(300) (16.06.2025)

ఓ శ్రీమతి నీవు గుమ్మం వరకు వచ్చినావు  

ఆపై అక్కడి నుంచి నీవు వెనుదిరిగినావు

ఈ రోజుతో మన ఇద్దరి మధ్య బంధం తెగిపోయింది

ఆపై పిలిచే పిలుపు కూడా ఆగిపోయింది //

నిన్నటి వరకు నన్ను నా తోడు అని చెప్పుకున్నావు

ఈ రోజు నుంచి నాకు తోడు ఎవరని అడుగుతున్నావు

నాడు మూడు ముళ్ళతో నీకు తోడుగా వచ్చినాను

నేడు ఆ మూడు ముళ్ళనే నీకు దూరం చేసినాను //

ఇక నుంచి నీకు తోడు నీ కడుపున పుట్టిన బిడ్డలు

నాటి మూడు ముళ్ళకు నేడు వారే సాక్ష్యాలు

నేటి నుంచి వాళ్ళల్లోనే వెతుక్కోవాలి ఆనందము

ఊపిరి ఉన్నంత వరకు నెట్టుకురావాలి నీ జీవితము //

నిన్నటి వరకు పేరు పెట్టి పిలిస్తే పలికినావు

నేటి నుంచి నీతో ఉన్న బంధాన్ని బట్టి పిలిస్తే జవాబు ఇస్తావు

ఒక్క రోజులోనే పిలుపులో ఎంతో మార్పు వచ్చింది

ఆ మార్పు నీలో ఊపిరి ఉన్నంత వరకు కనిపిస్తుంది //

మధిర వెంకట రమణ, హైదరాబాద్