Platonic love. 

రెండు మనసుల సంగమం. శరీరాల సంగమం కాదు. ఇద్దరు భావకుల రస సంగమం. ఇదేదో లేత వయసులో ఉన్న పిల్లల వ్యవహారం కాదు. ఓ గ్రామంలో పెద్దదిక్కుగా  గౌరవించబడే భావకుడు అందరి ముందు నాట్యం చేసే ఓ దేవదాసిల భావ సంగమం. ఇంత అతి సున్నితమైన, ఆటం బాంబు లాంటి అంశాన్ని తీసుకుని ఓ దృశ్యకావ్యంగా , కళాఖండంగా, కలకాలం రస హృదయులు గుర్తుంచుకునే విధంగా నిర్మించిన దాసరికి శత సహస్ర అభినందనలు . ఓ మల్లీశ్వరి, ఓ విప్రనారాయణ, ఓ శంకరాభరణం , ఓ మేఘసందేశం. అద్భుతం. 

నాకు గుర్తున్నంత వరకు మొదట విడుదల అయినప్పుడు ప్రేక్షకులు ఆదరించలేదు. Platonic love కన్విన్సింగుగా అనిపించలేదు. అర్థం అవటానికి, అర్థం చేసుకోవటానికి ప్రేక్షకులకు టైం పట్టింది. ఇందుకు దాసరి కూడా కారణమే. సినిమాలో ఎక్కడా వారు ఇరువురి మధ్య శారీరిక సంబంధం లేదు అని ఎస్టాబ్లిష్ చేయటానికి ప్రయత్నం కూడా చేయలేదు . ప్రేక్షకులకే వదిలేసినట్లుగా ఉంది. 

ఈ సినిమా కళా విజయానికి రమేష్ నాయుడు సంగీత దర్శకత్వం, దేవులపల్లి వేటూరిల సాహిత్యం, జేసుదాస్ సుశీలమ్మల గొంతులు, పసుమర్తి కృష్ణమూర్తి నృత్య దర్శకత్వం  ప్రధాన పాత్ర వహించాయి. దేవులపల్లి , వేటూరి చెరో నాలుగు పాటలు వ్రాసారు. జయదేవుడి అష్టపదుల నుంచి ఓ రెండు తెచ్చారు. అన్నీ ఆణిముత్యాలే. ఈ పాటల చిత్రీకరణ, వాటి అందానికి  కనపడకుండా ప్రేక్షకులకు కనిపించే , వినిపించే విధంగా ఆవిష్కరించిన వారు మరో ఇద్దరు ఉన్నారు. ఒకరు ఫొటోగ్రఫీ డైరెక్టర్ సెల్వరాజ్, మరొకరు ఆడియోగ్రాఫర్ స్వామినాధన్. వీరిద్దరికీ నంది అవార్డులు వచ్చాయి. 

మహాకవి కాళిదాసు విరచిత మేఘసందేశం దాసరికి ప్రేరణ అయిఉండాలి. ఆకాశ దేశాన ఆషాఢ మాసాన మెరిసేటి ఓ మేఘమా విరహమో దాహమో విడలేని మోహమో వినిపించు నా చెలికి మేఘసందేశం. వేటూరి వారు ఏం వ్రాసారు ! తగ్గట్టుగానే జేసుదాస్ గాత్రం. బ్రహ్మాండమైన డిక్షన్. ఈ పాటకే జేసుదాసుకు జాతీయ స్థాయిలో ఉత్తమ నేపధ్య గాయకుడి అవార్డు వచ్చింది. 

జయదేవుని అష్ట విధ నాయికలలో ఒకరు విరహోత్కంఠిత. ఆయన వ్రాసిన రాధికా కృష్ణా తవ విరహే కేశవా స్థన విని హితమపి హారముదారం పదాలకు జయప్రద నృత్యం చాలా బాగుంటుంది . జేసుదాస్, సుశీలమ్మలు చాలా శ్రావ్యంగా పాడారు. 

ప్రియే చారుశీలే పాటలో జయప్రద, సుభాషిణిల నృత్యం చాలా బాగుంటుంది. సుభాషిణి కూడా జయప్రదతో పోటీ పడింది. జేసుదాస్, సుశీలమ్మలు పాడారు. 

