*అవతార్ మెహర్ బాబా - 30*

🪷

రచన: శ్రీ శార్వారి

మెహర్ బాబాకు అస్సలు తిండి ధ్యాస లేదు. ఎన్ని రోజులు ఉపవాసాలు చేసినా ఆకలయ్యేది కాదు. మనిషికి నీరసం కలిగేదీ కాదు. ఎవరి పైన కోపం వచ్చినా అలిగి అన్నం మానేస్తాడు. సన్నగా ఉన్నా సింహబలుడు. ఒకసారి 'టగ్ ఆఫ్ వార్' లో తన బలం ప్రదర్శించాడు. అవతలి వైపు నలభైమంది. ఇవతల తనొక్కడు. అంతమంది కలిసినా బాబాను ఓడించలేక కుదేలైనారు.

ఒకసారి పూనా నుండి బాపూ బ్రాహ్మణ్ ఆశ్రమానికి వచ్చాడు. బాబాతో మాట్లాడుతూ ఏదో 'బూతు' మాటన్నాడు. మెహర్ బాబాకు కోపం వచ్చి, అతని మెడపట్టి, గాల్లోకి ఎత్తి నేలకేసి కొట్టాడు. అతగాడు నేల కరిచాడు. అతను 200 పౌండ్ల మనిషి. మంచి స్థూలకాయుడు. మెహర్ బాబా ఆయనలో సగం ఉండడు.

https://chat.whatsapp.com/IWSgPdEjJqNHgK1WdzQkJe

ఒకసారి బాబా మంచి మూడ్ లో ఉన్న సమయంలో సారోష్ అడిగాడు.

"బాబా! మీరింత మంచివారు, గొప్పవారు కదా! ఒక్కొక్కసారి మీకెందుకంత ఒళ్లు తెలియని కోపం వస్తుంది?”

అందుకు బాబా అందర్నీ పిలిచి ఏక సమాధానం చెప్పారు-

“నాలో అసలు కోపం, క్రోధం ఉండవు. స్వార్థం, అహం, గర్వం, వాంఛ, ఆనందం, విషాదం వీటికి నాలో తావు లేదు. నాకు కోపం వచ్చిందంటే కారణం నా బలహీనత కాదు, నా అవసరం కాదు. కారణం వేరే ఉంటుంది. వేరే ఎవరి లోపమో నా ద్వారా బయటపడుతుంది. నేను ద్వేషించినా ఆ దోషం నాకంటదు. అందుకే ఎదుటి వ్యక్తి దుర్గుణాలు, లోపాలు నా ద్వారా బైట పడతాయి. ఆ క్షణంలో ఆ వ్యక్తిప్రతిబింబం నేను. నేను అద్దం లాంటివాడిని. మీ రూపాన్నే కాదు, మీ స్వభావాల్ని, మీ గుణాల్ని, మీనైజాల్ని, వాటి ప్రతిబింబాల్ని నాలో చూస్తారు. ఆ సమయంలో అద్దంలో కనిపించే బొమ్మ నాది కాదు - మీది. అది మీ ప్రతిబింబం.”

📖

“మండలి” అంటే సర్వమత సమారాధన. అక్కడ మత భేదం, మత విద్వేషం ఉండ కూడదు. పరమత సహనం ఉండడమే కాదు అన్ని మతాలను, మతాల వారిని సమంగా ప్రేమించగలగాలి. ఆపైన మతాన్ని నెమ్మదిగా పక్కకు తప్పించాలి. అంటే మతం మత్తు వదలాలి. మతానికి అతీతమైన మానవతా దృష్టి ఏర్పడాలి.”

