****శరీరం ఒక అద్దె కొంప*

 *శరీరం ఒక అద్దె కొంప*

*_అద్దె ఇంట్లో ఉన్నవాడు, ఆ ఇంట్లో ఉన్నంతకాలం 'మా ఇల్లు' అనే అంటాడు._*

*_తన ఇంట్లో ఏదైనా శుభకార్యం జరిగినప్పుడు ఇంటి యజమానితో కూడా అదే అంటాడు 'ఏమండీ! రేపు మా ఇంటికి రండి...'అని._*

*_'మా ఇల్లు' అన్నాడని అతనితో యజమాని గొడవపడడు.యెందుకంటే వ్యవహారం కోసమే అలా అంటారని ఇరువురికీ తెలుసు._*

*_అలాగే ఈ తనువు తనకు అద్దె ఇల్లు లాంటిది. వ్యవహార నిమిత్తం నాశరీరం, నా సంసారం, నా ప్రపంచం, నా దైవం అంటాడు._*

*_కానీ,యజమాని భగవంతుడు._*

*_యజమాని భగవంతుడు అనేది జ్ఞప్తి కలిగి ఉన్నవాడు - జ్ఞాని. మరచి ఉన్నవాడు - అజ్ఞాని._*

*_అద్దె ఇల్లు పెచ్చులూడితే అద్దెకున్నవాడు ఏమీ చింతించడు.ఆ ఇల్లు ఖాళీ చేసి మరొక ఇల్లు చూసుకుంటాడు._*

*_ఇక ఈ శరీరం నిలబడని వ్యాధి వచ్చింది...వదిలేసి మరొక ఉపాధిని వెతుక్కుంటాడు.అదే పునర్జన్మ._*

*_ఇల్లు మారితే యజమాని మారుతాడు.కానీ శరీరం మారితే యజమాని (భగవంతుడు)మారడు._*

*_సకలసృష్టికీ యజమాని ఆయనే.సృష్టి యావత్తు భగవంతునికి ఓ సంకల్పం అంతే._*

*_ఆయన ఒకేసారి మొత్తాన్ని ఖాళీ(లయం) చేసేస్తాడు.అనగా సంకల్పరాహిత్యంగా ఉంటాడు.నీవు నిద్రలో ఉన్నట్టు._*

*_దేవుని సంకల్పరాహిత్యమే జీవునికి జన్మరాహిత్యము._*

*_కాబట్టి బంధమైనా, మోక్షమైనా భగవంతుని సంకల్పమే._*

*_అందుకే అన్నమయ్య ఓ సంకీర్తనలో ఇలా అన్నారు "మదిలో చింతలు, మైలలు మణుగులు, వదలవు నీవవి వద్దనక."_*

*_భగవంతుడు "వద్దు" అనుకుంటే ఉండవు.అంతేగానీ మనం వద్దు అనుకుంటే పోవు._*

*_నా సంకల్పం కూడా భగవంతుని సంకల్పంలో అంతర్భాగమే కదా అంటావేమో!_*

*_ఇక బాధేముంది..?_*

*_నీ శరీరం భగవంతుని శరీరంలో(సృష్టిలో) అంతర్భాగం. నీ మనస్సు భగవంతుని మనస్సులో(మాయలో) అంతర్భాగం._*

*_జీవుని బంధమోక్షములు దేవుని లీలావిలాసములు._*

*_శరీరం ఉంటే ఉండనీ... ఊడితే ఊడనీ..._*

*_బంధం ఉంటే ఉండనీ, మోక్షం వస్తే రానీ..._*

*_ఏదైనా సరే ఉంటే ఏమి..? లేకుంటే ఏమి..?అని ఉండటం జ్ఞానిలక్షణం.._*

*_అచలరూపుడైన పరమేశ్వరుని సంకల్పపరంపరయే ఈ బ్రహ్మాండగోళములుగా మహా సృష్టి ఏర్పడింది..._*

*_జగత్తు యావత్తు శివుని సంకల్పరూపమే.శివుడు  మెలకువతో  కనే కలే ఈ ప్రపంచం._*

*_ఆపదలోకి త్రోయడం,ఆపద నుంచి రక్షించడం...ఆ క్రీడలో భాగమే._*

*_అజ్ఞానానికి గురి చేయడం...దానిని తొలగించడానికి జ్ఞానప్రబోధం చేయడం...ఆ క్రీడలో భాగమే._*

*_మంచి-చెడులనే తక్కెడలను అటు ఇటూ సమాంతరంగా లేనట్లు...మళ్లీ ఉన్నట్లు... సరిచూసుకుంటూ ఉండడం ఆ క్రీడలో భాగమే._*