దేవులపల్లి వారు వ్రాసిన ముందు తెలిసిన ప్రభూ మందిరమిటులుంచేనా పాటకు ప్రాణం పోసింది సుశీలమ్మ . నవరస సుమ మాలికా నా జీవనాధార నవరాగ మాలికా అంటూ సాగే వేటూరి వారి పాటను హంపిలో చిత్రీకరించారు . జయప్రద నృత్యం కన్నుల పండగే. 

వేటూరి వ్రాసిందే నిన్నటిదాకా శిలనయినా నీ పదము సోకి గౌతమినయినా. ఈ పాటలో కూడా జయప్రద నాట్యం చాలా బాగుంటుంది. 

ఈ సినిమాకు హైలైట్ బాల మురళీకృష్ణ పాడిన పాడనా వాణి కల్యాణిగా వరరాణి పాదాల పారాణిగా. వేటూరి తాండవించారనే చెప్పాలి ఈ పాటలో. ఈ కచేరీ ఒకవైపు జరుగుతుంటే మరోవైపు జయప్రద నృత్యం. హేట్సాఫ్ టు దాసరి. 

 దేవులపల్లి వ్రాసిన మరో ఆణిముత్యం శీతవేళ రానీయకు శిశిరానికి చోటీయకు ఎద లోపల పూలకారు ఏనాటికి పోనీయకు. ఆ పూలకారు పదం ఎక్కడ నుండి దిగుమతి చేసారో మహానుభావుడు. జేసుదాస్, సుశీలమ్మలు పాడారు. ఆయన వ్రాసిందే మరో పాట చాలా హిట్టయింది. ఆకులో ఆకునై పూవులో పూవునై కొమ్మలో కొమ్మనై నునులేత రెమ్మనై. ఎంత శ్రావ్యంగా ఉంటుందో ! ఆయనదే మొదటి రాత్రి పాట సిగలో అవి విరులో అదరుపొదలో అత్తరులో  శ్రావ్యంగా ఉంటుంది. 

మధ్య వయసు ప్రేమను తీసుకుని కత్తి మీద సాము చేసిన దాసరి మధ్యలో అక్కినేనిని మందు కొట్టని దేవదాసుని కూడా చేస్తారు. కమర్షియల్ చిత్రాలను విజయవంతంగా తీసే దాసరి విశ్వనాధ్ లాగా, బి యన్ రెడ్డి లాగా ఒక దృశ్య కావ్యాన్ని అవార్డుల వర్షంతో తెలుగు సినీ రంగానికి అందించారు. 

జాతీయ స్థాయిలో నాలుగు అవార్డులు వచ్చాయి. రమేష్ నాయుడికి, దాసరికి, జేసుదాసుకి, సుశీలమ్మకు. ఆరు నంది అవార్డులు వచ్చాయి . జయసుధకి , అక్కినేనికి, దాసరికి, సెల్వరాజుకి, రమేష్ నాయుడికి, స్వామినాధనుకి. ఉత్తమ చిత్రంగా ఫిలింఫేర్ అవార్డు . 

ఇలాంటి కళాఖండం అక్కినేని 200వ చిత్రంగా రావడం అక్కినేనికి గొప్ప కానుకే. ఇద్దరు హీరోయిన్లు తమ తమ పాత్రలకు ప్రాణం పోసారు . మరో ప్రధాన పాత్రలో జగ్గయ్య నటించారు. జయప్రద తమ్ముడు రాజబాబు కూడా కనిపిస్తాడు. 1982 అక్టోబర్ 24 న విడుదల అయింది . 

సంగీత , సాహిత్య , నృత్య విద్యార్ధులకు ఒక సబ్జెక్ట్ లాంటిది ఈ సినిమా. ఇంతటి కళాత్మక చిత్రం చూడకపోతే ఎలా ! నేనయితే ఎన్నిసార్లు చూసి ఉంటానో ! సినిమా, పాటలు అన్నీ యూట్యూబులో ఉన్నాయి. It's a musical and visual feast  ఆస్వాదించండి.