🪷జ్ఞాన ప్రసూనాలు🪷

 🪷జ్ఞాన ప్రసూనాలు🪷

* * *

ఉపనిషద్దార్శినికులు సాధన గురించి, నైతికత గురించి ఎప్పుడూ మాట్లాడలేదు...

యూజీ కృష్ణమూర్తి అంటారు-

ఈ "స్థితి"లోకి అడుగు పెట్టడానికి ఈ నీతిమంతులకు ఎంత అవకాశం ఉందో, అవినీతిమంతులకు కూడా అంతే అవకాశం ఉంది. లేదా ఇంకొంచెం ఎక్కువ అవకాశం ఉన్నా ఆశ్చర్యం లేదు.

* * *

నైతికతకు, ఆధ్యాత్మికతకు సంబంధం లేదు.

దారిదోపిడీ దొంగ కూడా ఆత్మసాక్షాత్కారం పొందవచ్చు.

గొప్ప నీతిమంతుడు అన్నవాడు పొందకపోవచ్చు.

* * *

"ధర్మాన్ని పాటించడం అనేది సమాజపరంగా, సమాజానికి విలువైనది. కానీ దీనికి దానితో పని లేదు. 

ఒక మోసగాడికి కూడా ఇది సంభవించగలదు అని చెప్పేటంత దూరం నేనెందుకు వెడుతున్నానంటే ఇది నాకొక్కడికే కాదు, ఎవరికైనా జరగొచ్చు అని నొక్కి చెప్పడానికే..." అంటారు యూజీ.

నైతిక విలువలతో దీనికి ఏ విధమైన సంబంధం లేదు. దీని అర్థం- జ్ఞాని అనైతికుడు అని కాదు; అనైతికుడు కాలేడు. 

జ్ఞాని తప్పటడుగు వేయడు....అంటారు పరమహంస.

"నా గురువు సారా దుకాణం వెళ్లినా సరే, నా గురువు పరబ్రహ్మస్వరూపుడే..." అంటారు పరమహంస.

* * *

అక్కణ్ణుంచి ఇక్కడకు వచ్చినవాడు చెప్పిన మార్గం

ఇక్కణ్ణుంచి అక్కడకు వెళ్లాలనేవానికి పనికిరాదు.

పనికొస్తుందేమోనని చేసిన ప్రయత్నంలో ఇన్ని ఆశ్రమాలు, ఇన్ని సిద్ధాంతాలు, ఇంతమంది గురువులు, స్వాములు, ప్రవచనకర్తలు తయారవ్వడానికి కారణమయ్యింది....

ఆదర్శాలను బోధించేవాళ్లంతా ఆధ్యాత్మికులని పొరబడుతున్నారు.

ఆధ్యాత్మికం పేరుతో వీరు బోధించేదంతా కేవలం నీతిని మాత్రమే. 

నీతి సూత్రాలను ఆధ్యాత్మిక సూత్రాలుగా భ్రమపడుతున్నారు.

ఆ సూత్రాలు ఆత్మను పొందటానికి మార్గాలు కావు.

నీతి అనేది మార్గం కాదు.

దానికి అసలు మార్గమే లేదు. 

ఆదర్శం మార్గాన్ని చూపిస్తుంది.

ఆధ్యాత్మికం మార్గాన్ని చెరిపేస్తుంది.

ఆదర్శం నీవెలా ఉండాలో చెబుతుంది.

ఆధ్యాత్మికం నీవెలా ఉన్నావో చెబుతుంది.

నైతికం మార్గం కాదు...

ఆధ్యాత్మికం ఆదర్శం కాదు...

* * *

ఎలా పొందుతామో

ఎందుకు పొందుతామో

ఎవరు పొందుతారో

అనేదానికి ఇప్పటివరకూ కచ్చితమైన సూత్రాలు లేవు...

"ఆత్మే ఎన్నుకుంటుంది" అంటుంది కఠోపనిషత్తు.

ఎవర్ని ఎన్నుకుంటుంది? అనే దానికి సమాధానం లేదు.

పొందటం ఉంది....పొందినవాడు ఉండడు...

అంటారు సద్గురుదేవులు.

మరి అలాంటి దానిని పొందితే ఏమి? పొందకుంటే ఏమి?

అన్న నిశ్చయంతో ఊరక ఉంటే ఏమి?

* * *

అయితే నియమనిష్ఠలు ఏమీ వద్దంటారా? అని గురువుగారిని అడిగితే,

"నియమనిష్ఠల వలన ఏదో దొరుకుతుంది అన్న అభిప్రాయంలో ఉండి, నియమనిష్ఠలను కలిగి ఉండడం దోషం. 'అది' ఒక దానితో రాదు, ఒకదానితో పోదు. అని ఎఱిగి నియమనిష్ఠలను కలిగి ఉండొచ్చు" 'అన్నారు.

* * *

నిజమైన ఆధ్యాత్మికానికి ఏ ప్రోగ్రాం ఉండదు.

అని చెప్పడమే మా అత్యాశ్రమ ప్రోగ్రాం.

* * *

జ్ఞానశిశువు