*అవతార్ మెహర్ బాబా - 31*

🪷

రచన: శ్రీ శార్వారి

కొంతకాలం పిచ్చిపిచ్చిగా పెంచినా, తర్వాత మెహర్ బాబా రోజూ గడ్డం 'షేవ్' చేసుకునేవారు. 1922 తర్వాత జుత్తు పెంచారు. పాంట్సు, కాటన్ షర్లు, ఉలెన్ కోటు ధరించేవారు. తలచుట్టు కర్చిఫ్. బయటకు వెళ్లినపుడు టర్కిష్ ఫెజ్ టోపీ పెట్టుకునేవారు. 'బాబా' అవతారం మారిపోయేది. ఎవరూ బాబాను గుర్తు పట్టేవారు కాదు. అంత మార్పు వచ్చింది. శ్రద్ధ ఏర్పడ్డది. అయినా స్వంతంగా స్నానం చేయరు. ఘనీ దగ్గరుండి స్నానం చేయించేవారు.

పూనాలోనే 'పాన్' అలవాటైంది. సాకోరిలో ఉన్నంతకాలం ఇరవై నాలుగు గంటలు పాన్ నములుతుండేవారు. తిండిలేక పోయినా పాన్ కావాలి. బొంబాయి వచ్చాక పాన్ మసాలా తగ్గింది. మెహర్ కళ్లలోకి కొత్తగా కాంతి వచ్చింది. ఇప్పుడు చాలా ఆకర్షణీయంగా ఉన్నారు. చూపులో ఏదో వశీకరణ. మొహం కళగా కాంతులీనుతూ ఉండేది. మెహర్ బాబా కళ్లు సాయిబాబా కళ్లు అంటారు జనం. ఆ కళ్లలో శక్తి, శాంతి రెండూ ఉండేవి. ప్రేమ ఎక్కువ. బాధపడే వారిని చూస్తే విలవిల్లాడే స్వభావం. ఎవరు దగ్గరకు వచ్చినా, క్షణంలో ఎందుకు వచ్చిందీ తెలిసిపోయేది. ఇప్పుడు ఆధ్యాత్మిక దృష్టి ఎక్కువైంది. 'నవ్వుతూ బ్రతకండి' అని ఆశీర్వదిస్తుండేవారు.

📖

ఒకనాడు (1922 సెప్టెంబరు 10) ఒక తెల్ల పావురం ఎగరలేక, పడుతూ లేస్తూ మంజిల్ కొచ్చింది. చాలా జబ్బుగా ఉంది. మండలి సభ్యులు దానిని పట్టుకుని మెహర్ దగ్గరకు తెచ్చారు. బాబా దానిని ఒడిలో పెట్టుకుని సేవ చేశారు. పావురం చాలా అందంగా ఉంది. రాత్రంతా దానికి సేవ చేస్తూనే ఉన్నారు. మర్నాడు అది చచ్చిపోయింది. అది చచ్చిపోయినప్పుడు విచిత్ర భంగిమలో నమస్కారముద్రలో బాబా కాళ్ల మీద తల ఆన్చి ప్రాణం వదిలింది.

మెహర్ మండలిని ప్రశ్నించారు. 

“పావురం మంజిల్ కి ఎలా వచ్చింది? ఎందుకొచ్చింది? వచ్చి ఇక్కడ ఎందుకు చనిపోయింది?"

ఎవరూ సమాధానం చెప్పలేదు. బాబా అన్నారు "కొన్నాళ్లక్రితం నేనోమాట చెప్పాను జ్ఞాపకం ఉందా ఎవరికైనా? బాబాజాన్ మనకొక ముఖ్యసందేశం పంపిస్తారని. ఈ పావురం హజ్రత్ బాబాజాన్ సందేశాన్ని మోసుకొచ్చింది."

