అరుణాచలం:

శ్రీ రమణ మహర్షి బోధనలు🙏🏻

ప్ర: ఇది గ్రహించటం కష్టం. సిద్ధాంతమర్థమయింది. కాని ఆచరణ ఎట్లా?

జ : ఇతర పద్ధతులన్నీ ఆత్మని పరిశోధించటం చేతకాని వారి కోసం.

అహం బ్రహ్మాస్మి' అని అనటానికైనా చింతించటానికైనా ఒక కర్త అవసరం. అది ఎవరు? అది “నేను”. ఆ నేనుగా ఉండు. అదే సూటైన పద్ధతి. మిగిలిన పద్ధతులు కూడా ఆత్మ గురించిన పరిశోధనకై ఈ మార్గానికే దారితీస్తాయి.

ప్ర: 'నేను' అంటే నాకు ఎరుక ఉంది. కాని నా బాధలు తీరలేదు.

'నేను' అనే ఈ భావం నిష్కళంకం కాదు. శరీరంతోనూ, ఇంద్రియలతోనూ అది కలుషితమైంది. బాధ ఎవరికో గ్రహించు. 'నేను' అనే భావానికే. దాన్ని విడువకుండా ఉండు. మిగిలిన బాధలన్నీ పోతాయి.

🦚జ్ఞానప్రసూనాలు🚩

1) ఎండమావిని చూసి నీటికై పరుగెత్తే వాడొకడు. ఎండమావిలో నీరుండదని తెలిసి ఊరక ఉండే వాడొకడు.

ఇద్దరికీ ఎండమావి కనిపిస్తుంది. కానీ ఒకడికి సత్యంగా గోచరించేది మరొకడికి భ్రాంతిగా గోచరిస్తుంది.జ్ఞానికి ప్రపంచం ఎండమావి లాంటిదే.

2) ద్రష్ట వైపుకు దృష్టి మరలితే నీ ఆధ్యాత్మిక కోర్స్ పూర్తయినట్లే.

3) సందేహం తొలగడమే సాక్షాత్కారం.

4) సత్యం కాని దానిని తెలుసుకోవడానికే సాధన. సత్యానికి సాధన అవసరం లేదు.

5) చర్చ ఉంటే దేవుడుండడు. దేవుడుంటే చర్చ ఉండదు.

6)నేను చేస్తున్నాను అని కాకుండా 'నా ద్వారా చేయబడుతున్నది' అని చేసే కర్మ నిష్కామ కర్మ.

7) మనుష్యునకు జ్ఞానం కలిగిన పిమ్మట ఈ శరీరంపై లక్ష్యం ఉండదు. ఎంత చక్కని విస్తరికానీ భోజనం చేసిన తరువాత విసరి పారేసినట్లు...

8) మురికిలో పడ్డాడని బిడ్డను ఎవరైనా వదిలేసుకుంటారా? అలాగే మనం ఎలా ఉన్నా భగవంతుడు మనల్ని వదలలేడు.

9) ఈశ్వర నియతిని ఎవ్వరూ దాటలేరు. నేను ఇలా ఉండాలని మీరు అలా ఉండాలని పరమేశ్వరుని నియమం.

ఇంతకు మించి చెప్పటానికి ఏమీ లేదు.

10) నీ తలను(బుద్ధిని) తీసి ప్రక్కన పెట్టు. అదే శరణాగతి అంటే.

11) నీకు నీవు తటస్థంగా ఉంటే మొత్తానికి తటస్థంగా ఉన్నట్లే...