యోగసాధన

ఆత్మ సాక్షాత్కారం పొందడం ద్వారా మానవ జన్మయొక్క పరిపూర్ణ లక్ష్యమైన మోక్షం సాధ్యమవుతుంది. అయితే ఆత్మసాక్షాత్కారాన్ని పొందటానికి 'యోగం' కూడా ఒక సాధనం.

యోగశాస్త్రం ఇలా చెప్తుంది - अध तत्त्वदर्शनोपायो योगः | ఆత్మసాక్షాత్కారానికి ఉపాయం యోగం. యోగశాస్త్రంలో సూచించినట్లుగా యమ, నియమాదులను ఆచరిస్తే వైరాగ్యం, ఏకనిష్ఠమైన మనస్సు లభిస్తాయి. ఆ రెండూ ముముక్షువునకు అత్యంతం అవసరమైనవి.

ప్రాపంచిక విషయాల్లో నిమగ్నమైయున్న మనస్సు, జీవితంలో ఏకైక లక్ష్యాన్ని చేరుకోలేదు. సత్యాన్ని సాక్షాత్కరింపజేసుకోవటమూ కష్టమే. అందువలన మనస్సు యొక్క ఏకాగ్రతకు ప్రతివ్యక్తి కూడా యోగసాధన చేయక తప్పదు.

మనస్సును ఎలా అదుపులో పెట్టుకోవాలో శ్రీకృష్ణభగవానుడు భగవద్గీతలో అర్జునునికి చెప్పాడు.

असंशयं महाबाहो मनो दुर्निग्रहं चलम् |

अभ्यासेन तु कौन्तेय वैराग्येण च गृह्यते ||

నిస్సందేహముగా మనస్సు చంచలమైనదే. దానిని వసపరచుకోవటం మిక్కిలి కష్టమే. కానీ అభ్యాస, వైరాగ్యాలద్వారా, చంచలమైన మనస్సును అదుపులోకి తెచ్చుకోవచ్చును. యోగాభ్యాసాన్ని నిష్ఠతో, దశలవారీగా చేయాలి. అప్పుడే దాని ప్రయోజనం లభిస్తుంది.

శంకర భగవత్పాదులు గొప్పజ్ఞాని మాత్రమే కాదు, గొప్ప యోగి కూడాను. వారి జీవితంలో యోగం ద్వారా అనేక మహత్యాలు చేసి ప్రపంచానికి చూపించారు. అలాగే సదాశివబ్రహ్మేంద్రులు మొదలైనవారు విశేషంగా యోగ సాధనచేసి ప్రఖ్యాతినిపొందారు. ముముక్షువులు, యోగసాధన ద్వారా శ్రేయస్సును సాధించవచ్చు.

हर नमः पार्वती पतये हरहर महादेव 

--- జగద్గురు శ్రీశ్రీ భారతీ తీర్థ మహస్వామివారు.