మంజిల్ వెనక ఆవరణలో గొయ్యితీసి, పావురాన్ని అందులో ఉంచి రాళ్లతో చిన్న సమాధి నిర్మించారు. సమాధిపైన ముస్లిం సంప్రదాయం ప్రకారం ముదురాకు పచ్చబట్ట కప్పి పూలు చల్లారు.

https://chat.whatsapp.com/IWSgPdEjJqNHgK1WdzQkJe

ధ్యానసందేశం :

మంజిల్ లో బ్రాహ్మీ ముహూర్తంలోనే దినచర్య మొదలవుతుంది. నాలుగు గంటలకు నిద్రలేచి, కాలకృత్యాలు తీర్చుకుని, స్నానం చేసి 5 గంటలకు ధ్యానం చేయాలి. అయిదారు గంటల మధ్య ధ్యానం. ఏ మతంవారికైనా అయిదు గంటలకు ధ్యానం తప్పనిసరి. ధ్యానంలో మతం ప్రమేయం లేదు.

"బ్రహ్మముహూర్తం వేళనే హజ్రత్ బాబాజాన్ నాకు స్ఫూర్తిని ప్రసాదించింది. దివ్యజ్ఞానం అనుగ్రహించింది. సత్యాన్ని రుచి చూపింది. ధ్యానం అంటే ఒక స్థిరాసనంలో కూర్చుని ఇష్టదైవం పైన, లేక సద్గురువుపైన మనస్సు లగ్నంచేయడం. ధ్యానంలో శూన్యం కావడం ప్రధానం. ధ్యానం మనసులో జరిగే పని, పెదాలు, నాలుక కదల్చకూడదు. మననమే స్మరణం కావాలి. స్మరణ మననంగా మారిపోవాలి.”

జీవితంలో జరిగే అతి చిన్న సంఘటనలు ఆధారంగా జీవిత సత్యాలను విశ్లేషించడం మహాగురువులకే సాధ్యం. 

సత్య విస్ఫోటనం కొరకే మన ప్రాచీనులు కథలల్లి పెట్టారు. కథల్లో సత్యాలను నిక్షిప్తంచేశారు. 

మెహర్ బాబా ఒకనాడు ఉదయం 'టీ' అనంతరం రాంజీతో చెస్ ఆడాలనుకున్నా రు. ఏ మాత్రం శ్రద్ధ పెట్టకపోయినా ఆటలో ఓడిపోవడం లేదు. బాబా అన్నారు, "నేను మనసు పెట్టి ఆడితే మన మంజిల్ లో ఎవరూ నన్ను ఓడించలేరు. నేను వరల్డ్ చాంపియన్లను సైతం ఓడించగలను.”

ఘనీ కల్పించుకుని అడిగాడు. "మనసు పెట్టడం అంటే ఏమిటి మాస్టర్? ఎక్కడి మనస్సును తీసి ఎక్కడ పెడతారు. మనసు అనేది మనిషిలో ఉందా? ఉంటే ఎక్కడ ఉంది?”

ఆట ఆపి, మెహర్ మనసు పైన లెక్చర్ ఇవ్వాల్సి వచ్చింది.

“మనసుకు బానిసైనవాడు మనిషి. మనసును జయించినవాడు రుషి. మనసుకు లోబడినవాడు మత్తులో పడిపోతాడు. వాడికి మనస్సుపై కంట్రోల్ ఉండదు. మనసు పైన కంట్రోల్ లేనివారు మస్తులు, ఉన్మత్తులు, విరాగులు. 'పలీ' అంటే యోగి. ఆధ్యాత్మికంగా ఎదుగుతూ మనస్సును స్వాధీనం చేసుకుంటాడు.

“మనసుకు బానిసకావడం అంటే ప్రాపంచిక సంబంధాలు పెంచుకోవడం. మనసును జయించడం అంటే పారమార్ధికం. ఇహ పరాలపై పట్టు సాధిస్తే ఎవరైనా గురువులు కాగలరు. మనసుపైన కంట్రోల్ ఉంటుంది కనుక గురువులు ఏదైనా సాధించగలరు. స్వార్థ ప్రయోజనం ఆశించనివారే సద్గురువులు.

