*****నా స్వస్థానం - గాఢనిద్ర

 నా స్వస్థానం - గాఢనిద్ర

_______

నాకు సత్యం తెలియబడితే, 

నా కుటుంబానికి ఏమైనా మేలు ఉంటుందా?

అని అడిగారు శ్రావణిగారు.

* * *

నా కల నుండి నేను మేలుకుంటే, 

నా కలలో ఉన్నవారికి ఏదైనా మేలు ఉంటుందా? అని ప్రశ్నించడం లాంటిదే.

'మేలు' పొందటానికి అసలక్కడ ఎవరూ ఉండరు.

సత్యసాక్షాత్కారం అంటే-

"మెలకువ నుండి మెలకువ."

ఈ నిజమైన మెలకువలో 'నేను'కు తప్ప 

ఎవరికీ, దేనికీ ఉనికి ఉండదు.

నేను అంటే శ్రావణీ అని కాదు.

శ్రావణీ కూడా కలలో భాగమే.

నిజానికి కల-మెలకువలు రెండూ - అసత్యమే(కలే).

గాఢనిద్ర ఒక్కటే - సత్యం(నిజమైన మెలకువ)

కల,మెలకువలో కలిగే సమస్యలకు

కల, మెలకువలోనే పరిష్కరించుకోవాలి.

సత్యసాక్షాత్కారం అనేది గాఢనిద్ర వంటిది.

అక్కడ "నేను" అన్న పరమానందకరమైన 

ఎఱుక తప్ప మరే సమస్యా ఉండదు.

సత్యసాక్షాత్కారంలో(అనగా గాఢనిద్రలో)

ప్రపంచమూ ఉండదు, కుటుంబమూ ఉండదు.

* * *

అజ్ఞాని-  

తన స్వస్థానం మెలకువ అని,

అప్పుడప్పుడు నిద్రలోకి వెళ్లి వస్తుంటానని

అనుకుంటాడు.

జ్ఞాని-

తన స్వస్థానం గాఢనిద్ర అని,

అప్పుడప్పుడు కల,మెలకువలోకి వచ్చిపోతుంటాను అని ఉంటాడు.

* * *

అజ్ఞాని -

ఎఱుక లేకుండా మెలకువలోకి(ప్రపంచంలోకి) జారుతాడు.

తిరిగి ఎఱుక లేకుండా గాఢనిద్రలోకి(స్వరూపంలోకి)వెళతాడు.

జ్ఞాని- 

సంపూర్ణ ఎఱుకతోనే మెలకువలోకి(ప్రపంచంలోకి) జారుతాడు. 

తిరిగి ఎఱుకతోనే గాఢనిద్రలోకి(స్వరూపంలోకి) వెళతాడు.

అందువల్లనే -  

అజ్ఞాని మెలకువను "ఇల" అన్నారు.

జ్ఞాని మెలకువను "కల" అన్నారు.

అజ్ఞాని నిద్రను - మైమరపు అన్నారు.

జ్ఞాని నిద్రను - మెలకువ అన్నారు.

అజ్ఞాని రాకడను - జన్మించడం అన్నారు.

జ్ఞాని రాకడను - అవతరించడం అన్నారు.

అజ్ఞాని పోకడను - నిర్యాణం అన్నారు.

జ్ఞాని పోకడను - నిర్వాణం అన్నారు.

నిద్ర-మెలకువ 

రాకడ-పోకడ 

ఇద్దరికీ సమమే.

"ఎఱుక" ఒక్కటే తేడా.

* * *

కలలు మెలకువలు కలయని ఎరిగిన

మెలకువ తానే అనిలాచలా! 

అన్నారు మన గురువుగారు.

ఇది మెలకువలో ఉండవలసిన ఎరుక.

ఇది సాధన.

"ఎఱుక మరచు చోట ఎఱుగుట బ్రహ్మంబు" అన్నాడు మనవేమన.

ఎఱుక మరచు చోటు - నిద్ర.

నిద్రలో నేనున్నాను అన్న ఏఱుక తోడైతే అదే బ్రహ్మము.

ఇది నిద్రలో ఉండవలసిన ఎరుక.

ఇది సిద్ధి.

* * *

ఎరుక లేని నిద్ర - మామూలు నిద్ర - జడం.

ఎరుకతో కూడిన నిద్ర - గాఢనిద్ర - చైతన్యం.

ఈ ఎరుకతో కూడిన నిద్రకే తురీయం అని శాస్త్రీయనామం.

* * *

జ్ఞానికి ఈ కల, మెలకువలు విహారస్ధానాలు.

విహారం పూర్తయ్యాక, 

తన తనువుతో సహా అన్నిటినీ విడిచిపెట్టి 

తన స్వస్థానమైన గాఢనిద్రలోకి(స్వరూపంలోకి) వెళ్లిపోతాడు.

అక్కడ "రెండు" లేని "ఒకటి"గా ఉంటాడు.

ప్రశ్న లేని "సమాధానం"గా ఉంటాడు.

లో-వెలి లేని "బట్టబయలు"గా ఉంటాడు.

* * *

జ్ఞానికి-

"కల-మెలకువ-నిద్ర" అనేది - విహారం.

గాఢనిద్ర అనేది - స్వరూపం.

రండి...అందరం గాఢనిద్రలో  "ఏకం" అవుదాం.