*అన్నిటా గణపతే.....* 

*పరమాత్మ గణపతి అవతారాన్ని ఎత్తాడని అంటారు. పరమాత్మ అంతటా ఉంటాడు కనుక గణపతి అన్నిటా ఉంటాడు.* 

*శరీరం*

*గణపతి అన్న శబ్దమునకు గణములకు అధిపతి అని చాలా విశిష్టమైన అర్ధం ఉందని, గణము అనగా సమూహము అనీ తెలిసిందే. విశాలమైన ఈ ప్రపంచం లో కొన్ని లక్షల కోట్ల గణములు ఉన్నాయి. శరీరంలో కాళ్ళు, చేతులు, శిరస్సు, కనులు, చెవులు మొదలగు అవయవ గణములు ఉన్నాయి. ఆ అవయములకు అధిపతి శరీరమే కావున మొదటి గణపతి శరీరం.*

*మనసు*

*శరీరంలో ఉన్న 5 జ్ఞానేంద్రియాలు, 5 కర్మేంద్రియాలు అనే 10 ఇంద్రియ గణములకు అధిపతి మనసు. అందుకే మరో గణపతి మనసు.*

*బుద్ధి*

*మనస్సుతో కలసి ఉన్న ఇంద్రియ గణమునకు అధిపతి బుద్ధి. అందువల్ల ఇంకో గణపతి బుద్ధి.*

*నాడులు*

*ఇక మన శరీరంలో అనేకమైన నాడులలో అధిపతి సుషుమ్న నాడే కావున మరో గణపతి సుషుమ్న నాడి.*

*వెన్నెముక*

*శరీరంలో ఉన్న అన్ని ఎముకలకు అధిపతి* *వెన్నెముక. అన్ని ఎముకలు వెన్నెముకతో కలిసి ఉండి పని చేస్తాయి. ఏ అవయవానికి ఆ అవయవం ఎముకలు వేరుగా ఉన్నా ఒక వెన్నెముక పని చేయకుంటే ఏ అవయవాలు పని చేయవు. అందుకే మరో గణపతి వెన్నెముక.*

*అధిపతి గణపతి*

*ఇంటిలో కుటుంబానికి యజమాని గణపతి.*

*అలాగే గ్రామానికి గ్రామపతి, రాష్ట్రాధిపతి, దేశాధి పతి, ప్రపంచాధిపతి అందరూ గణపతులే. వీరందరూ జీవులు, ఈ అన్ని జీవాత్మలకు అధిపతి పరమాత్మ, ఆయనే అసలైన గణపతి. అందరినీ శాసించేవాడు అందరికీ దారి చూపేవాడు, అందరి హితాన్ని ప్రియాన్ని కలిగించేవాడు పరమాత్మ. మనం ''గణానాంత్వా' అనే మంత్రంతో ధ్యానించేది ఆ - పరమాత్మనే. నిజమైన గణపతి పరమాత్మే. నిజమైన అధిపతి అంటే నాయకుడు, పరిపాలకుడు. ఆయన ఫలమును తాననుభవించాలని కోరుకోడు, అనుభవించడు కూడా, అందరికీ సమానంగా పంచుతాడు, అందరి చేత అనుభవింప చేస్తాడు. నాయకుడు అనుభవించడం మొదలు పెడితే ఇక సేవకులకు మిగిలేది ఏమి ఉండదు. అందుకే అధిపతి అయిన పరమాత్మ దేన్నీ అనుభవించడు అని ' అనశ్నన్ అన్యః అభిచాక శీతి' అని పరమాత్మ తాను దేన్ని అనుభవించకుండా అనుభవించేవారి కంటే అధికంగా ప్రకాశిస్తాడు. నిజమైన కాంతి, తేజస్సు, సిద్ధి, బుద్ధి, బలము, శక్తి ప్రభావము స్వార్ధంలేని వారికే ఉంటాయి. అంటే స్వార్థం లేనివాడే నిజమైన గణపతి అనే విశాలమైన అర్ధము గణపతి శబ్దానికి ఉంది. అయినా అందరూ పామరులు పండితులు గృహస్థులు, వానప్రస్థులు, లౌకికులు, వైదికులు కూడా ఇంతటి విశాలమైన పరమార్థాన్ని తెలుసుకొని నలుగురికి తెలిపి ఆరాధించలేరు, కావున పరమాత్మ అందరూ సులభంగా అర్థం చేసుకొని ఆరాధించి ఫలితం పొందడానికి ఒక గణపతిని ఏర్పరిచారు.*

*దానికోసమే పరమాత్మ గణపతి అవతారాన్ని ఆ వైభవాన్ని అందించారు.*

*మూషిక వాహన వైశిష్ట్యం*

*గణపతి వాహనంమూషికం, గణపతి లాగే గణపతి వాహనానికి ఒక అంతరార్థం ఉంది.*

*మూషిక అంటే దొంగలించేది అని అర్థం. మన ఇంట్లో మనం ఉండగా మనం చూస్తుండగానే ఇంట్లోకి వచ్చి తనకు కావలసినదాన్ని తీసుకొని వెళుతుంది. మూషికం. మనం దాన్ని ఆపలేము. బయటకి పంప లేము అలాగని పట్టపోతే భూమిని తొలచి లోపలికి వెళ్లిపోతుంది. అంటే రంధ్రం చేసుకొని లోపలికి పోతుంది. మనం ఏమరపాటుగా ఉంటే తన పని తాను చేసుకొని వెళ్ళిపోతుంది. ఈ శరీరంలో హృదయం అనే బిలంలో స్థిర నివాసం ఏర్పరుచుకొని ఉండే మూషికం మన మనస్సే. అది మనకు తెలిసే మన జ్ఞానాన్ని మని వివేకాన్ని దొంగలిస్తుంది. కోరికను కలిగించి కోపాన్ని కలిగించి తాననుకున్న పనంతా చేసేస్తుంది. మన ఇంట్లో ఉన్న ఎలుకను పట్టలేము, మన ఒంట్లో ఉన్న మనసును పట్టలేము. గణపతికి వాహనం మూషికం. శరీరానికి వాహనం మనస్సు.*

*శరీరమే గణపతి కావున అది దొంగలించినపుడే మనసు తన వశం చేసుకుంటుంది. మనం యమ నియమాదులతో మనసును వశం చేసుకుంటే మనను ఉత్తమ లోకాలకు మోసుకుని వెళుతుంది, అంటే ఆత్మకు వాహనం అవుతుంది. ఇది మూషిక వాహనంలోని వైశిష్యం.*

*┈┉━❀꧁మహా గణపతి꧂❀━┉┈*

         *ఆధ్యాత్మిక అన్వేషకులు*

🌻🌻🌻 🙏🕉️🙏 🌻🌻🌻