*`నాన్నా..`*

*మూడు తరాల తర్వాత ఇంట మొదటి అడపిల్లనని..*

*తతగారివైపు..నానమ్మ వైపు ఇంట్లో మొదటి బిడ్డనని నన్నెంతో ముద్దుగా పెంచారు..*

*నాన్నా అని మిమ్మల్ని ఒక్కరినే పిలిచినా...మీ నాన్న కూడా నాకు నాన్నేగా..*

*మీరు అమ్ములు అంటే తాతగారు అమ్మా అంటూ*

*ఎప్పుడూ నా వెన్నంటి ఉండేవారు..*

*ఒకరి కూతురుగా ...మరొకరి మనవరాలిగా..నేనెంతో అదృష్టవంతురాలిని..*

*మీరెప్పుడూ నాకు గొప్పగానే కనిపిస్తారు..*

*గంభీరంగా..కోపంగా..అచ్చంగా మన పెంకుటింటి పెద్ద దూలంలా..*

*మీ మీదనే ఇల్లంతా ఉన్నా..ఓ మాట అనరు..*

**కర్తవ్యమే అది అన్నట్టు ఉంటారు..*

*నీ కాళ్ళపై ఊగిన ఉయ్యాల ఇంకా గుర్తే..*

*వద్దులే నాన్నా అంటే..*

*రా తల్లీ నా కాళ్ళ నొప్పులు తగ్గుతాయని మీరన్నప్పుడు ..*

*నీ వేలు పట్టుకు నడిచిన అడుగులు..*

*ఎలా ఉండాలో నేర్పుతూ చెప్పిన కథలు..*

*వద్దన్నది చేసినప్పుడు అలకలు..*

*కాస్త జ్వరానికే మీ కళ్ళలో నీళ్ళు..*

*అలసి ఇంటికొచ్చినా వాడని చిరునవ్వులు..*

*ప్రతీ పుట్టినరోజున వేసిన మొక్కలు ..*

*అవి పెరుగుతుంటే ఆ కళ్ళలో మెరుపు ఇప్పటికీ గురుతే...*

*చిన్న విషయాలకు పెద్ద హోదా ఇచ్చే పల్లెల్లో..*

*కొన్ని అనవాయితీలను....*

*మరికొన్ని అనవసర సంప్రదాయాలను కుదరదంటే కుదరదని*

*మీ అమ్మ మాటని కూడా కాదని మాకెంతో స్వేచ్చనిచ్చి పెంచారు..*

*ఏడవ తరగతిలో అనుకుంటా సైకిల్ నేర్చుకుంటా అంటే..*

*సైకిల్ తొక్కటం నేర్పించొద్దని నానమ్మ దెబ్బలాటకి..*

*నానమ్మకు నచ్చ చెబుతూ మీరు..*

*నాకు మీ బజాజ్ చేతక్ నేర్పుతూ తాతగారు..*

*ఊరంతా ముక్కున వేలేసుకున్నా  గర్వంగా తలెత్తి చూస్తూ .నా కూతురనేవారు.. ఇప్పటికీ.. ఎప్పటికీ గుర్తే..*

*నేనెప్పుడు  పెరిగానో..*

*అంత పెద్దదాన్ని ఎప్పుడు అయ్యానో అప్పుడే పెళ్లా..*

*అని ఆలోచనల్లో ఉండగానే పెళ్లి పిల్లలు..*

*`నాన్నా..`*

*అప్పటివరకు మీరు నాకు నాన్న..*

*నేను అమ్మయ్యాక మీరు నాకు పసిపిల్లాళ్ళా అనిపించారు.*

*నా పిల్లలతో పిల్లల్లా కలసిపోయి మీరాడే ఆటలు..*

*అమ్మ నాదంటే నాదని పిల్లలంటంటే*

*అమ్ములు నాదని మీరు చేసే  అల్లరి..అలకలు...*

*పిల్లలకు నా గురించి మీరు చెప్పే కథలు..*

*మీలో మరో పసివాడిని గుర్తు చేస్తాయి..*

*వారికి జాగ్రత్తలు చెబుతూ మీకు కూడా చెబుతుంటే*

*మీ పెదాలపై విరిసే నవ్వు...* *కళ్ళలో సన్నటి నీటి పొర..*

*మీ నుండి దూరం పంపిన ప్రతీసారి ఎదో పనుందని మేం బయలుదేరే వరకు వచ్చేవారు కాదు..*

*రాకుండా ఉండలేక వచ్చాక వదల్లేక మీరు పడే వేదన తెలుస్తూనే ఉంటుంది..*

*మీరు చెప్పిన కొన్ని మాటలు ఎప్పటికీ గుర్తే..*

*మనపై మనకున్న నమ్మకాన్ని కానీ...*

*ఎదుటి మనుష్యులపై ఉండే నమ్మకాన్ని కానీ వదలొద్దని...*

*నమ్మకమే మనల్ని నడిపించే శక్తి అని..*

*నిజమే అనిపిస్తుంది...*

*`నాన్నా...`*

*నమ్మకాన్ని..విశ్వాసాన్ని నింపి..*

*నడకను...నడవడికను నేర్పే నాన్నకు....*

*నీడై...తోడుండే నాన్నకు*

*ధైర్యమై...దారి చూపే నాన్నకు*

*నిజమై..నిలకడై నిలిచే నాన్నకు...*

*కష్టమైనా....ఇష్టమై సాగే నాన్నకు*

*కన్నీటిని దాచేసి..గాంభీర్యాన్ని మాత్రమే చూపే నాన్నకు..*

*మూసినా తెరిచినా కంటిలోనే నిలుపుకునే నాన్నకు...*

*కలవరాల్ని సైతం కలల వరాలుగా ఇచ్చే నాన్నకు...*

*ఇంకో తరాన్ని చూసినా తన బిడ్డ మాత్రం ఇంకా చంటి పాపే అనుకునే నాన్నకి...*

*బిడ్డల బిడ్డలతో ఆడుకుంటూ తానూ పసిబిడ్డయ్యే నాన్నకు..*

*ఎక్కడ ఏం తప్పటడుగులు వేస్తామో అని అడుగులు తడబడనీయని నాన్నకు ప్రేమతో...!*