ఎందుకూ చదవడం ?

అసలేమొస్తుంది చదవడం వల్లా ?

చాలా చాలా తరుచుగా 

ఎదురయ్యే ప్రశ్నలివి 

*******

ఎదుటి వ్యక్తిని

మనం నివసిస్తున్న సమాజాన్నీ 

సహానుభూతితో అర్థం చేసుకోవడం కోసం 

మనని మనమే

నిశితంగా విమర్శించుకోవడం కోసం

మనని మనమే పుటం పెట్టుకోవడం కోసమూ 

చదవాలి ...

చదివి తీరాలి మనం 

**********

చదివే ...

ఈ లక్షణమే అలవడకుంటే 

అచ్చం కూపస్థ మండూకంలా 

కొనసాగుతుంది మన ఆలోచనా ధోరణి 

మన అనుభవాలే సత్యమనీ 

వాటి నుండి పుట్టిన అభిప్రాయాలే నిత్యమనీ 

మన నమ్మకాలూ విశ్వాసాలే అచంచలమనే 

మూఢత్వం మూర్ఖత్వం అజ్ఞానం ఉన్మాదం నిలువెల్లా ఆవేసిస్తాయి మనని

*********

ఒక్కసారి 

చదవడం మొదలిడగానే 

కాస్తంతైనా 

అర్థం చేసుకోవడం ఆరంభించగానే 

సానుభూతీ సానుభూతి 

వివేకం విచక్షణా సంయమనంతో 

చదవడం కొనసాగించే కొద్దీ ...

కరిగిపోవడం మొదలౌతుంది 

ఈ దట్టమైన అజ్ఞానమనే అంధకారం

సమసిపోవడం 

వేగం పుంజుకుంటుంది 

ఉద్రేకం ఉన్మాదం రాక్షసత్వం

********

మనిషి చేసిన 

అత్యద్భుతమైన ఆవిష్కరణలు 

ఏవీ .... ? అంటే 

నిస్సందేహంగా 

భాషా లిపీ మాత్రమే.....

మరి మనిషి చేయగలిగిన 

అత్యుత్తమమైన మానసిక చర్య 

ఏదీ ? అంటే...

నిర్ద్వంద్వంగా 

హేతుబద్ధంగా విమర్శనాత్మకంగా చదవడమే 

- రత్నాజేయ్ (పెద్దాపురం)