*_గదిలో బొమ్మ.._*

*_మదిలో నాన్నఅమ్మ..!_*

_______________________

        *పేరెంట్స్ డే..*

అమ్మ..నాన్న..

జగతిన ఇంతకంటే అందమైన పదాలున్నాయా..

ఆ ఇద్దరినీ మించిన దేవుళ్ళున్నారా..!

నీ తొలి అడుగులు 

నీకు తెలియవు..

కాని వాటికి మడుగులొత్తిన

అమ్మకి..నాన్నకి

అవి  జీవితకాలపు

మధురానుభూతులు..!

అమ్మా నీకేం తెలియదు..ఊరుకో..

ఇప్పుడెంత సులువుగా అనేస్తున్నావో..

నువ్వు మొదటి పలుకులు

నేర్చింది ఆ ఆమ్మ ఒడిలోనే..

తొలి అక్షరాలు దిద్దింది

ఆ తల్లి బడిలోనే..

నీ అంత చదవకపోయినా 

అమ్మ జ్ఞానసరస్వతి..

విజ్ఞాన విశ్వవిద్యాలయం..!

నాన్న చెయ్యి పట్టి

బడికి వెళ్లిన రోజు

సువిశాల ప్రపంచం వైపు

నువ్వు వేసిన తొలి అడుగు..

అప్పుడు నాన్న

అందించిన ఆ చేయి

నీ జీవితానికి 

అదెంత ఆసరా..

నీ చుట్టూ 

పగలూ రేయి

ఆ తండ్రి పహారా..

నీ జీవితకాలపు సహారా..!

నీ ప్రతి మలుపు

నాన్నకు గెలుపు..

ఆయన కష్టానికి ప్రతిఫలం..

ఆయన స్వేదాన్ని మరిచే

అద్భుత ఆస్వాదన..

నీ కోసం ఒళ్ళు మరిచి

మరింత సాధన..!!

ఎవరు ఎక్కువ..

ఎవరు తక్కువని ఎంచకు..

నీ విశ్వాసాన్ని 

ఎక్కువ తక్కువగా పంచకు..

నువ్వు ఆ ఇద్దరి 

ఉమ్మడి ఆస్తి

నీ ఉన్నతి 

ఆ ఇద్దరు పడిన కష్టం..

అది వారికెంత ఇష్టం..

ఇంతగా నీ కోసం పరితపించిన అమ్మానాన్నల్ని

మరచిపోయే..

వారి ప్రేమను గుర్తించని

నీ అహం.. 

దేశద్రోహాన్ని మించిన పాపం..

జీవితంలో నువ్వు చేసే

అతి పెద్ద నేరం..!

నిజానికి అమ్మకి..నాన్నకి 

ఓ రోజేంటి..

ప్రతి రోజు...అనుక్షణం...

పూజించాల్సిన దేవుళ్ళు..

అయితే ఈరోజు ప్రత్యేకం..

నీ బిజీలో

మర్చిపోతావని కాదు..

నీ మదిలో వారి స్థానం సుస్థిరం కావాలని..

నువ్వు పూజించి మరింతమందికి

అమ్మానాన్నల విలువ

తెలియజెబుతావని..

కొలుస్తూనే ఉండాలని

అమ్మానాన్నలనే దేవుళ్ళను 

సదా...ఈ అవని..!

       *_సురేష్ ఎలిశెట్టి_*

           9948546286

           7995666286