అలసిపోతుంటాను
నిజంగానే విసుగుజెందేస్తుంటాను
పుట్టిన రోజు నాడూ....
పెళ్ళి రోజు నాడూ ....
ఏదీ పార్టీ ....
ఎలా సెలబ్రేట్ చేసుకున్నారూ....
ఒకరికొకరు ఏమేం గిఫ్ట్స్ ఇచ్చిపుచ్చుకున్నారూ ...
అంటూ తెగ హడావిడి చేసేస్తుంటారు సన్నిహితులు
వాళ్ళను
నిరాశపరచడం ఇష్టం లేకా
కేవలం
వాళ్ళను సంతృప్తిపరచడం కోసమే...
గ్రేండ్ పార్టీలూ
కాస్ట్లీ బహుమతులు ...
అవుట్ డోర్ టూర్లూ
హమ్మో ....
ఎంత అవమానం.
అలా మన సంతోషాన్ని ప్రకటించకపోతే
చీప్ అయిపోదూ మన స్టేటస్
**********
'ఊపిరి' సినిమా చూసే ఉంటారు....
స్నేహితుడు ప్రకాష్ రాజ్... పీ.ఏ. తమన్నా.... ఏవేవో సర్ప్రైజ్ లు ప్లాన్ చేస్తుంటారు నాగార్జునను ఆశ్చర్యానందాలకు గురిచేయడం కోసం
వాళ్ళను బాధపెట్టడం ఇష్టం లేక నిజంగానే విశ్మయానందాలకు గురైనట్లు తెగ నటించేస్తూ ఈసురోమని నిట్టూరుస్తుంటాడు నాగార్జున
ఇంచుమించుగా ఇదే నా పరిస్థితీనూ పెళ్ళి రోజునాడూ పుట్టిన రోజునాడూ
***********
నిజానికి ప్రేమను ప్రకటించే భాషలు వేరు.
ఏరా పొద్దున్నే లేవటం చేతకాదా అని నాన్న ప్రకటించే అసహనంలో ....
పొద్దున్నే లేచి గబగబా తయారవకపోతే ఎలా రా అని విసుక్కునే అమ్మ తీయని నిరసనలో....
ఎలా ఉన్నావు అంటూ యథాలాపంగా వాకబు చేసే తోబుట్టువుల మాటల్లో .....
నాన్నా ... అంటూ రెండు చేతులు చాపుకుని పరిగెత్తుకు వచ్చే చిన్నారి కళ్ళల్లోనే వెలుగులో
అలసి కుర్చీలో జారగిలవడితే ఏం నలతగా ఉందా అంటూ నుదిటిపై చేయి వేసే శ్రీమతి స్పర్శలో....
కనిపిస్తుంది నాకు నిజమైన ప్రేమ ....
********
నన్ను చూడగానే
ఆనందంతో మెరిసే కళ్ళు
చిరునవ్వుతో విచ్చుకునే పెదాలూ
ఇవీ నాకు నిజమైన బహుమతి నా దృష్టిలో....
ఖరీదైన బహుమతి అందుకోవడం కన్నా
ఓ మంచి పుస్తకం అమూల్యమైన కానుక నాకు
కేక్ కటింగ్ ... మిఠాయిలు పంచడం....
హేపీ బర్త్ డే టూ యూ... అనే పెడబొబ్బలకన్నా
ఏకాంతంగా మంచి పాట వినడం ఇష్టం నాకు
సినిమా షాపింగ్ షికార్లు అంటూ హడావిడి చేయడం కన్నా
ఏ పొలం గట్టునో ఓ నదీ తీరంలోనో పచ్చని చెట్లమధ్యో తిరగడం ఇష్టం నాకు.
ఎంజాయ్మెంట్ అంటే
మేం చాలా సంతోషంగా ఉన్నాం సుమా ... !
అంటూ మందినీ గుంపునూ నమ్మించే చర్యలు కాదు ఎంతమాత్రం
నిజంగా మనసు లోతుల్లోంచి అసంకల్పితంగా పైకుబికే ఒకానొక భావోద్వేగమది
*********
సర్ప్రైజ్....
బిగ్ బిగ్ సర్ప్రైజస్....
ఏంటో తెలుసా నిజానికి.
ప్రతి ఉదయము
నిద్ర లేచి నిండుగా ఊపిరి పీల్చుకోవటం
కళ్ళు తెరిచి ఈ ప్రపంచాన్ని చూడటమే సర్ప్రైజ్
స్నేహం ప్రేమా... బాంధవ్యాలు
నువ్వు ఏడ్పు జాలి .... రకరకాల భావోద్వేగాలు
ఇవీ నిజానికి బిగ్ బిగ్ సర్ప్రైజ్లు
- రత్నాజేయ్ (పెద్దాపురం)
-
No comments:
Post a Comment