@ అవమానుషం @

విసుగొచ్చింది

ఈ మనుషుల్ని చూసీ చూసీ ...

మార్పు లేకుండా 

ఎందుకిలా గిడసబారిపోయారు?

*******

సంతతి మీదా ..

సంపద మీదా అంతులేని ఆశ 

రంగులనీ మతాలనీ ...

దేశాలనీ నాగరికతలనీ ...

అంతస్తులనీ అంతరాలనీ ....

తెలిసీ తెలియని తనమే తత్వంగా 

నగ్నత్వాన్ని ద్విగుణీకృతం చేస్తారు

*******

స్వయంగా ప్రకాశించలేరు

సహజంగా పరిమళించలేరు

సప్తవర్ణాల్ని ప్రతిఫలించలేరు

రకరకాల 

స్వప్నాల్ని అల్లుతారు 

సహజత్వాన్ని సాగదీస్తారు

సౌందర్యాన్ని తగలేస్తారు 

ఆఖరి మెట్టు మీద 

పాతాళంలోకి జారిపడతారు 

*******

ఏది ఏమైనా 

సమాలోచనల సంఘర్షణలో ...

స్వర్గాన్ని 

నేలకు దించే ప్రయత్నం 

చేస్తారని ఆశ

- రవి మారుత్

( 'కోపోద్రిక్త స్వరం' నుండి)