*ఒక రోజు శ్రీ మహావిష్ణువు తన అర్ధాంగి లక్ష్మీదేవి సహకారంతో ఒక జాబితా తయారు చేస్తున్నాడు. ఆ జాబితా అనుక్షణం భగవన్నామస్మరణ చేసే భక్తులకు సంబంధించింది. ఆ జాబితాలో నారద మునీశ్వరుని పేరు మిగతా భక్తులందరి కన్నా పైన ఉంది. సరిగ్గా ఆ జాబితా తయారు చేస్తున్న సమయంలోనే "నారాయణ... నారాయణ" అన్న నాదం వినిపించింది. క్షణాల్లో కళ్ల ముందు నిలుచున్న నారదుడిని చూసి, లోక సమాచారమంతా అడిగి తెలుసుకున్నాడు విష్ణుమూర్తి. ఆ తర్వాత 'ప్రభూ! మీరు ఏదో రాస్తున్నట్లున్నారు ఏమిటది?" అంటూ అడిగాడు నారదుడు.*

*అందుకు సమాదానంగా "నారదా! కొద్ది రోజులుగా, అహోరాత్రులు దైవస్మరణ చేసే భక్తుల పేర్ల జాబితా తయారు చేయడంలో నిమగ్నమై ఉన్నాం" అన్నాడు. ఆ మాటలు విన్న నారదుడు ఎంతో ఉత్కంఠతతో 'అయితే మీ పరమభక్తుడైన నారదుని పేరు ఆ భక్తుల జాబితాలో అందరి కన్నా పైనే ఉండాలి మరి!' అన్నాడు.* *విష్ణువు ఏమీ మాట్లాడకుండా ఆ జాబితాను అతని చేతిలో పెట్టాడు. తాను అనుకున్నట్లు నిజంగానే ఆ జాబితాలో అందరి కన్నా పైన తన పేరే ఉంది. మహానందభరితుడైన నారదుడు ఆ జాబితాలోని మిగతా పేర్లన్నీ చూశాడు. అయితే అనుక్షణం భగవన్నామస్మరణ చేసే హనుమంతుని పేరు మాత్రం ఆ జాబితాలో ఎక్కడా లేదు. ఆ విషయమై తన స్పందనను ఎంత మాత్రం వ్యక్తం చేయకుండా విష్ణుమూర్తితో సెలవు తీసుకున్నాడు నారదుడు.*

*ఆ వెంటనే గగన మార్గంలో హనుమంతుని నివాసానికి చేరుకుని, శ్రీ మహావిష్ణువు తయారు చేస్తున్న భక్తుల జాబితా విషయం చెప్పి. అందులో ఎక్కడా నీ పేరు లేదని చెప్పేశాడు. ఆ మాటలు విన్న హనుమంతుడు కించిత్ ఆశ్చర్యాన్ని వ్యక్తం చేయలేదు. "గురుదేవా! నారాయణుడి మహా భక్తుడు మీరు. అనుక్షణం మీ నోట నారాయణ నారాయణ తప్ప మరో మాటే రాదు. అయినా ఎల్లవేళలా రామ నామ స్మరణ చేసే నా పేరు ఆ జాబితాలో ఎలా ఉంటుంది మహర్షీ!" అంటూ రామనామ స్మరణలో నిమగ్నమైపోయాడు హనుమంతుడు. ఆ వెంటనే అటునుంచి వెళ్లిపోయాడు నారదుడు. ఆ తర్వాత కొద్ది రోజులకు మళ్లీ ఒకసారి నారదుడు శ్రీ మహా విష్ణువు వద్దకు వెళ్లాడు. ఆ రోజు కూడా ఏదో రాస్తూ కనిపించాడు. అది చూసిన నారదడు 'ప్రభూ! ఈ రోజు కూడా మీరేదో రాస్తున్నారు ఏమిటది?" అన్నాడు. తాను తయారు చేస్తున్న ఒక జాబితాను నారదుని చేతిలో పెడుతూ, నారదా! ఈ రోజు, నిరంతరం మేము స్మరించే భక్తుల పేర్ల జాబితా ఒకటి తయారు చేస్తున్నాం" అన్నాడు. నారదుడు వెంటనే ఆ జాబితాను చూశాడు. ఒక్కసారిగా నారదుని కళ్లు బైర్లు కమ్మాయి. అందులో అందరి పేర్ల కన్నా పైన హనుమంతుని పేరు ఉంది. పైగా నారదుని పేరు మాత్రం ఆ జాబితాలో ఎక్కడా లేదు. అది చూసి నిశ్చేష్టుడైన నారదుడు "నారాయణ నారాయణ అనుకుంటూ అటునుంచి వెళ్లిపోయాడు.*

*ప్రేమించడం కన్నా, ప్రేమించ బడటం గొప్ప అన్నట్లు. ఎదుటి వారిని మన హృదయంలో నింపుకోవడం కన్నా, ఎదుటి వారి హృదయంలో మనం నిలిచిపోయేలా జీవించడమే గొప్ప అన్న సత్యం నారదునికి నిదానంగా అర్ధం కావడం మొదలయ్యింది.*