https://chat.whatsapp.com/IWSgPdEjJqNHgK1WdzQkJe

"సద్గురువు తనకు అవసరమైన విషయాలను నేరుగా గ్రహిస్తారు. మరొకరి పైన ఆధారపడరు. అయినా ఏదీ కావాలని కోరరు. కోరికలు లేనివారు గదా నిజమైన సద్గురువులు! ఆ జ్ఞానం, సత్యం ఏదో శూన్య ధ్యానాన్ని చీల్చుకుని ఫౌంటెన్ లా ఉబికివస్తుంది. అప్రయత్నంగా అన్ని పనులు జరిగిపోతుంటాయి. సద్గురువులు ఆలోచించరు, ప్రయత్నించరు, కోరరు. గురుకృప వల్ల అన్నీ సవ్యంగా, సక్రమంగా, సమయానుకూలంగా జరిగిపోతుంటాయి”

📖

ఒక హతభాగ్యుడు వెతుక్కుంటూ మంజిల్ కి వచ్చి మెహర్ కి తన కన్నీటి కథ మొత్తం వినిపించి ఆశీర్వదించమని అర్థించాడు. అతను వెళ్లిన తర్వాత బాబా ఒక వివరణ ఇచ్చారు మండలికి..

“ఇక్కడకు వచ్చే ప్రతిఒక్కరు అది కావాలి, ఇది కావాలి, ఆశీర్వదించండి అంటారు. గురువులు ఎవరినీ శపించరు, ఆశీర్వదించ రు. వచ్చే వారంతా తమ ప్రాపంచికమైన అవసరాలు తీరడం కోసం వస్తారు. వాస్తవానికి వాళ్ల కర్మలు పూర్తిగా తొలగి అవరోధాలు తొలగిపోయే క్షణంలో తప్ప సద్గురుదర్శనం లభించదు. అదే గురు అనుగ్రహం అవుతుంది. అలా వచ్చేవారి హృదయారాటంలోనే దానికి పరిష్కారం ఉంటుంది. తప్పులు చేసిన వారైతే వాళ్లలో పశ్చాత్తాపం ఉంటుంది. గురువుల పని విశ్వశ్రేయస్సు. ఎవరూ ఎవరికీ చెడు జరగాలని ఆశించరు. గురువులు పై భూమికలపైన విహరిస్తుంటారు. కనుక క్రింది భూమికలపైన పనులు ఇట్టే జరిగిపోతుంటాయి. సంకల్పం చాలు. ఒక్క మాట చాలు, ఒక్క చూపు చాలు. గురువుల్ని అవీ, ఇవీ అడగడం కన్న వారి ఆశీస్సు, అనుగ్రహం కోరడం ఉత్తమం.

మరొక రాత్రి మెహర్ బాబా యోగం, సంసారం, మోక్షం పద్ధతి గురించి 

వివరించారు..

"ఎవరు ఎంతకాలం యోగం చేసినా, సమాధిలో ఉన్నా, పూర్తిగా విముక్తి పొందలేరు. కారణం కొన్ని బంధాలు, సంస్కారాలు మిగిలి ఉంటాయి. బంధ విముక్తి కావడం అంత సులభం కాదు. సంస్కారాలు అంటే చేసిన మంచి, చెడు పనుల ప్రభావం, వాటి జ్ఞాపకాలు, మన ఆలోచనలు, మాటలు, చేతలు అన్ని సంస్కారాలే. అన్నింట మిగిలిన ముద్రలు సంస్కారాలు. సద్గురు స్పర్శతో అలాంటి సంస్కారాల ముద్రలు చెరిగిపోతాయి.

https://chat.whatsapp.com/IWSgPdEjJqNHgK1WdzQkJe

"ప్రస్తుతం మనం అనుభవించే సుఖాలు, కష్టాలు, మంచి చెడులు, అన్నీ గత జన్మల, గత కర్మల ఫలితం. మన ఉచ్ఛ్వాస నిశ్వాసాలు, కనురెప్పల కదలికలు, శరీర చలనాలు అన్నీ గతకాలపు చర్యల ఫలితాలే. ఒక మంచి మాట, మంచి పని మంచి ఫలితం ఇస్తుందని మనకు తెలుసు. చెడ్డ మాట, చెడ్డ పని చెడు ఫలితం ఇస్తుందని తెలిసి కూడా మరచిపోతాం. మరచిపోవడానికి ప్రయత్నిస్తాం. ఇప్పటి మంచి పనుల ఫలితాలను ఈ జన్మలోనే పొందవచ్చు. ఇప్పటి దుష్కర్మల ఫలితాలు వచ్చే జన్మలో కూడా గ్యారంటీగా అనుభవించక తప్పదు. మంచి పని మంచి ఫలితం ఇస్తుంది. చెడు కర్మల ఫలితం వాయిదా పడుతుంది. నేటి చెడ్డపనులు వచ్చే జన్మలో నరకం చూపెడతాయి.

