కాఫీ కబుర్లు సంఖ్య 945 (జూలై 27 - 2025) -- మడి తడి ఆచారం వ్యవహారం ---- నాకు లీలగా గుర్తుంది.  మా ముసలమ్మమ్మ (మా అమ్మకి అమ్మమ్మ) తిరుపతికి ప్రయాణం అవుతోంది.  కుంపటి బొగ్గులు, విసనకర్రలు రెండు, రెండు మడి చీరలు, రెండు రకాల ఆవకాయ సీసాలు, నాలుగు చిన్న గిన్నెలు మూతలు, వంట సరంజామా పొట్లాలు..  ఇది ఆవిడ ట్రావెల్ లగేజ్.  ఓ వారం రోజుల తిరుపతి/తిరుమల  ప్రయాణానికి అవసరమైన లగేజ్.  తిరుమల కాటేజ్ లో ఉన్నప్పుడు వంటకి అవసరమైన సరంజామా.  అప్పట్లో ముఖ్యంగా బ్రాహ్మణ కుటుంబాలలో ముసలమ్మలు తిరుపతి వంటి పుణ్యక్షేత్రాలకు వెళ్లినప్పుడు వంట చేసుకుందికి తగిన ఏర్పాట్లు చేసుకుని బయలుదేరే వారు.  ఇప్పుడు మనకి చాలా విచిత్రంగా అనిపిస్తుంది.  ఉదయం పూట వంట, రాత్రి పూట ఫలహారం, 3,4 సార్లు కాఫీ..  ఇదే మెనూ.  మడి ఆచారాలను నిష్టగా పాటించేవారు.  మా ఇంటికి వచ్చినా మడిగా తన వంట తనే చేసుకుని తినేవారు.  తన వంట చేసుకునేటప్పుడు ఎవ్వరినీ చూడనిచ్చేవారు కారు.  దేవుని నామాలు స్మరించుకుంటూ ఉండేవారు.  రేణుకాదేవి మహత్యం వంటి సినిమాలు మాత్రమే.. అదికూడా రాత్రి ఆటకే (10 గం. సెకండ్ షో) వెళ్ళేవారు.  మరిచెంబుతో నీళ్ళు ఒక ఇత్తడి గ్లాసు, ఓ విసనకర్ర, ఓ చిన్న చాప.. ఇవన్నీ తీసికెళ్లేవారు.  ఇప్పుడు తలుచుకుంటే నవ్వొస్తుంది.  ఈతరం వారికి చాలా సిల్లీగా అనిపిస్తుంది.  అన్ని సదుపాయాలు సౌకర్యాలు ఉన్నా జమాటా, స్విగ్గీలలో వందలు వేలు ఖర్చుపెట్టి భోజనాలు ఫలహారాలు తెప్పించుకునే రోజులివి.  పొరపాటున ఆనాటి ముసలమ్మ బ్రతికొచ్చి ఈ వ్యవహారం చూస్తే వెంటనే గుండె ఆగిపోతుంది..  లేదా ఆచారాలు భ్రష్టు పట్టిపోయాయని ఆత్మహత్య చేసేసుకుంటుంది.  అరవై ఏళ్ళ కాలగమనం ఎన్ని మార్పుల్ని తీసుకొచ్చింది..  తలుచుకుంటే ఆశ్చర్యమే..  ఎంత వ్యత్యాసం..  మానవుడి మేధస్సు అందనంత రేంజ్ లో ఉంది ఇప్పుడు.   అంతా మన మంచికే.. అనుకోవడం తప్పిస్తే చేసేదేముంది..  ఈరోజు కాఫీ కబుర్లు కి ప్రేరణ.. మా ముసలమ్మమ్మే..  రాత్రి కలలో కనిపించింది.  ----- గాదె లక్ష్మీ నరసింహ స్వామి (నాని)  విజయనగరం ఫోన్ 99855 61852....