ఒక మంచి కథ

🙏 ఒక మంచి కథ

✍️మురళీమోహన్

👌ఒక వ్యక్తి రాత్రి బాగా అలసిపోయి నిద్రపోతున్నాడు. ఉన్నట్టుండి ఏదో చప్పుడైతే
తలుపు తీసుకుని బయటికి వచ్చాడు. అక్కడ ఒక దేవదూత కూర్చోని ఏదో
వ్రాసుకుంటూ ఉంది. ఆమె దగ్గరకి వెళ్ళి " అమ్మా! ఏమి వ్రాస్తున్నారమ్మా!"
అని అడిగాడు. దానికి ఆమె ఇలా అంది.
" దేవుడంటే ఎంతమందికి ప్రేమ భక్తి ఉన్నాయో తెలుసుకుని ఈ పుస్తకంలో
వ్రాస్తున్నాను. " వెంటనే ఆతురతగా ఆ వ్యక్తి ఇలా అడిగాడు.
" మరి ఆ పుస్తకంలో నా పేరు ఉందా? ఒకసారి చూసి చెప్పమ్మా!"
బాగా వెతికి లేదని సమాధానం చెప్పింది ఆ దేవదూత.....
తనపేరు లేదని చెప్పగానే బాధపడకుండా నవ్వుతూ ఇలా అన్నాడు.
" నా తోటి మనుషులకు సహాయాన్ని అందిస్తూ ఉంటాను. మానవత్వం అనే
పుస్తకంలో నాపేరు ఖచ్చితంగా ఉండి ఉంటుంది " అని అన్నాడు.
దానికి దేవదూత నవ్వుతూ వెళ్ళిపోయింది, మరుసటి రోజు ఆ దేవదూత
మళ్ళీ వచ్చింది. తన చేతిలో ఒక పుస్తకాన్ని కూడా తీసుకుని వచ్చింది.
ఆమె చేతిలోని పుస్తకాన్ని అలాగే చూస్తున్నాడు ఆ వ్యక్తి.
" ఏంటి తదేకంగా చూస్తున్నావు. ఇది దేవుడికి ప్రియమైన భక్తుల పేర్లు
ఉన్న పుస్తకం. దేవుడు నీకు చూపించి తీసుకుని రమ్మన్నారు. చూస్తావా? "
అంది దేవదూత.
" తప్పక చూస్తాను తల్లీ! " అని ఆతృతగా ఆ పుస్తకాన్ని అందుకున్నాడు
ఆ వ్యక్తి. పుస్తకాన్ని తెరిచి చూశాడు. ఆశ్చర్యంగా ఆ పుస్తకంలోని
మొదటిపేజీలో మొదటి పేరు తనదే ఉండటాన్ని గమనించాడు.
ఆనందంతో తన కళ్ళల్లో ఆనంద బాష్పాలు జలజలా రాలసాగాయి.
మనం ఎందుకు ఈ ప్రపంచానికి వచ్చామో ముందు తెలుసుకోగలగాలి.
తోటివారిలో దేవుడిని చూడగలగాలి....ఎదుటి వ్యక్తిని హింసించి.....చివరికి
చంపడానికి కూడా మనిషి వెనుకంజ వేయడం లేదు. కొందరైతే ఎదుటివారి
నాశనాన్ని దేవుడి దగ్గరికి వచ్చి మరీ వరం అడుగుతుంటారు.
దేవుడికి ఇష్టమైన వారిగా మనం మారాలంటే మనలో కాస్త మానవత్వం
ఉంటే చాలు...వేలకు వేలు దేవుడికి సమర్పించక్కరలేదు. చేతనయినంతవరకు
ఇతరులకు సహా్యాన్ని చేయండి. చేసిన సహాయాన్ని మరచిపోండి.
దేవుడు గుర్తుపెట్టుకుని మిమ్మల్ని రక్షిస్తాడు....సమయానికి తగ్గాట్టుగా
మనకు ఆశీస్సులు అందజేస్తాడని నేను మనసారా నమ్ముతున్నాను.🙏

సేకరణ