@ నిర్వాణం @

ఓటమీ

గెలుపూ 

బతుకు 

పయనంలో 

మజిలీలు మాత్రమే 

విజయం అంటే 

ఆగక సాగే పయనం మాత్రమే 

******

పూలూ ఉంటై 

పదునైన ముళ్ళూ ఉంటై 

జననం 

మొదలూ ....

అంతిమ శ్వాస వరకూ

భయపడి 

ఉన్నచోటనే నిలచిపోవడమే 

పరాజయమంటే 

*******

ప్రశంసలూ 

సుమాలై కురుస్తు ఉంటై 

కరుకు 

రాళ్ళై విమర్శలూ 

మనసును తాకుతునే ఉంటై 

తడబడి పొరబడి 

శిరస్సు వంచేయడమే 

లొంగిపోవడమంటే

*****

నిరాశలూ 

నిస్ఫృహలూ 

వడగాలులై సోలిపోజేస్తై 

అహమూ 

కామమూ స్వార్థమూ 

విష వాయువులై స్పృహను హరించేస్తై 

అరిషడ్వర్గాల 

ఉచ్చుల పాశాలకు చిక్కడమే 

జీవచ్ఛవమైపోవడమంటే

*******

మరి ...

ఏదో తెలుసా

నీ అంతిమ గమ్యం 

నువ్వు 

చేరుకోవాలని

ఆరాటపడే లక్ష్యం

విముక్తీ 

జీవన్ముక్తీ

అది చిదానందమే

- రత్నాజేయ్ (పెద్దాపురం)