@ చికిత్స విచికిత్స @

ఒక చిన్న 

నెగిటివ్ కామెంట్ ...

తీవ్ర మనోవేదనకు 

గురిచేస్తుంది మనని

అతలాకుతలమైపోతుంది 

అప్పుడు మన మనస్సు

ఆ అసహనంలో 

ఆ నిస్సహాయతలో 

మనమేం 

మాట్లాడుతున్నామో

అసలు మనమేం చేస్తున్నామో

కూడా తెలియదు 

********

ఆ నెగిటివ్ 

కామెంట్ ను 

సంయమనంతో 

స్వీకరించగలిగితే

సహనంతో 

ఆత్మవిమర్శ చేసుకోగలిగితే 

తేటపడుతుంది 

తేలిక పడుతుంది మనస్సు 

కాసింత మౌనం

అవసరం ఈ ప్రక్రియకు

ఒకింత ధ్యానం అత్యవసరం 

ఈ విచికిత్సకు 

మనని మనమే 

తరచి తరచి చూసుకునేందుకు 

సాధన చేయాలి 

ఈ నైపుణ్యాన్ని 

మనదే తప్పైతే 

సరిదిద్దుకోవాలి 

తప్పేం లేకుంటే 

వివరించి చెప్పేయాలి

*******

కాదు నీదే ...

నీదే తప్పని వాదనకు దిగితే 

వాళ్ళ వైపోసారి 

జాలిగ కరుణగ చూసేయాలి 

అటు తరువాత 

విలాసంగ నవ్వుకుంటూ తరలిపోవాలి 

ఎవరికీ ఇక 

వివరణ అవసరం లేదు

మనకి మనం వివరణనిచ్చుకుంటే

అది చాలు ...

- రత్నాజేయ్ (పెద్దాపురం) 

-