_*💫 అరుణాచల..*_

         _*దివ్యదృశ్యాలు !? ⚜️*_

➖➖➖➖➖➖✍️

*_-శ్రీరమణాశ్రమ లేఖలు_*

*_-శ్రీరమణ స్మృతులు_* 

®®®®®®®®®®®®®®

*_⚡ఈ మధ్యాహ్నం రెండింటికే భగవాన్ శ్రీరమణుల సన్నిధికి వెళ్ళాను. అట్టే జనం లేరు. సేవకులూ, చొరవగల భక్తులు కొందరూ ఉన్నారంతే. భగవాన్ వారితో యిష్టాగోష్ఠిగా మాట్లాడుతూ ఉన్నారు._* 

*_ఆ ప్రసంగవశంగా ఒక భక్తుడు శ్రీవారినుద్దేశించి "ఈ కొండమీద పెద్దపెద్ద దేవాలయాలూ, తోటలూ మొదలైనవి కనుపించినట్లు భగవాన్ ఒకసారి సెలవిచ్చారే. అదంతా భగవాన్ కొండమీద ఉండగానేనా ?" అన్నాడు._*

*_“అవును. విరూపాక్షగుహలో ఉండగానో ఏమో. కళ్లు మూసుకొని ఉన్నాను. కొండమీదుగానే అలా ఈశాన్యం వైపున పోతూవుంటే ఒకచోటమంచి పూలతోట, పెద్ద దేవాలయం, చక్కని ప్రహరి, ఆ ప్రహరిలోపల పెద్ద నంది, అన్నీ కనుపించినవి. విలక్షణమైన వెలుతురు. ఎంతో చక్కగా ఉంది. చూస్తూ ఉండగానే పూజాకాలమయింది. గంటకొట్టారు._* 

*_వెంటనే కళ్ళు తెరిచాను” అన్నారు భగవాన్._*

*_"ఒక పెద్ద గుహ వున్నట్లూ భగవానెప్పుడోచెప్పారు కదా ?" అన్నారా భక్తులు. “అవునవును. అదీ కొండమీద ఉండగానే. అలా అలా పోతూండగా ఒకచోట పెద్దగుహ కనపడింది. ఆ గుహలో ప్రవేశించి చూతును కదా - అనేక జలధారలూ, రమ్యమైన తోటలూ, ఆ తోటల మధ్యన కోనేళ్ళూ, తీర్చిన బాటలూ, చక్కని వెలుతురూ ఎంతో వింతగా ఉంది. పోగా పోగా ఒక వనంలోని సరోవరం ఒడ్డున, ఒక వృక్షంకింద సిద్ధపురుషుడు, దక్షిణామూర్తి వలె ఆసీనుడై ఉన్నాడు. వారిచుట్టూ చాలామంది మునులు కూర్చుని ఉన్నారు. వీరేదో అడుగుతున్నారు. వారేదో చెపుతున్నారు. ఆ స్థలమంతా నాకు చిరపరిచితం వలెనే ఉంది. అంతే. కళ్ళు తెఱిచాను. ఆతరువాత కొన్నాళ్ళకు సంస్కృతంలో వున్న అరుణాచల పురాణం చూస్తే ఈశ్వరవాక్కుగా చెప్పబడిన >_*

*_శ్లో॥ అత్రసిద్ధః పునర్నిత్యం వసామ్యగ్రే సురార్చితః మమాంతరే గుహా దివ్యా ధ్యాతవ్యా భోగసంయుతాః॥_*

*_శ్లో॥ అగ్నిస్తంభ మయం రూప మరుణాద్రి రితి శ్రుతః | ధ్యాయన్ లింగం మమ, బృహన్మదం, కుర్యాత్ ప్రదక్షిణం ||" -(అరుణాచల మాహాత్మ్యం - పూర్వార్థం-9-అ)._*

*_ఈ శ్లోకాలు రెండూ కంటబడినవి. ఈ రెండింటిలోనూ ఆ గుహను గుఱించీ, సిద్ధపురుషుని గుఱించీ చెప్పబడి ఉన్నందువల్ల, అరే ! మనకు తోచిందే ఈ శ్లోకాలలో చెప్పివుందే అని ఆశ్చర్యం కలిగి, అప్పుడే దానికి అనువాదంగా అరవంలో 'అంగియురు వాయు మొళి మంగు గిరియాహ' అన్న పద్యం రాశాను._* 

*_తాత్పర్యం ఏమంటే 'అగ్ని (జ్యోతి) స్వరూపుడనయ్యు ప్రకాశమును మఱుగుపరచి, గిరిగా నుండుట లోకముననుగ్రహించుటకే. ఇక్కడ సిద్ధరూపమున సదా నివసింతును. నాలో పొంగి (వెల్లి విరిసి) వెలుగు గుహ, బహుభోగ సమన్వితమై యుండుట నీలో నెరుంగుము' అని భావం._*

*_అందుకు అనుగుణ్యంగా ఆ మధ్య అడి అణ్ణామల దేవాలయానికి జీర్ణోద్ధారణ జరిగినప్పుడు, గర్భగుడికి లోవరుసన పెద్ద సొరంగం కనుపించిందని, ఆ సొరంగం ఎక్కడిదాక ఉందో చూద్దామని కొందరు అందు ప్రవేశించి చూచి, అది అరుణాచల అంతగర్భాగానికి పోయిందని తెలుసుకొని ముందుకు పోలేక తిరిగి వచ్చారనీ తెలిసింది._* 

*_ఓహో ! మనకు తోచిందీ, పురాణంలో చెప్పిందీ నిజమే సుమా. ఇదే ఆ గుహామార్గమని అనుకున్నాను. ఆ గుహలో నుంచి సిద్ధపురుషులు రాత్రికి రాత్రి వచ్చి ఈశ్వరుని సేవించి వెడుతూ ఉంటారనీ ప్రతీతి. అంతవరకెందుకు. ఈమధ్య ఇక్కడే అటువంటివి గోచరించినవి. కొండకు వెడదామని వెడుతూ ఉంటే, అదుగో ఆ మెట్లు దిగేసరికి అదొక రాజధానివలె పెద్ద పెద్ద మేడలూ, తీర్చినట్లున్న రాజమార్గాలూ, మంచి వెలుతురూ, అంతా ఒక పట్టణ ప్రదేశంవలెనే ఉంది._* 

*_ఒక చోట మీటింగు జరుగుతూ ఉంది. చాడ్విక్ కూడానే ఉన్నాడు. అతను 'భగవాన్ ! ఇదంతా ఇంత ప్రత్యక్షంగా ఉంది కదా. దీన్ని స్వప్నమంటే ఎవరు నమ్మగలరు ?' అని అడుగుతాడు పైగా అంతా అప్పుడు జరుగుతున్నట్లే ఉంది. ఇంతలో కళ్ళు తెఱిచాను” అని సెలవిచ్చారు భగవాన్. “ఇదంతా నిజంగా స్వప్నమేనా ?” అన్నారొక భక్తులు._* 

*_“ఏమో, స్వప్నమో ఏదో. ఏది నిజం ?" అని సెలవిచ్చి మౌనం వహించారు భగవాన్._* 

               *_-(సూరి నాగమ్మ)._*

*_🪷 రేపటి తరానికి బతుకు, భద్రతలతోపాటు భారతీయత కూడా నేర్పండి ప్లీజ్..._*

🙏🇮🇳🎊🪴🦚🐍🔱⚜️