🙏🏻రమణభాషణము 🙏🏻

👌ప్రపంచానికి బందీని చేసే వ్యక్తిగత స్వార్థస్వభావాన్ని మానవుడు విడిచిపెట్టాలి.

 మిథ్యాత్మ (అసత్యమైన నేను)ను వదిలివేయడమే సన్న్యాసం.

 ధ్యానానికి సమయాన్ని కేటాయించడం ఆరంభంలోని సాధకులకు. పురోగమించే కొద్దీ, సాధకుడు పనిలో ఉన్నా, లేకున్నా తన అంతరంగపు లోతులలోని ప్రసన్న వైభవాన్ని అనుభవించ గలుగుతాడు.

 ఓపక్క సామాజిక బాధ్యతలను నిర్వహిస్తూనే శీతల ప్రశాంత ఏకాంతాన్ని నిలుపుకుంటాడు.

🙏🏻" ఓం నమో భగవతే రమణాయ "🙏🏻

ప్రశ్న :

భగవాన్! ఒక భక్తుని అధ్యాత్మిక అనుభవాలను గూర్చి ఒక పత్రికలో వ్యాసము ఉన్నది. దేవుని విగ్రహం అంటే ఆ భక్తునకు అమిత భక్తి అంట. ఆ భక్తుని దృష్టిలో ఆ విగ్రహానికి చైతన్యం వచ్చిందట. ఆ భక్తుని ఆనందానికి అవధులు లేవు అంట. ఇది

శక్తిపాతానికి సమమా!

మహర్షి :

విగ్రహ చైతన్యం ఆ భక్తుని ధ్యానబలాన్ని తెలుపుతుంది. శక్తిపాతం అనేది అంతర్ముఖులు కావడానికి సహాయం చేస్తుంది.

ఒక పద్ధతి ఉన్నది : 

మనస్సును తన నీడపైనే ఏకాగ్రం చేస్తే, ఒక దశలో ఆ నీడకు చైతన్యం వచ్చి, అడిగిన ప్రశ్నలకు సమాధానాలు ఇస్తుంది. అది మనోబలానికి, ధ్యానశక్తికి నిదర్శనము.

కంటితో చూసే బాహ్యము సర్వమూ నశించేదే. అట్టి సంభవాలు తాత్కాలికంగా అప్పటికి సంతోషం కలిగిస్తాయి. అంతే. కాని వాని వలన నిశ్చల శాంతి లభించదు. ఆ నిశ్చల శాంతిని సాధించగలిగేది ఆత్మ విద్య ఒక్కటే.

"ధ్యానం" అంటే సామాన్య అర్థం ఒక ఆలోచన మీద మనస్సును ఏకాగ్రం చేయడం. ఆ సమయంలో యితర ఆలోచనలు అన్నీ తొలగి ఉంటాయి. ఆ ఒక్క ఆలోచన గూడ తగిన సమయంలో తొలగిపోతుంది. చివరకు గమ్యం ఏమంటే ఆలోచనలులేని జ్ఞానమే.