వేకువవుతుంది. తూర్పు దిక్కున సూర్యుడు ఉదయిస్తాడు. రోజు ప్రారంభమవు తుంది. కొన్ని గంటల తరవాత భానుడు పడమర కొండల్లో ప్రవేశిస్తాడు. చీకట్లు అల ముకుంటాయి. రోజూ జరిగే ఈ కార్యక్రమాన్నే మనం కాలగమనం అంటాం.

నిజానికి కాలం మహా గడసరి. కవ్విస్తుంది- కలత తీరుస్తుంది. భయపెడుతుంది-మరిపిస్తుంది. మురిపిస్తుంది- ముచ్చట గొలుపుతుంది. ఎలా అంటారా? వేచి చూస్తు న్నవారికి తొందరగా గడవదు. ఆనందంగా ఉన్నవారికి వేగంగా గడిచిపోతుంది. నిజా నికి కాలం కదలికలో ఏ మార్పూ లేదు. ఉన్నదల్లా అనుభవిస్తున్నవారి వ్యక్తిగత భావ నలోనే. నిన్న, నేడు, రేపు... అలా కాలాన్ని విభజిస్తాం. నిజానికి ఉన్నది ఒకే కాల ప్రవాహ ధార అన్నది విజ్ఞుల భావన. కాలం తీరు భలే గమ్మత్తుగా ఉంటుంది. దాని గమనంలో సంభవించే మార్పుల వల్ల మానవ జీవితంలో కష్టసుఖాలు, మంచిచెడుల అనుభవాలు కలుగుతాయి. అయినా అవేవీ శాశ్వతంగా ఉండవు. అవి కదిలిపోయే మేఘాల లాంటివని పెద్దల ఉవాచ. కాబట్టే పరిష్కారం లేదనుకున్న సమస్యలు చాలావ రకు కాలగమనంలో పరిష్కారమవుతాయి.

రుతువులు మారేకొద్దీ శారీరక రుగ్మతలు కలుగుతుంటాయి. చాలావరకు వాటంతటవే తగ్గిపోతాయి కూడా. కాబట్టి మనిషి చేయా ల్సింది వేచి చూడటమే. ఇక్కడ కాలమే వైద్యుడు. కావాల్సిందల్లా కాలగమనాన్ని పరి శీలించడం. దానికి తగినట్టు నడుచుకోవడం. ఒకింత సహనం జోడించడం. అలాగైతే జీవి తమంతా ఆనందమే. ఒక పనిలో విజయం కలగడానికి మనిషి చూసే ఎదురుచూపులు అతడి సహనాన్ని పరీక్షిస్తాయి. ఆ నిరీక్షణ ఫలవంతమైనప్పుడు ఆనందం అనుభవి స్తాడు. కాలగమనమే మనిషి ఆనంద విషాదా లకు మూలం. శ్రీరాముడు తండ్రి కోరిక మేరకు పద్నాలుగేళ్లు వనవాసానికి వెళ్తాడు. విషయం తెలుసుకున్న భరతుడు అన్నగారి కోసం తానూ అడవుల బాటపడతాడు. రాముడు అయోధ్యకు రావడానికి ఒప్పుకోకపోవడంతో ఆయన పాదుకలు స్వీకరించి వాటిని సింహాసనంపై ప్రతిష్ఠించి రాజ్యపాలనకు ఉపక్రమిస్తాడు. శ్రీరాముడి వనవాసం ముగిసి అయోధ్యకు చేరుకునే శుభ ఘడియకోసం వేచి చూస్తాడు. భరతుడి నిరీక్షణ ఫలించి మహదానందాన్ని తెచ్చిపెట్టింది. రాముడు సింహాసనాన్ని అధిష్ఠించాడు. అయోధ్య ప్రజలకు ఎదురు చూస్తూ కాలం గడపడంలోని ఆనందాన్ని చేరువ చేశాడు.

తొలకరి కోసం రైతులు వేయి కళ్లతో వేచి చూస్తారు. వర్షాగమనంతో వ్యవ సాయ పనులు మొదలవుతాయి. నిరీక్షణ వల్ల మంచే జరుగుతుంది. అలా వేచి చూడటం వల్ల అందివచ్చే మహత్తర క్షణాలను అనుభవించడానికి కావాల్సింది సహనం, ఆశావహ దృక్పథం. జీవితంలో కొన్ని ఘటనల వల్ల ఆనందం కలుగుతుంది. కొన్నింటి వల్ల దుఃఖం పుడుతుంది. ఆనందాన్వేషణలో నిరీక్షణ తప్ప నిసరి! ఎదురుచూపులు ఓ మహత్తర అనుభవం. అసలు మనిషి జీవితంలోని ప్రతి ఘట్టాన్నీ మధురస్మృతిగా మార్చేది ఎదురుచూపులేనంటే అతిశయోక్తి కాదు! ఆ పరమాత్మ మీద నమ్మకం ఉంచి మనిషి చేసేదీ అదే కదా!

గోపాలుని రఘుపతిరావు