_*సదాశివాష్టకమ్*_

🕉🕉🕉🕉🕉🕉🕉🕉🕉

శీర్షజటాగణభారం గరళాహారం సమస్తసంహారమ్ | 

కైలాసాద్రివిహారం పారం భవవారిధేరహం వన్దే ||౧|| 

చన్ద్రకలోజ్జ్వలభాలం కణ్ఠవ్యాలం జగత్రయీపాలమ్ | 

కృతనరమస్తకమాలం కాలం కాలస్య కోమలం వన్దే ||౨|| 

కోపేక్షణహతకామం స్వాత్మారామం నగేన్ద్రజావామమ్ | 

సంసృతిశోకవిరామం శ్యామం కణ్ఠేన కారణం వన్దే ||౩|| 

కటితటవిలసితనాగం ఖణ్డితయాగం మహాద్భుతత్యాగమ్ | 

విగతవిషయరసరాగం భాగం యజ్ఞేషు బిభ్రతం వన్దే ||౪|| 

త్రిపురాదికదనుజాన్తం గిరిజాకాన్తం సదైవ సంశాన్తమ్ | 

లీలావిజితకృతాన్తం భాన్తం స్వాన్తేషు దేహినాం వన్దే ||౫|| 

సురసరిదాప్లుతకేశం త్రిదశకులేశం హృదాలయావేశమ్ | 

విగతాశేషక్లేశం దేశం సర్వేష్టసంపదాం వన్దే ||౬|| 

కరతలకలితపినాకం విగతజరాకం సుకర్మణాం పాకమ్ | 

పరపదవీతవరాకం నాకఙ్గమపూగవన్దితం వన్దే ||౭||

భూతివిభూషితకాయం దుస్తరమాయం వివర్జితాపాయమ్ | 

ప్రమథసమూహసహాయం సాయంప్రాతర్నిరన్తరం వన్దే ||౮|| 

యస్తు పదాష్టకమేతద్బ్రహ్మానన్దేన నిర్మితం నిత్యమ్ | 

పఠతి సమాహితచేతాః ప్రాప్నోత్యన్తే స శైవమేవ పదమ్ ||౯|| 

ఇతి శ్రీమత్పరమహంసస్వామిబ్రహ్మానన్దవిరచితం సదాశివాష్టకం సంపూర్ణమ్ ||.