(293) (09.06.2025)

నాడు బిడ్డను కని వదిలేసింది కుంతి

నేడు కడుపున  పుట్టిన బిడ్డనే కాదనుకుంది ఈ ఇంతి

పెళ్లి కాకుండా కన్నందుకు తాను బాధ పడితే

నేడు పేదరికంతో నా బిడ్డను నే దూరం పెడితే //

అమ్మ అన్న పిలుపు కోసం ఎందరిదో ఆరాటం

బిడ్డ పెంపకం కోసం నా  బ్రతుకంతా పోరాటం

18 ఏళ్ల వయసులో మనసు పెళ్లి వైపు మళ్ళితే

ఆపై మెడలో మూడు ముళ్ళు పడితే //

పెళ్లికి ముందు నేను ఏవేవో ఉహించుకుంటే

పేదరికం ప్రతి విషయంలో అడ్డు పడుతుంటే

కడుపున పుట్టిన బిడ్డను పెంచలేక

అలా అని బిడ్దను దూరం చేసుకోలేక //

ప్రతి నిమిషం ఎంతగానో కుమిలి పోయినాను

చదువులేదని కొలువు కూడా చేయలేక పోయినాను

చిన్న చిన్న కోర్కెలు కూడా తీర్చలేక పోయాను

ఎన్నో సరదాలను బిడ్డకు  దూరం చేసినాను //

అందుకే నేడు ఈ నిర్ణయము

పాపకు ఇవ్వాలనుకున్నా అందమైన జీవితము

త్వరలో తాను దత్తత వెళుతుంది

తాను అయినా ఇక ముందు సుఖపడుతుంది //

అపుడపుడు చూచుకునే వెసులు బాటు కల్పించారు

నేనే తల్లిననే విషయం  మటుకు తనకు చెప్పవద్దని మాట తీసుకున్నారు

నేటికి ఆ  మాట మీదే ఉన్నాను

ఏనాడు నోరు తెరవకున్నాను //

నేడు ఆమె ఇద్దరు బిడ్డలకు తల్లి అవ్వగా

ఉన్న వారింట తాను కాలు పెట్టగా

నే పొందలేని ఆనందం తాను పొందింది

నాడు నెరవేరని కల నేడు బిడ్డ రూపంలో నెరవేరింది //

నాడు కుంతి కోరిక కలలాగే మిగిలిపోయింది

నేడు ఈ ఇంతి కోరిక  నెరవేరింది

జీవితంలో పేదరికం కూడా ఓ అనుభవమే

కడుపున పుట్టిన  బిడ్డ రూపంలో ఆనందం కూడా సంభవమే //

మధిర వెంకట రమణ, హైదరాబాద్