యా వృత్తిలో గడపసాగింది. ఐతే అందరు వేశ్యల్లా కాకుండా, తన దగ్గరకు వచ్చిన విటుని తన భర్తగా, తాను అతని భార్యగా భావించుకుంటూ, అతనికి అన్ని విధాలైన సపర్యలూ చేస్తూ, అందరు గృహిణుల్లానే తాను కూడా పూజలు, వ్రతాలు చేస్తూ ఉండేది. ఇదంతా చూసేవారు ఆమెవి విపరీతమైన చర్యలుగా భావిస్తూ, ఆమెను చులకనగా చూస్తూ, చాటుగా నవ్వుకునేవారు. ఐతే ఎవరెన్ని విధాలుగా పరిహాసం చేసినా, గండకి తన ధోరణి మార్చుకోలేదు.
ఇలా ఉండగా, ఓ సాయంత్రం వేళ, గండకి వాకిటి వద్దకు సుందరాకారుడైన ఓ యువకుడొచ్చి నిలబడ్డాడు. అతన్ని సాదరంగా ఇంటిలోకి ఆహ్వానించింది. పని మీద ఏదో ఊరికి వెళ్ళి, ఆలసటతో ఇల్లు చేరిన భర్తకు చేసినట్లు సపర్యలు చేసింది. ఆ యువకుడు ఆమెకు బంగారు నగలు, వజ్రవైడూర్యాలు బహూకరించా డు. ఐతే, ఆ రాత్రికి ఆమెతో లేడతను. కనీసం ఆమె ముఖాన్ని కూడా దగ్గరగా చూడలేదు. చివాల్న లేచి ఎటో వెళ్ళిపోయాడు.
దాంతో గండకి మనసు చివుక్కుమంది. తెలిసీ తెలియక అతనికి తానేమయినా అపరాధం చేశానేమోనని బాధపడుతూ నిద్రపోకుండా అలాగే ఉండిపోయింది. ఇంతలో అతను తిరిగి వచ్చాడు. సంతోషంతో ఆమె అతని వద్దకు చేరబోగా, అతని ఒళ్ళంతా చెమటతో తడిసి ముద్దయి ఉంది. దాంతో అతన్ని స్నానం చేసి రమ్మంటూ అతని దుస్తులు తీసిన గండకి అతని వంటిని చూసి నిర్ఘాంతపోయింది. కారణం అతను కుష్ఠు వ్యాధిగ్రస్థుడు కావడమే! అతని ఒళ్ళంతా రసికారుతున్న పుళ్ళు. ఐనా సరే, అసహ్యించుకోకుండా అతనికి సపర్యలు చేస్తూ ఉండిపోయింది. అలా రాత్రి గడిచిపోయింది. ఇద్దరూ తమకు తెలియకుండానే నిద్రలోకి జారుకున్నారు.
తెల్లవారి లేచిన గండకి తన నిత్య కృత్యాలు ముగించుకుని, అతన్ని లేపడానికి ప్రయత్నించింది. అతను విగతజీపుడై కనిపించాడు. ఆమె పెద్ద పెట్టున రోదిస్తూ ఉండడంతో చుట్టుపక్క ల వారంతా వచ్చి ఎవరికి తోచిన సాంత్వన వచనాలు వారు చెప్పడం మొదలుపెట్టారు. దుఃఖసాగరంలో మునిగిపోయిన గండకి అవేవీ చెవిన వేసుకోలేదు. ఆ యువకుని శవం ముందు ముకుళిత హస్తాలతో కూర్చుండిపోయి, సహగమనం చేయడానికి సిద్ధపడింది. ఎవరెంతగా చెప్పినా వినలేదు.
సరే, చేసేదేమీ లేదు. జరిగేది జరగక మానదు అని గ్రామస్థులు వారి చితికి నిప్పంటించబోయారు. అప్పుడే ఓ అద్భుతం జరిగింది. అప్పటిదాకా విగతజీవుడై పడి ఉన్న ఆ యువకుడు శంఖ చక్ర గదాయుధాలు ధరించి, చతుర్భుజుడైన విష్ణుమూర్తిలా దర్శనమిచ్చాడు.
పంకిలమైన వేశ్యావృత్తిలో ఉన్నప్పటికీ, మానసికంగా పవిత్రమైన గృహస్థధర్మాన్ని అనుసరించిన గండకి పట్ల భగవంతుడు శ్రీమన్నారాయణుడికి అమితమైన వాత్సల్యం కలిగింది. ఆమెని కరుణించిన స్వామి, విపత్కర పరిస్థితుల్లో ఆమె ఏమి చేస్తుందో చూడాలన్న కోరికతో పెట్టిన పరీక్షలో నెగ్గింది గండకి. ఆమెను మూడు వరాలు కోరుకోమన్నాడు స్వామి.
అందుకు గండకి అంగీకరించలేదు. “నా ధర్మాన్ని నేను నెరవేర్చినందుకు నాకు వరాలెందుకు స్వామీ!” అంది.
శ్రీమహావిష్ణువు ఆమెను ఎంతో బలవంత పెట్టిన మీదట తాను ఎల్లప్పుడూ స్వామి వారి చరణ సన్నిధిలో ఉండిపోవాలన్న ఒకే ఒక్క వరం కోరుకుంది.
అప్పుడు విష్ణుమూర్తి రానున్న కాలంలో ఒక పతివ్రత శాపకారణాన తాను సాలగ్రామ కొండగా మారుతానని, కొండ పాదాల చెంత గండకీ నదిగా ఉండి, నిత్యం తననే సేవించుకుంటూ ఉండిపో తావని వరమిచ్చాడు. గండకి ఆనంద పారవశ్యంతో విష్ణుమూర్తి పాదాలకు ప్రణమిల్లింది. పరమపవిత్రమైన గండకీ నదిలో స్నానం చేసిన వారికి సకల పాపాలూ తొలగిపోతాయనీ, తనను స్మరిస్తూ, నిశ్చలమైన భక్తివిశ్వాసాలతో నదిలో స్నానం చేసిన వారి వ్యాధులను స్వయంగా తానే నిర్మూలిస్తానని వరమిచ్చాడు విష్ణువు.
తామరపూవు తాను బురదలో ఉన్నానని బాధపడదెప్పుడూ! స్వామిని సేవించుకు నేందుకు తనకు అవకాశమెప్పుడెప్పుడు వస్తుందా అని వేచి చూస్తుంటుంది!
(ఆ గండకి నదే ఇప్పుడు నేపాల్ లో ప్రవహిస్తున్న గండకీ నది. ఈ నదికి ఒక ప్రత్యేకత ఉంది. కొండల మధ్య నుండి అనేక ఒంపులతో ప్రవహిస్తూ సాలగ్రామ శిలలను తనలో కలుపుకుని వాటిని శుద్ధి చేస్తుంది. ఈ క్రమంలో తన ఉనికిని చాటుకోవటానికి తన నీటి రంగుని నల్లగా మార్చుకుని ప్రవహిస్తుంది గండకి.
దివ్యమంగళ స్వరూపాలైన అనేక దేవీ దేవతా విగ్రహాలు ఈ గండకీ నదిలో దొరికే
సాలగ్రామ శిలలతోనే తమ స్వరూపాన్ని మార్చుకున్నాయి. మనల్ని పూనీతుల్ని చేస్తున్నాయి - హరికృష్ణ)
🌊
*సమాప్తం*
꧁☆•┉┅━•••❀❀•••━┅┉•☆
No comments:
Post a Comment