చిత్త భ్రాంతి కలుగుతోంది

చిన్మయము తొలగుతోంది

లౌకిక లంపటము

నన్ను బాధిస్తోంది

అభిలాష నిరుపయోగమౌతోంది

శాంతికాముకత పరిహసిస్తోంది

జన్మసంస్కారం మలినాలను

           తాకవద్దంటోంది

దేహస్వభావం విషయాలను

           వదలనంటోంది

చిక్కు సమస్యయే జీవనమైపోయింది

కర్మేంద్రియ సముదాయం

        తనవైపు తిప్పుకుంటోంది 

నారాయణోపదేశము

మనోబలాన్ని నూరిపోస్తోంది

ఆత్మ తత్వ వాసికి సంకటమేలంటోంది

హృదయాంతర శోధనకు

          విజయమేనంటోంది

తిరుగులేని తీర్పుయై నన్ను శాసిస్తోంది 

మంత్రబద్దమయ్యింది మానసము

పులకితమయ్యింది అంతరము

చిత్త భ్రాంతి తొలగుతోంది

చిన్మయము కలుగుతోంది

లౌకికము నన్ను చేరనంటోంది

అభిలాషే ఆద్యమై శాంతి సూత్రమయ్యింది

మంత్రబద్దమయ్యింది మానసము

పులకితమయ్యింది అంతరము.