(297) (13.06.2025)

ఎక్కడో ఓ మారుమూల పల్లె నుంచి ఈ పట్టణానికి వచ్చినాను  

ఈ పట్టణంలో ఓ చిన్న కొలువులో చేరినాను 

అనుకోకుండా మన ఇద్దరికి పరిచయం అయింది

ఆ పరిచయం మూడు ముళ్ళకు దారి తీసింది //

పెళ్ళైన కొత్తల్లో ఎన్నో-ఎన్నెన్నో ఇబ్బందులు పడినాము

నీ-నా వాళ్ళను ఎవరిని సహాయము చేయమని అడగకున్నాము

మన రెక్కల కష్టంతో ఓ చిన్న ఇల్లు కట్టుకున్నాము

మనం ఇద్దరము – మనకు ఇద్దరు అంటూ ఉంటున్నాము //

కడుపున పుట్టిన బిడ్డలను చదివించుకుంటూ

మనకు ఉన్న దానిలోనే కలో-గంజో తింటూ

పిల్లలను వృద్ధిలోనికి తెచ్చినాము

ఈ రోజు ఎంతో ఆనందంగా ఉంటున్నాము  //

పెళ్ళిళ్ళు – కాపురాలు అంటూ వాళ్ళు వేరు కాపురం పెట్టగా

మరల మన మిద్దరము ఒంటరి అవగా

నాటి కొత్త కాపురం కబుర్లు ప్రతి రోజూ గుర్తు చేసుకుంటున్నాము

సాయంత్రం పూట సమయాన్ని ఆనందంగా గడిపేస్తున్నాము //

ఆనందంగా నడుస్తున్న పడవ ఓక్కసారిగా ఊగిస లాడింది

నీకు క్యాన్సర్ అన్న విషయం డాక్టర్ చెపితే తెలిసింది

ఇది నీకు ఆఖరి స్టేజ్ అని

రోజులు దగ్గర పడుతున్నాయని

గుండె ఆగిపోయే వార్త ఒకటి చెప్పినారు

బంధు-మిత్రులకు కబురు పెట్టుకోమన్నారు //

ఏన్నో ఏళ్ళ తరువాత మనకు ఇపుడే ఏకాంతము లభించింది

మన ఇద్దరికి ఒంటరిగా  గడిపే సమయం దొరికింది

ఇపుడే ఈ విషాదకర వార్త మన చెవిన పడింది

మన ఇద్దరి ఆనందం ఆవిరి అయింది //

మనము ఏదేదో ఊహించుకుంటే

మనం నమ్మిన ఆ దేవుడు మన తల రాత మారుస్తుంటే

నాడు ఎన్నో కష్టాలు పడ్డాము

నేడు ఆనందంగా ఉండాల్సిన సమయంలో బాధ పడుతున్నాము //

ఈ చివరి క్షణాల్లో నిను కంటి రెప్పలా చూచుకుంటా

నీకు ఎటువంటి కష్టం రాకుండా నీ వెన్నంటి ఉంటా

నీ ఆఖరి క్షణాలు నీవు ఎంతో ఆనందంగా గడపాలి

నీ చిన్ని చిన్ని కోరికలు ఏమైనా ఉంటే తీర్చుకోవాలి //

ఎంత ఖర్చు అయినా భరిస్తాను

నీ మనసులోని కోరికలన్నీ తీరుస్తాను

నే కోరు కునేది నీవు ఆఖరి క్షణం వరకు ఎంతో ఆనందంగా ఉండాలి

ఇలా ఆనందంలో ఉండగానే నీవు కను మూయాలి //

ఈ భూమి మీదకు వచ్చినందుకు  మరణం తప్పదు

అందులో ఆరోగ్యంగా వెళ్ళిపోవడం అన్నది అందరికి దక్కదు

మన మిద్దరం సునాయాస మరణాన్ని కోరుకున్నాము

ఇలా జరుగుతుందని ఏనాడూ ఊహించకున్నాము //

ఇక నీవు నీ అనారోగ్యం గురించి ఆలోచించకు

నీ మనసులో అనవసరమైన ఆలోచనలు పెట్టుకోకు

ఆ భగవంతుడు నాకు నీకు సేవ చేసే భాగ్యం కల్పించినాడు

నాడు నీవు చేసిన సేవకు ఈ విధంగా రుణం తీర్చుకోమన్నాడు //

ఈ రోజు నుంచి నాకు ఎవరితోనూ సంబంధం లేదు

నిను విడిచి ఓ క్షణం కూడా ఎక్కడికి వెళ్ళేది లేదు

24 గంటలు నీ కనుసన్నలలో ఉంటా

అన్ని పనులు పక్కన పెట్టి నీకు సేవ చేసుకుంటా //

అనుకున్న రోజు రానే వచ్చింది

నా దేవి ఎంతో ఆనందంగా కను మూసింది

ఆఖరి క్షణం వరకూ నేను  ఆమెతోనే గడిపాను

ఆమె ఆఖరి కోరిక కూడా తీరుస్తాను //

ఆమె కోరింది ఇంటి ముందు ఓ పాలరాతి విగ్రహాము

ఆపై ఆమె మెడలో ప్రతి రోజూ ఓ పూల హారము

నాలో ఊపిరి – ఓపిక ఉన్నంత వరకు ఆమెకు సేవ చేసుకుంటాను

ఆమె తలంపుతో ఆఖరి క్షణాలు ఎంతో ఆనందంగా గడిపేస్తాను //

మధిర వెంకట రమణ, హైదరాబాద్