ఓర్పు

 X8. i. 2-4.3️⃣. 061022-8.

🍀🌺🍀🌺🍀🌺🍀🌺🍀🌺🍀

                      ఓర్పు

                  ➖➖➖✍️

కొద్దిగంటలు వేచిఉంటే, జీవితకాలం నిరీక్షించినట్లు అనిపిస్తుంది చాలామందికి.

ఒక కొత్త శిశువును చూడాలంటే తొమ్మిది నెలలు ఆగాలి.

కొన్ని రకాల కాయల కోసం ఆ చెట్లను పెంచి, వృద్ధిచేసి, కాపుదశ రప్పించడానికి కొన్ని సంవత్సరాలు పడుతుంది...

అవధుల్లేని ఓర్పుతో ఎన్నో పనులూ సాధ్యమవుతాయి...

ఓర్పులేని మనిషి మనిషే కాడు.. అజ్ఞానం వల్ల సహనం కోల్పోయి, తన స్థితిని మరింతగా దిగజార్చుకుంటాడు మనిషి.. అందరూ పారిపోయేచోట ధీరుడు నిలబడతాడు.. అతడి జెండా ఓర్పు.. సహనంతో ఉండగలిగితే అన్ని పనులూ ఒకటొకటిగా సానుకూలమవుతాయి...

రాత్రి చీకటిలో గడిపితేనే సూర్యోదయం చూడగలం.! మనసులో ఆలోచనలు లేస్తాయి..  ఉన్నచోటున ఉండనివ్వవు...

రాయిలాంటి స్థిరమైన మనిషినీ కదపాలని చూస్తాయి.. కదలకూడదు...

సహనమే మనిషిని రుషిని చేస్తుంది. సహనం కలిగినవాణ్ని చూసి ఎంతటివారైనా భయపడతారు.. సహనం మనిషిని చరిత్రలో నిలబెడుతుంది..  సహనమే సత్యాన్ని చూపిస్తుంది...

సహనంలేని వ్యక్తి నాయకత్వం వహించలేడు.. సహనంలేని వ్యక్తి నాయకుణ్ని అనుసరించలేడు.. సహనంలేని వ్యక్తి కలిసి జీవించలేడు.. సహనంలేని వ్యక్తి ప్రకృతికి అనుకూలంగా బతకలేడు..

ఎదురుచూసి ఎదురుచూసి సంవత్సరాలు గడిచిపోయాయి.. ఓర్పు మహావృక్షమైంది.. కారడవిలో సహనమే ధైర్యంగా శబరి ఎదురుచూసింది.. ఆమె నిరీక్షణ ఫలించింది.. శ్రీరాముడొచ్చాడు.. జన్మజన్మల ఓర్పు విజయశిఖరం చేరుకుంది...

ఎదురు చూసేవాళ్లను నిరాశపరచడు భగవంతుడు.! పడవ నడిపే గుహుణ్ని.. రాయిగా పడి ఉన్న అహల్యను అనుగ్రహించాడు..

తపస్సుకే తమ జీవితాలను అంకితం చేసిన మహారుషుల కోసమే శ్రీరాముడు భూమ్మీద అవతరించాడు...

మేఘ జలం తప్ప మరే నీటినీ తాగని చాతకపక్షి కారుమబ్బు కోసం ఎదురుచూస్తుంది..

కోకిల రాకకోసం వసంతం వేచిఉంటుంది..

ఓర్పు మనకు హృదయానందాన్ని కలిగిస్తుంది...

ప్రయోగశాలల్లో శాస్త్రవేత్తల జీవితాలు గడిచిపోతాయి.. వారి సహనం, అంకితభావమే మానవాళికి ఎన్నో శుభాలను చేకూరుస్తుంది...

చుట్టూ పుట్టలు ఏర్పడి.. తపస్సులో సుదీర్ఘకాలం నిమగ్నమైన సాధారణ నరుడు వాల్మీకిగా అవతరించాడు...

మహాకావ్యాన్ని లోకానికి అందించాడు...

అన్ని సుగుణాలూ ఉండి.. సహనం ఒక్కటే లేకుంటే- లాభం లేదు...

ప్రతిభా పాటవాలు తక్కువైనా ఓర్పుతో నేర్పుతో ప్రవర్తించే వ్యక్తికి తిరుగుండదు...

సరైన సాంగత్యంలో నిజమైన ఓర్పు బయటపడుతుంది...

నిండు సభలో శ్రీకృష్ణుణ్ని నానా దుర్భాషలాడాడు శిశుపాలుడు...

విన్నవాళ్ల రక్తం మరిగిపోయినా.. శ్రీకృష్ణుడు తరగని చిరునవ్వుతో ఓర్చుకున్నాడు... అంతిమంగా ఏం జరిగిందో తెలిసిందే...

ఎదుగుతున్నకొద్దీ ఒదిగే గుణం ఓర్పుగా ఉంటే వస్తుంది...

ఒక చిన్న మొక్క వందల ఏళ్లు ఎదిగి చరిత్రకు సాక్ష్యంగా నిలిచే వృక్షంగా మారుతుంది...

ఓర్పు చరిత్రను తిరగరాస్తుంది...

ధర్మరాజు లాంటి మనిషి అంటారు.. దుర్యోధనుడి లాంటి మనిషి అనరు.

ఓపిక వహించు... అన్నీ సర్దుకుంటాయి అని మన పెద్దలు ఎన్నోసార్లు చెబుతుంటారు...

ఓపిగ్గా మనం నిరీక్షించలేకపోవడానికి కారణం- ప్రకృతి పనిచేసే విధానం...

అది మనమీద చూపించే ప్రభావం.. చంచల స్వభావం కలిగిన మనసు మన బతుకును నడిపించడం.. మనకు తెలియకుండానే దానికి వశమైపోయి మనం ఓడిపోతుంటాం...

గెలవాలంటే ఓర్పు కావాలి.. సహనంలేని ఏ వీరుడూ చరిత్రలో గెలిచిన దాఖలాలు లేవు...

ఓర్పులేని ఏ సాధకుడూ సత్యానుభూతి పొందిన సన్నివేశాలు లేవు..✍️

                                             …సేకరణ.

.                      🌷🙏🌷

   🙏లోకా సమస్తా సుఖినోభవన్తు!🙏

🍀🌺🍀🌺🍀🌺🍀🌺🍀🌺🍀