క్రమంగా మెహర్ బాబాలో మార్పు రాసాగింది. ఎవరిపట్ల కఠినవైఖరి లేదు. కోపం స్థానంలో 'ప్రేమ' ప్రవేశించింది. అందర్నీ నవ్వుతూ ప్రేమగా పలకరించడం, ఆప్యాయత పంచడం మొదలైంది. అది 'మండలి' ఆశించిన మార్పు. మండలి స్వాగతించిన పరిణామం. పండగలకు, పబ్బాలకు ఎవరి మతాచారాలు వారు పాటించవచ్చు. ఎవరి పూజలు, ప్రార్థనలు వారు చేసుకోవచ్చు. హిందువులు దేవాలయాలకు వెళ్లిరావచ్చు. ముస్లిములు మసీదులకు వెళ్లి నమాజ్ చేసుకోవచ్చు. పార్శీలు, ఇరానీలు అగ్నిమందిరానికి వెళ్లి, అగ్నిపూజల్లో పాల్గొనవచ్చు. అంతవరకు మండలిలో క్రైస్తవులు లేరు. మండలిలో ఎవరైనా పండుగ మరచిపోతే బాబా జ్ఞాపకం చేసేవారు. ఏ మతంవారైనా మానసికంగా స్వేచ్చ అనుభవించాలి. ఆచారాలు, సంప్రదాయాలు మనిషిని మతానికి కట్టి పడేస్తాయి. స్వేచ్ఛగా బ్రతకనివ్వవు. కట్టడులు ఆధ్యాత్మికంగా అభివృద్ధికి అవరోధాలు.

కర్మలు, పునర్జన్మలు గురించి ఎంత అవగాహన ఏర్పడినా మండలి సభ్యులు పుట్టినరోజు జరుపుకోమనేవారు. దేనికి అదే! ప్రతి చిన్న పనిని కర్మ సిద్ధాంతంతో ముడిపెట్టి తప్పించుకోవడం 'ఎస్కేపిజం'. సరదాలు తీరాలంటే ఫంక్షన్స్ గెట్ టుగెదర్ ఉండాల్సిందే. అభినందించడంలో తప్పు లేదు. అనవసర ఆర్భాటాలు తగవు.

"ఆధ్యాత్మికత అంటే ఉపన్యాసాలు, ధర్మ బోధనలు కాదు. భజనలు, దర్శనాలు ఆధ్యాత్మికతకు కొలమానం కాదు. వాటి వల్ల ఆత్మశక్తి పెరగదు. నిరాడంబరంగా జీవించాలి.”

https://chat.whatsapp.com/IWSgPdEjJqNHgK1WdzQkJe

వీధుల్లో తిరిగే ముష్టివాళ్లను పిలిచి భోజనం పెట్టి బట్టలిచ్చేవాడు. ఒక్కోసారి మందిరం లోపల బయట తనే చిమ్మి శుభ్రం చేసేవాడు. తక్కువ పని, పెద్ద పని అని లేదు. ఏదైన అవసరాన్ని బట్టి పని.

మెహర్ బాబాకు మస్తులంటే మహా ప్రేమ. మంజిల్ కొచ్చిన ఒక మస్తుకు బాబా స్వయంగా స్నానం చేయించి భోజనం తినిపించారు. క్రమంగా బొంబాయి వీధుల్లో తిరిగే మస్తులందరికీ మంజిల్ మాహాత్మ్యం తెలిసి బాబా ఆతిథ్యం కోసం ఎగబడసాగారు.

అప్పుడప్పుడు సరదాగా పేకాటలో చేయి కలిపేవారు మెహర్. మున్షీజీ ఇంటజోరుగా పేకాట సాగుతుండగా తను రాంజీ ముక్క ల్లోంచి ఒక ముక్కలాక్కుని 'షో' అన్నారు. తెలిసీ మిగిలినవారు ఊరుకున్నారు. తర్వాత రౌండ్ లో ఘనీ అదేపని చేశాడు. ఘనీ ముక్క తస్కరించడం రాంజీ చూసి గొడవ పెట్టుకున్నాడు. ఆటలో మోసం చేసినందుకు బాబా ఘనీని మందలించారు సరే! తను చేసిన పని? ఆట ఆపి బాబా ఒక కథ చెప్పాడు ... కథ టెన్షన్ తగ్గడానికి.

“ఒకసారి ఒక గురువుగారు ఊళ్లోకి వెళుతుంటే కొందరు శిష్యులు ఆయన వెంటపడ్డారు. 'రావద్దు' అన్నా వినలేదు. మూర్ఖ శిష్యు లుంటారు గదా! చెబితే వినరు. తిడితే ఏడుస్తారు. ఆ బాపతు. వద్దన్నా ఒకరి తర్వాత ఒకరు శిష్యులు గురువును అనుసరించారు. గురువుగారు ఒక బేకరీకి వెళ్లి బిస్కట్లు తీసుకుతిన్నాడు. బేకరీవాడు సంతోషించాడు. గురువుగారు గదా! గురువుగారు వెళ్లిపోయాక శిష్యులు బేకరీలో ప్రవేశించి బిస్కట్లు తిన్నారు. బేకరీవాడు ఏడవలేక నవ్వాడు.

