🪷🙏🏻🪷🙏🏻🪷

              

*శ్రీ గురుభ్యోనమః*

                      

*బాధ  -  నీతి*

*ప్రశ్న :  మనమంతా  విముక్తులమే,  మనకే  బంధమూ  లేదు,  మనం  భగవంతుని  నుండి  నిప్పు  కణాల  వలె  వచ్చాం.  తిరిగి  ఆయననే  చేరుతామంటారు  శ్రీ శంకరాచార్యులు.  అట్లా  అయితే,  అన్ని  రకాల  పాపాలనూ  ఎందుకు  చేయకూడదు ?*

*జవాబు :*  మనకి,  ఆత్మకీ  బంధంలేని  మాట  నిజమే !  చివరికి,  నీ  మూలంలో  నీవు  చేరుతావన్నదీ  నిజమే !  ఈ లోగా  నీవనే  పాపకార్యాలు  చేస్తే  వాటి  ఫలితాన్ని  అనుభవించాల్సిందే,  దానిని  తప్ఫించుకోలేవు.  ఎవరైనా  వచ్చి  నిన్ను  బాదుతూంటే ..  "నేను  విముక్తుడ్ని,  ఈ దెబ్బల  వల్ల  నాకే  బంధమూ  లేదు,  నాకే  బాధా  లేదు,  వాడు  కొట్టితే  కొట్టనీ"  అనగలవా ?  అట్లా  నిజంగానే  నీకనిపిస్తే  నీ ఇష్టం  వచ్చినట్టు  నీవు  చేయవచ్చు.  "నేను  విముక్తుడ్ని"  అని  పెదవులతో  అనటంలో  అర్థమేమిటి ?

*ప్రశ్న :  ప్రపంచమంతా  ఈశ్వరుని  లీల  అని,  అంతా  బ్రహ్మమయమనీ  అంటారు.  అటువంటప్పుడు  దురభ్యాసాలని  విడనాడాలని  ఎందుకంటారు ?*

*జవాబు :*  మనిషి  శరీరంలో  ఒక  పుండుందనుకో,  శరీరంలో  కొంచెం  భాగమే  నంటూ  నిర్లక్ష్యం  చేస్తే  అది  శరీరానికంతా  నొప్పిని  కలిగిస్తుంది.  మామూలు  వైద్యంతో  నయం  కాకపోతే,  డాక్టరు  వచ్చి  కత్తితో  దానిని  కోసివేసి  ఆ మాలిన్యాన్ని  తీసివేయ  వలసి  వస్తుంది.  ఆ భాగాన్ని  తీసివేయకపోతే  కుళ్ళుతుంది.  తీసివేసిన  తరువాత  సరిగ్గా  కట్టు  కట్టకపోతే,  చీము  పడుతుంది.  ప్రవర్తన  విషయమూ  అంతే !  దురభ్యాసాలు,  దురలవాట్లూ  దేహంలో  కురుపువంటివే !  ప్రతి  రోగానికీ  తగిన  వైద్యాన్నివ్వాలి.

             *"నీ సహజస్థితిలో  ఉండు"*

      *భగవాన్ శ్రీ రమణమహర్షి బోధనలు*

                       

🪷🙏🏻🪷🙏🏻🪷