జీవితానికి సంబంధించిన చిన్ని రహస్యం

 జీవితానికి సంబంధించిన చిన్ని రహస్యం 

ఒక గురువు తనని దర్శించడానికి వచ్చిన ఒక వ్యక్తితో "జీవితానికి సంబంధించిన చిన్ని రహస్యం ఇది. ఎవరేం చెప్పినా, చివరికి గరువు చెప్పినా గుడ్డిగా అంగీకరించవద్దు. ఏదీ మరీ సీరియస్‌గా తీసుకోవద్దు. నవ్వడం నేర్చుకో-ప్రతిదాన్నీ చూసి చిరునవ్వు నవ్వడం నేర్చుకో. అప్పుడు నువ్వు జీవించడం ఎలాగో నేర్చుకుంటావు" అన్నాడు. ఆ వ్యక్తి గురువు మాటల్ని వింటున్నాడు. గురువు కొనసాగించాడు. "నా దగ్గర నలుగురు శిష్యులు వున్నారు. వాళ్ళు నా దగ్గరికి వచ్చినప్పుడు వాళ్ళకు గొప్ప శారీరక, ఆధ్యత్మిక శిక్షణ ఇచ్చాను. మొదటి శిష్యుడు బలహీనుడు. తట్టుకోలేక పారిపోయాడు. రెండవ శిష్యుడు జాగ్రత్తపరుడు. ప్రతిదాన్నీ మరీ తీవ్రంగా పట్టించుకుని పిచ్చివాడైపోయాడు. మూడవ శిష్యుడు తనకు అవసరమైన దానికన్నా ఎక్కువ మానసిక, శారీరక శిక్షణకు లోనై తట్టుకోలేక క్రిందపడి మరణించాడు. నాలుగవ శిష్యుడు మాత్రమే నెమ్మదిగా, హాయిగా, ఆరోగ్యంగా వున్నాడు" అన్నాడు.

ఆ వ్యక్తి "అతను అలా ఉండడానికి కారణం ఏమిటి?" అన్నాడు. గురువు "నేను చెప్పిన కఠిన శిక్షణకు సంబంధించిన ఒక వ్యాయామాన్ని ఆ శిష్యుడు పరిశీలించి బుర్ర ఉన్నవాడు ఎవడూ ఈ వ్యాయామం చెయ్యడు. మీరు చెప్పింది నేను చెయ్యగలను అనుకుంటే మిమ్మల్ని నేను పిచ్చివాడుగా భావిస్తాను మీరు చెప్పారు కదా అని నేను చెయ్యాలనుకుంటే నేనో పిచ్చివాడిని అన్నాడు, అందుకే నేను చెప్పింది చెయ్యడానికి అతను తిరస్కరించాడు" అని చెప్పి గురువు నవ్వాడు.

జీవితాన్ని ప్రతిక్షణం ఎంజాయ్ చేయాలంటే.. ఇప్పుడున్న బిజీ లైఫ్‌స్టైల్ కారణంగా జీవితాన్ని ఆస్వాదించే తీరిక ఎవరికీ ఉండట్లేదు. ఉరుకుల పరుగుల జీవితంలో మల్టీటాస్కింగ్‌ అవసరమే. కానీ, దీనివల్ల డబ్బు, హోదా వంటివి లభిస్తాయే కానీ, ఆనందం కాదు. మరి లైఫ్‌ను పూర్తిగా ఎంజాయ్ చేయాలంటే ఏం చేయాలి? జీవితాన్ని ఆస్వాదించాలంటే ముందు జీవితం వేగం తగ్గించాలి. హడావుడిగా చేసే పనితో మీకు శ్రమ అధికమవుతుంది తప్ప సంతోషం కనిపించదు. వంద పనులు ఒకేసారి చేసేబదులు ఏదో ఒక పనిని వందశాతం నిబద్ధతతో చేస్తే ఆనందం లభిస్తుంది. ఇష్టంగా ఆస్వాదిస్తూ చేసే పని మాత్రమే మీకు ఆనందాన్ని కలిగిస్తుంది

లైఫ్‌ని ఫుల్‌గా ఎక్స్‌పీరియెన్స్ చేయాలంటే గతాన్ని, భవిష్యత్తును తలుచుకుని బాధపడటం మానుకోవాలి. మన చేతుల్లో ఉన్న సమయాన్ని సద్వినియోగం చేసుకునే మార్గం ఆలోచించాలి. విలాసవంతమైన జీవితం గడపాలంటే డబ్బు అవసరమే. కానీ సంతోషంగా ఉండటానికి అవసరంలేదు. కుటుంబ సభ్యులు, స్నేహితులతో గడిపిన కొద్ది క్షణాలే మనకు జీవితాంతం గుర్తుండిపోతాయి. కాబట్టి మీ ప్రాధాన్యతలను మార్చుకోవాలి. మీ గురించి ఇతరులు ఏం అనుకుంటారో అని ఆలోచిస్తున్నంత కాలం జీవితంలో ఆనందం అనేది ఉండదు. కాబట్టి మనసులో ఒకటి పెట్టుకొని బయటకు మరోలా ఉండడం మానుకోవాలి. మీకు నచ్చినట్టుగా మీరు ఉండడం అలవాటు చేసుకోవాలి. అప్పుడే జీవితం బాగుంటుంది. అలాగే మిమ్మల్ని ఇతరులతో పోల్చుకోవడం మానేయండి. పోల్చుకోవడం వల్ల అసూయ ఏర్పడుతుంది. వారి దగ్గర ఉన్నది మీకు లేదన్న బాధ కలుగుతుంది. ఉన్న సంతోషం మాయమవుతుంది. వీటితోపాటు తినే ఆహారం, నివసించే ప్రదేసం, రోజూ కలిసే వ్యక్తుల మీద కూడా శ్రద్ధ వహించాలి. చేసే ప్రతి పని మీద పూర్తి ధ్యాస ఉంచాలి. ఇలా చేస్తే లైఫ్‌లో కొత్త డైమెన్షన్ ఓపెన్ అవుతుంది.