"సంపూర్ణ విముక్తి, మోక్షం అంటే మంచి, చెడులు రెండు లేకుండాపోవడం. శూన్యం కావడం. సంస్కారాలు వదలిపోనంతకాలం సత్యదర్శనం కాదు అంటే ఏ దేవుడూ కనికరించడు. బండెడు గడ్డి తగలబడడాని కి ఒక్క అగ్గిరవ్వ చాలు. అలాగే జన్మ జన్మల పాపాలు నశించడానికి గురుకృప చాలు.

"గత జన్మలలో సద్గురువు లభించనివారు, ఆరాటంలో అన్వేషిస్తూ ఈ జన్మలో సద్గురు దర్శనం పొందగలరు. కర్మలు నశిస్తేనే గురువు అండ లభిస్తుంది.”

📖

ఒకరోజు రాత్రి నిద్రపట్టలేదని, కాంపస్ లో ఏవో శబ్దాలు వినిపించాయని గోతులు తవ్వుతున్న చప్పుడు అయిందని సభ్యులు మెహర్ బాబాకు ఫిర్యాదు చేశారు.

"అవును, రోలర్ చప్పుడు వినిపించింది” అన్నారు మరికొందరు.

"ఈ బంగాళాలో దయ్యాలున్నాయని చెప్పుకుంటున్నారు” మరొకరి ఫిర్యాదు.

మెహర్ అన్నారు: "అవును దయ్యాలు ఉన్నాయి. ఏం అవి తిరిగితే మీకేం? మీరు తిరగడం లేదా! అవి మీపైన ఫిర్యాదు చేయలేదు ... ఇక్కడ మనుషులు తిరుగు తున్నారని! మీరెందుకు భయపడాలి వాటి గురించి. ఉపాసినీ మహరాజ్ నన్ను కనిపెట్టి ఉండమని ఏవో స్పిరిట్స్ పంపారు. పూనాలో ఉన్నప్పుడు అర్జున్ వాటిని చూచి భయపడ్డాడు. ఆ దయ్యమే ఇది. రాత్రివేళ మంజిల్ దాటి బయటకురాకండి. భయపడకండి ఒకవేళ ఏ దయ్యం కనిపించినా 'హల్లో' అనండి.

అందుకే నన్ను ఎవరూ ముట్టుకోవద్దని అంటాను. ఏ మనిషిలో ఏ స్పిరిట్ ఉంటుందో ఎవరికి తెలుసు. అది అంటుకున్న వారిని తగులుకుంటే కష్టం కదూ! అందుకే ధ్యానం చేసేటప్పుడు దూర దూరంగా కూర్చోమంటాను. మీరు వినరు. ఒకరినొకరు తాకుతూ కూర్చుంటారు. అప్పుడూ భయమే! ఇది అసలే స్పిరిట్యుయల్ కార్యక్రమం - స్పిరిట్స్ కి మీరు భయపడితే...?"

🪷

*సశేషం*

꧁☆•┉┅━•••❀❀•••━┅┉•☆꧂

*కథల ప్రపంచం* 

https://chat.whatsapp.com/IWSgPdEjJqNHgK1WdzQkJe

*తెలుగు భాషా రక్షతి రక్షితః* 

*ఏడాది చందా 120/-, ఫోన్ పే & గూగుల్ పే నెంబర్ 9849656434*

*1 YEAR* *SUBSCRIPTION 120/-*

*phone pe & Gpay to 9849656434*

꧁☆•┉┅━•••❀❀•••━┅┉•☆꧂