*_ప్రతిజీవి కర్మఫలాన్ని ప్రతిజీవికీ సరాసరిన పంచుతూ ఉండడం ఆ క్రీడలో భాగమే._*

*_అవతరించడం...అనుగ్రహించడం....ఆగ్రహించడం...అంతం చేయడం...ఆ క్రీడలో భాగమే._*

*_ఆ క్రీడలో "ఎందుకు" అనే ప్రశ్నకు తావులేదు.యెందుకంటే అది క్రీడ కాబట్టి..._*

*_క్రీడలో గెలుపు ఓటములు రెండూ వినోదమే కాబట్టి._*

*_ఆ క్రీడలో భాగంగానే... సకల నామరూపాలూ తానే..._*

*_దేవ-జీవ భేదం తొలగిపోవడమే దైవోపాసన యొక్క అంతిమ ప్రయోజనం._*

*_అనేకత్వాన్ని విడిచి ఏకత్వం వైపుకు చేరడమే ఈ ఆధ్యాత్మికతకు  అంతిమ ప్రయోజనం._*

*_ఈశ్వరుడు వేఱు, నేను వేఱు అనే భావముతో కూడిన ఈశ్వరభావన కంటే  'అతడే నేను' అన్న అభిన్నభావనయే పావనమైనది అన్న రమణుల మాటే పరమ ప్రమాణం._*

*_రంగులరాట్నానికి మధ్యభాగములో అన్ని గుర్రాల పరుగులకు ఆధారమై, అచలమై ఉన్న స్తంభం వంటివాడు పరమేశ్వరుడు._*

*_జీవుడు నాణేనికి బొమ్మ బొరుసు వలె చల-అచల ప్రవృత్తులను కలిగి ఉంటాడు. అందువల్లనే జీవుడు బంధ-మోక్షముల మధ్య ఊగిసలాడుతుంటాడు._*

*_జీవుడికి శాశ్వతమైన బంధమూ లేదు, శాశ్వతమైన మోక్షమూ లేదు.ఈ లీల అనంతం. "ఎందుకు..? " అన్న ప్రశ్న అనవసరం._*

*_సముద్రంలో కలిసేవరకు నదికి ఒడిదుడుకులతో కూడిన ప్రవాహం ఉన్నట్టు దేవునిలో కలిసేవరకు జీవునికి సుఖదుఃఖరూపంతో కూడిన సంసారం ఉంటుంది._*

*_అహంమూలాన్ని కనుగొనడమే గొప్ప తపస్సు అంటారు అరుణాచల రమణభగవానులు..._*

*_ఒకటి వెలుపలి సౌందర్యం...మరొకటి లోపలి సౌందర్యం..._*

*_రమణులు అన్నట్లు "ఒకటే" మూడయ్యింది. ఎప్పుడును మూడు మూడే అనుట అహంకారము. మూడూ "ఏకం" అనుట అహంస్వరూపము._*

*_దుఃఖం, సుఖం రెండూ దైవప్రసాదితాలే...బంధం, మోక్షం రెండూ దైవానుగ్రహాలే.._*

*_ప్రతి కష్టంలోనూ మన వైపు దైవం ఒక కన్ను వేసి వుంచే వుంది...అని తెలిసినప్పుడు ఆ కష్టపరిస్థితి నుండి తెలియకుండానే దాటేయగలం._*

*_ఏడ్వడంలో ఉన్న సుఖం ఏడ్చినవానికే తెలుసును. బంధం కూడా మోక్షమంత సుఖమయ వారాశి._*

*_ఏడుపు అనేది పై పొర మాత్రమే. లోపలంతా గొప్ప సుఖం నిండి ఉంటుంది_*

*_నవ్వు అనేది పై పొర మాత్రమే.లోపలంతా గొప్ప దుఃఖం నిండి ఉంటుంది._*

*_సుఖ-దుఃఖాలు గొప్ప స్నేహితులు....ఒకణ్నే రమ్మనలేం.ఒకణ్నే కాదనలేం._*

*_ఒకణ్ణి పిలిస్తే ఇద్దరూ వస్తారు.ఒకణ్ణి కాదంటే ఇద్దరూ రారు._*

*_ఇద్దరూ కావాలంటే - సంసారం.ఇద్దర్నీ కాదంటే పరమపదం._*

*_ఏకకాలంలో సంసారంలో ఉంటాను, పరమపదంలోనూ ఉంటాను.వెలుపల నేను జీవుణ్ణి, లోపల నేను దేవుణ్ణి._*

*_వెలుపల నేను సంసారిని, లోపల నేను సన్న్యాసిని. వెలుపల నేను మనిషిని, లోపల నేను ఋషిని.✍_*

*_🚩'శ్రీ గురుభ్యో నమః '🙏_* 

 *_'సర్వం కృష్ణార్పణమస్తు.🙏_*

ఓం అరుణాచల శివ ఓం