విజేతల గొంతు 

బలంగా గర్వంగా అతిశయంగా  ఉంటుంది

వాళ్ల కథలు 

వినిపించడానికీ రాయడానికీ 

కవులూ కథకులూ బారులు తీరి ఉంటారు

గాయకులు వందిమాగదులు

బాజా భజంత్రీలు సర్వదా విజేతల వెంట సిద్ధం

పరాజితుల గొంతు 

బలహీనంగా ఉంటుంది

దుఃఖంతో పెనుగులాడుతూ ఉంటుంది

వాళ్ళ కథలు 

ఎవ్వరూ రాయరు 

వాళ్లే రాసుకోవాలి మరి

అమిష్ త్రిపాఠి కి 

పూర్తిగా భిన్నమైన రచయిత

ఆనంద నీలకంఠ 

ఇతిహాసాలను 

పరాజితుల కోణం నుంచి 

వ్యాఖ్యానించాడాయన

***********

యుద్ధభూమిలో 

నిస్సహాయుడై పడి ఉండి

ఎలుకలు తన కండరాలను నమ్ములుతుండగా ...

మృత్యువు తన దేహం పై పురుగులా పారాడుతుండగా ....

రావణుని నోట తన కథను 

'అసురుడు' గా చెప్పించాడాయన

రామాయణం కొత్త కాదు మనకు 

రావణుని నోట వినటమే కొత్త. 

అహంకారం గర్వం 

సమస్త దుర్గుణాలు మూర్తీభవించిన దుర్యోధనుడు ....

అని లోకమంతా భావించే 

సుయోధనుని అంతరంగాన్ని

 'అజేయుడు' గా 'కలియుగారంభం' గా ఆవిష్కరించాడాయన 

మహాభారతం 

కొత్త కాదు మనకు 

పంచమ వేదాన్ని పరాజితుల ఇతిహాసంగా వినటమే కొత్త

********

వాల్మీకి అయినా 

వేద వ్యాసుడే అయినా

 

మచ్చ లేనివారీగా 

చిత్రించలేదు తమ కథా నాయకులను

మూర్తిభవించిన దుర్మార్గులుగా 

పోత పోయలేదు తమ ప్రతి నాయకులను 

మానవ మాతృలుగానే

సకల మానసిక వికారాలచే

పీడింపబడే వారిగానే చిత్రించారు ఇరువురిని 

వారి చేతిలో 

ఆయా పాత్రలు ఆట బొమ్మలు మాత్రమే ...

ఆ యుగపు ధర్మమే 

అసలైన కథానాయకుడు 

రామాయణ మహాభారత ఇతిహాసాలలో

***********

ఆధునిక 

యుగ ధర్మపు వెలుగులో ...

ప్రాచీన 

యుగ ధర్మానికి 

ఆకరాలైన రామాయణ మహా భారతాలను 

పరాజితుల 

దృష్టి కోణంలో నుంచి

వ్యాఖ్యానించటమే .....

అదీ....

అత్యంత సహజంగానూ 

వాస్తవికంగానూ తార్కికంగా నూ

వ్యాఖ్యానించడమే...

ఆనంద నీలకంఠ చేసిన పని 

- రత్నాజేయ్ (పెద్దాపురం)