ముగ్గురు స్నేహితులు - ఎనిమిది రొట్టెలు 

[ కర్మ అనేది ఎంత సరిగ్గా పనిచేస్తుందో చెప్పే కథ. దీన్ని జాగ్రత్తగా అర్థంచేసుకొంటే మనకు జీవితంలో ఎదురయ్యే ప్రశ్నలు , సమస్యలకు కొంత జవాబు దొరుకుతుంది ]

'కర్మ ' ను ఇంగ్లీషులో Fate , Destiny  అని కూడా పిలుస్తారు. 

మహేష్ , రమేష్ అనే ఇద్దరు స్నేహితులు పట్టణంలో ఏదైనా చిన్న పని వెతుక్కొందామని వాళ్ళ పల్లె నుండి బయలుదేరారు. [చాలా ఏళ్ళ క్రిందటి కథ , కానీ ఎప్పటికైనా పనికొచ్చే కథ.] సాయంత్రం అయ్యింది. ఒక దేవాలయపు మెట్ల మీద కూర్చొన్నారు. ఆరాత్రి అక్కడే పడుకొని , ఉదయం పట్టణం వెళ్లాలనుకొని , వాళ్ళు తెచ్చుకొన్న తిండి తినబోతుంటే అక్కడికి గణేష్ అనే మరో వ్యక్తి వచ్చాడు. [ కథ సులభంగా అర్థం కావడానికి పేర్లు పెట్టాను అంతే] '' చీకటి అయ్యింది. దుకాణాలు మూసేసారు, పళ్ళు కూడా దొరకలేదు. మీదగ్గర తినడానికి ఏమైనా వుంటే కాస్త ఇవ్వండి '' అని అడిగాడు.

మహేష్ దగ్గర 3 రొట్టెలు , రమేష్ దగ్గర 5 రొట్టెలు వున్నాయి. మొత్తం 8 రొట్టెలు. ఒక వేళ 6 వుండినా , లేదా 9 వుండినా సమానంగా పంచుకొనివుండవచ్చు కానీ 8 వున్నాయి. ఎలా పంచుకోవాలి అని ఇబ్బంది వచ్చినప్పుడు మహేష్ ఇలా సలహా ఇచ్చాడు : '' నా దగ్గర వున్న 3 రొట్టెలను ఒక్కోదాన్ని 3 భాగాలుగా 9 భాగాలు చేస్తాను[3X3]   , అలా నువ్వు [ రమేష్] కూడా నీ దగ్గరున్న 5 రొట్టెలను 5X3 గా 15 భాగాలు చేయి. అపుడు మొత్తం 24 భాగాలు అవుతాయి. 24 రొట్టె ముక్కలను మనం ముగ్గురం తలా 8 ముక్కలుగా సులభంగా పంచుకొని తినవచ్చు [ 3X8=24]. '' అలానే చేసారు. 

ఉదయం గణేష్ వెళ్ళిపోతూ , నా దగ్గర 8 వెండి నాణాలు వున్నాయి. నిన్న మీరు నా ఆకలి తీర్చినందుకు కృతఙ్ఞతగా నేను ఇవి మీకిస్తున్నాను అని 8 నాణాలు వారికిచ్చి వెళ్ళిపొయాడు.మహేష్ మరియు రమేష్ సంతోషించారు. తలా 4 నాణాలు పంచుకొందామని అనుకొన్నారు కానీ , రమేష్ అన్నాడు : "నీవు 3 రొట్టెలు ఇచ్చావు కానీ  నేను 5 రొట్టెలు ఇచ్చాను కదా నాకు 5 నాణాలు , నీకు 3 నాణాలు అన్నాడు." రమేష్ అభిప్రాయం సరిగానే వున్నా , మహేష్ అందుకు ఒప్పుకోలేదు. అపుడు వారిద్దరూ ఆ 8 నాణాలు తీసుకొని ఆ దేవాలయపు పూజారి దగ్గరికెళ్ళి , వారి కథను చెప్పుకొని '' మీరే వీటిని మా ఇద్దరికీ న్యాయంగా పంచండి '' అంటే ఆయన '' నాకూ ఇది ఇబ్బందిగానే వుంది , నా మాటలు ఒకరికి సంతోషం , మరొకరికి బాధ కలిగిస్తాయి.కాబట్టి నేను ఆ దేవుడినే అడుగుతాను. మీరు ఈరాత్రికి ఇక్కడే వుండండి. ఈ నాణాలను దేవుడి విగ్రహం ముందు పెడతాను. రేపు ఉదయం నాకు ఏదైనా ఆలోచన వస్తే చెపుతాను ,''  అన్నాడు. మహేష్ , రమేష్ ఒప్పుకొన్నారు. రాత్రి గడిచింది. పూజారి వచ్చి ఇలా అన్నాడు : '' నాకు రాత్రి కలలో ఎవరో ' మహేష్ కు 1 నాణెం , రమేష్ కు 7 నాణాలు ఇవ్వమని ' చెప్పారు, ". మహేష్ కు కోపం వచ్చింది. '' ఇది అన్యాయం , ఈలెక్క సరిగా లేదు, నేను ఒప్పుకోను '' అన్నాడు. అపుడు పూజారి ఇలా వివరించాడు : '' మహేష్ , నిజమే ఇది గణితశాస్త్రం ఒప్పుకొనే తీర్పు కాదు. కానీ దైవ న్యాయం అన్నిటికంటే గొప్పది.ఆ న్యాయం '' కర్మ '' ఆధారంగా నడుస్తుంది. మన అంగీకారం , అభ్యంతరం ఆధారంగా అది నడవదు. ఎలాగో తెలుసా ? నీవు  [మహేష్] నీ 3 రొట్టెలను 9 ముక్కలు చేసావు కానీ నీవు 8 ముక్కలను తిండిగా తిన్నావు. ఇచ్చింది 9 భాగాలు , పొందింది , తినింది 8 భాగాలు. అంటే  ఇతరులకు ఇచ్చింది 1 భాగమే కదా , అందుకే నీకు 1 నాణెం. కానీ రమేష్ తన 5 రొట్టెలను 15 ముక్కలు చేసాడు కానీ పొందింది , తినింది 8 భాగాలే. అంటే ఆయన  ఇతరులకు ఇచ్చింది 7 భాగాలు. అందుకే అతనికి 7 నాణాలు.''

కర్మ లెక్క ఇంత కచ్చితంగా వుంటుంది. మనమేమి చేసామో దానికి తగ్గట్టుగానే మనకు వచ్చే ఫలితం వుంటుంది. వేయి అవులు ఒక చోట వున్నా , వాటి దూడలను దూరంగా తీసుకెళ్ళి తిరిగి వాటిని వదలిపెడితే , వేయి ఆవులున్నా  ప్రతి దూడ కూడా కచ్చితంగా  తన తల్లి దగ్గరికే వెళుతుంది. అలాగే ' కర్మ ' కూడా. ఎక్కడున్నా , ఎలా వున్నా మనం చేసిన పాప పుణ్యాలు  కర్మ రూపంలో  సరిగ్గా మనల్ని వెతుక్కొంటూ వస్తాయి. కర్మ కు ఙ్ఞాపకశక్తి ఎక్కువ. మన సుఖ దుఖాలన్నీ మన కర్మ ఫలితాలే. Karma is ruthless but it is flawless too.