****సత్యాసత్యాలు..వ్యామోహవైరాగ్యాలు

 *సత్యాసత్యాలు..వ్యామోహవైరాగ్యాలు*

~~~~~

ఒక ఇంటికి నిప్పంటుకుని కాలిపోతోంది. 

జనం చుట్టూ చేరి చూస్తున్నారు. యజమాని దూరoగా నిల్చుని రోదిస్తున్నాడు. 

ఎంతో అందమైన ఇల్లు. పది రోజుల క్రితం ఎవరో రెట్టింపు ధర ఇస్తామన్నా అమ్మలేదు.అందుకే దుఃఖం. 

ఇంతలో పెద్ద కొడుకు వచ్చాడు. "నీకు తెలీదా నాన్నా? మూడు రెట్లు ధర వస్తే, ఇల్లు నిన్నే అమ్మేసాను. నీకు చెప్పేటంత సమయం లేక పోయింది"  అన్నాడు. 

చేత్తో తీసేసినట్టు ఒక్క సారిగా వేదన పోయింది. గుండెల్నిండా సంతోషంగా గాలి పీల్చుకున్నాడు. ఆ తరువాత తనూ ఒకడిగా మంటల్ని చూస్తూ పక్క వారి సంభాషణలో పాలు పంచుకొనసాగాడు…!

అదే ఇల్లు. అవే మంటలు. క్షణం క్రితం వరకూ ఉన్న అటాచ్‌మెంట్ పోయింది. ఇప్పుడు నిజం చెప్పాలంటే, కాస్త ఆనందిస్తున్నాడు కూడా. 

ఇంతలో రెండో కొడుకు వచ్చాడు. "నువ్వు సంతకం పెట్టకుండా అమ్మకం ఎలా పూర్తి అవుతుంది నాన్నా. ఆమాత్రం తెలీదా?"  అన్నాడు. 

అంతే. తిరిగి దుఃఖం చుట్టు ముట్టింది. 

ఈ లోపులో మూడో కొడుకు వచ్చి, "మాట మీద నిలబడే నిజాయితీ గల మనిషి ఆయన. మాటతోనే అమ్మకం జరిగిపోయిందన్నాడు. సగం డబ్బు చెల్లించేశాడు కూడా" అన్నాడు. 

తిరిగి సంతోషం పెనవేసుకుంది.

నిజానికి ఏమీ మారలేదు. ఇది నాది అనుకున్నప్పుడు దుఃఖం వస్తోంది. కాదు అనుకున్నప్పుడు ఆనందం వస్తుంది. 

వ్యామోహవైరాగ్యలనేవి మనలోని అంతర్గత భావనలు. రెండింటిని సరిగ్గా స్వీకరించగలిగినప్పుడే సత్యదర్శనం.. అదే అమృతత్త్వం.

వ్యామోహమే మృత్యువు.

బ్ర.శ్రీ. అడుసుమల్లి ప్రభాకరశర్మ