*అసలైన అందం అంటే అర్థం ఏమిటని తెలుసా ?*

*ప్రతి మనిషిలో ఒక అందం ఉంటుంది.*

*ఆ అందానికి మెరుగులు దిద్దేది అలంకారం.*

*కానీ నిజమైన అందం అంటే ఇతరులను ఆకర్షించే విధంగా ఉండేది కాదు. అలాగే అలంకారం అంటే శరీరానికి రంగుల మెరుగులు అద్దడం కాదు.*

*మనిషికి నిజమైన అందాన్ని ఇచ్చేది*

*ఏమిటంటే అతడు మాట్లాడే మాటతీరు.*

*దానికి మెరుగులు దిద్దడం అంటే మాట్లాడే ప్రతి మాటను ఆలోచించి ఎదుటి వారి మనసును ఆకర్షించే విధంగా మాట్లాడటం.*

*అలా ఆలోచించకుండా, అర్థం లేకుండా మాట్లాడడం అంటే "గురి చూడకుండా బాణం వదలడం లాంటిది ".*

*ఏదైనా ఒక మాట మాట్లాడితే, ఆ మాట మాట్లాడిన తరవాత తిరిగి ఆలోచించాల్సిన అవసరం రానే రాకూడదు. కాబట్టి ఏది మాట్లాడినా ఆలోచించి*

*ఆచి తూచి మాట్లాడాలి.*

 *నిజానికి  మాట్లాడడం ఒక కళ. ఏది, ఎప్పుడు, ఎక్కడ, ఎలా, మాట్లాడాలి అనేది కూడా ఒక అద్భుతమైన విద్య. నాలుకను అదుపు చేసుకోగల విద్య తెలిస్తే, అనేక విద్యలు అవలీలగా ఒంట పడతాయి. నోటిని అదుపులో పెట్టుకుని అందరితో మర్యాదగా మాట్లాడుతూ, పద్ధతిగా నడుచు కుంటూ ఉంటే అలాంటి వాడికి ఎక్కడైనా, ఎప్పుడైనా మంచే జరుగుతుంది.*

*చెట్టు యొక్క సారం పండులో వ్యక్తం అయినట్లుగా, మనిషి యొక్క సారం అతడి మాటలో తొంగి చూస్తూ ఉండాలి.*

*ఎవరైతే మంగళ కరమైన మాట తీరును కలిగి ఉంటాడో, అది ఆ మనిషి సంస్కారానికి గీటురాయిగా నిలుస్తుంది.*

 *‘తాను ఏం మాట్లాడాలో తెలిసినవాడు తెలివైనవాడు. తాను ఏం మాట్లాడ కూడదో తెలుసుకో గలిగినవాడు వివేకవంతుడు’.*

 *ఎవరైతే తమ మాటల వల్ల, చేతల వల్ల ఇతరులకు బాధ కలిగించ కుండా ఉంటారో వారే ఉత్తమ పురుషులు.*

 *ఆచరిస్తూ చెప్పే మాటలకు ఆదరణ ఎక్కువ. ఆదరణ పూర్వకంగా చెప్పే మాటలకు ఆచరణ ఎక్కువ*

*ఆకట్టుకునేలా మాట్లాడటం అనే ఓ కళ. అయితే ఆ మాటలను ఎప్పుడు, ఎలా మొదలు పెట్టాలో, ఎప్పుడు, ఎలా ఆపాలో తెలియడం మరీ గొప్ప కళ. మాటలే మంత్రాలు, మాటలు చురకత్తుల కన్నా చాలా పదునైనవి కనుక వాటిని జాగ్రత్తగా వాడాలి, లేదంటే ఎదుటి వారి సున్నితమైన మనసును మాటల రంపాలతో పరపర కోసినట్లే అవుతుంది.*

*ఈ మాటలు అనేవి మనసుపై వత్తిడి తెచ్చేంత బలమైనవి కనుక సున్నితంగా వాడాలి, ఈ మాటలనేవి ఆణి ముత్యాల కన్నా ఖరీదైనవి కనుక పొదుపుగా వాడాలి.*

 *మాట్లాడటం అందరూ చేస్తారు. అయితే తను మాట్లాడే మాటలను అందరిలాగా కేవలం నోటితో మాట్లాడితే సరిపోదు.*

*ఆ మాటలు మరింత ప్రభావ వంతంగా ఉండాలంటే, హృదయాంతరాల్లోని మనసుతో మాట్లాడాలి, అంతేకానీ కేవలం శరీరంలో ఉన్న మామూలు నోటితో కాదు.*

*మనమాటే మన సంపదలకు మూలం. ఆ సంపదలే మానవ సంబంధాలకు మూలం. మనం మాట్లాడే మాటలే మనకు స్నేహితుల్ని సంపాదించి పెడతాయి, ఆ మాటలే మనకు శత్రువుల్నీ కూడా తయారు చేస్తాయి.*

*అందుకే అన్నారు ఎవరినీ 'నొప్పింపక తానొవ్వక తప్పించుకు తిరుగువాడు ధన్యుడు సుమతీ ' అని అన్నారు. అలాంటి వారికి శత్రువులే ఉండరు.*

*కటువైన మాటలు ఇతరుల హృదయాలను గాయపరచ గలవు, అలాగే కమ్మనైన తియ్యటి మాటలు మనసులోని గాయాలను నయం చేయనూగలవు.*

*కానీ తియ్యని మాటలతో గొంతులు కోసేవారు కూడా ఉన్నారు. అలాంటి వారి విషయంలో తగు జాగ్రత్తలు తీసుకోవాల్సిన బాధ్యత మనపైనే ఉంది. మన సరైన మాటతీరు మనల్ని చంపడానికి వచ్చిన శత్రువు యొక్క మనసును కూడా మార్చగలదు*

*మాటలు, పదాలు అనేవి కమ్మగా వండిన పాయసంలో వేసిన జీడిపప్పు, కిస్మిస్లాగా ఉండాలి. మనం మాట్లాడే మాటల మధ్యలో సందర్భాను సారంగా మనం చెప్పే సామెతలు అనేవి జీడిపప్పు లాగా, మనం చెప్పే లోకోక్తులు పాయసంలోని కిస్మిస్ లాగ అతి మధురమైనవిగా ఉంటూ ఆ మాటల పదాలు, వినేవారికి మరింత మధురంగా, తియ్యగా, కమ్మగా, వినసొంపుగా అనిపిస్తాయి.*

  *ఎవరితో, ఎప్పుడు, ఎలా మాట్లాడాలో తెలిసి ఉండాలి. ఈ విషయంలో రామాయణంలో నాయకుడైన పురుషోత్తముడి వంటి శ్రీరామచంద్రుడిని, సుందరకాండకు నాయకుడైన సుందరమూర్తి హనుమంతుడిని మనం ఆదర్శంగా తీసుకావాలి.*

 *మనిషికి హావభావ వ్యక్తీకరణ గొప్ప ఆస్తి. ఏం చెప్పాలి అనేదాని కన్నా, ఎలా చెప్పారనే దాన్నిబట్టి భావ ప్రకటన మరింత ఆకర్షణీయంగా ఉండాలి.*

*మన హావభావ వ్యక్తీకరణ ఎంత గొప్పగా ఉంటుందో దాని యొక్క ఫలితం కూడా అంత మహత్తరంగా ఉంటుంది.*