శిష్యులకు గుణపాఠం చెప్పదలచిన గురువుగారు ఒక కమ్మరం కార్ఖానాలోకి వెళ్లాడు. నిప్పుల్లో ఇనుపకడ్డీలు, ముక్కలు కాలుతున్నాయి. గురువుగారు ఎర్రగా కాలిన ఒక ఇనుప కడ్డీ తీసుకుని చెరుకు గడ లాగ నమిలి తిన్నాడు. శిష్యులు  మొహమొహాలు చూసుకున్నారు. ఎవరూ అలాంటి సాహసం చేయలేరు. గురువు వాళ్లని చూసి నవ్వి “కానివ్వండి మంచి ఆకలిమీద ఉన్నారుగా" అన్నాడు.

ఏం తింటారు? అందరూ ఏడుపు మొహాలు పెట్టారు.

"గురువు చేసిన ప్రతి పని, ప్రతి శిష్యుడు చేయనవసరం లేదు. చెప్పిన పని చెప్పినట్లు చేస్తే చాలు” అన్నారు.

ఆ కథ వినగానే ఘనీ ఫక్కున నవ్వాడు.

మెహర్ బాబా అడిగారు "ఎందుకు నవ్వుతున్నావ్?”

ఘనీ. "నా సందేహానికి సమాధానం దొరికింది. అందుకు నవ్వాను” అన్నాడు.

📖

మెర్వన్ సేత్ గా ఉన్న రోజుల్లో మెహర్ బాబా 'హ్యుమా' పేరుతో చాలా గజల్స్ రాసేవారు. అవి ‘నవ్సారి' పత్రికలో అచ్చు పడుతుండేవి. అలాంటి గజల్ ఒకటి సోమాదేశాయ్ కి బాగా నచ్చింది. సోమా గుజరాత్ లో గొప్ప కవి. హ్యుమా గజల్స్ అతని నోటికి వచ్చు. ఆయన హ్యుమా అభిమాని అయినాడు. రోజూ సోమా దేశాయ్ 'హ్యుమా' గజల్స్ ఇష్టంగా పాడుకుంటాడు. అంత వెర్రి ఇష్టం ఏర్పడ్డది.

"మంజిల్-ఇ-మీమ్" లో గురుచరిత్రగా ఉపాసినీ మహరాజ్ జీవిత చరిత్ర ఉర్దూ, గుజరాతీ, మరాఠా భాషలలో తయారైంది. గుజరాతీ వెర్షన్ బెయిలీ రాశాడు. మరాఠీ రచయిత నాథ్ మాధవ్. బెయిలీ రాయడం పూర్తి కాగానే  'నవసారి'లో సోమాదేశాయ్ కి పంపాడు. రుస్తుం కిచ్చి చదివి దిద్దిపెట్ట మని, బెయిలీ, రుస్తుం ఇద్దరూ వెళ్లి షోరాబ్జీ ని కలిసి ఇలా మెహర్ బాబా పంపారని చెప్పారు. షోరాబ్జీకి కోపం వచ్చింది.

"ఎవడయ్యా మెహర్ బాబా నన్ను ఆర్డర్ చెయ్యడానికి? అతనెవరు? నేనేమైనా అతగాడి సర్వెంటునా, అతను చెప్పినట్లు చేయడానికి.” అన్నాడు.

https://chat.whatsapp.com/IWSgPdEjJqNHgK1WdzQkJe

ఇద్దరూ బొంబాయి వెళ్లి జరిగింది చెప్పారు మెహర్ బాబాతో.

తిరిగి కొన్ని రోజుల తర్వాత బాబా రుస్తుం కి 'స్క్రిప్టు’ ఇచ్చి సంతకం చేసి మరీ పంపాడు.

"షోరాబ్జీ! ఈ పని మీ వల్లే అవుతుంది. దయచేసి కాదనకండి.” ఆయన ఉత్తరం చదివి “ఏమనుకుంటున్నాడు నన్ను? ఎంత పొగరు" అని మరల వెనక్కి పంపేశాడు.

మూడవసారి మరొక లేఖ వ్రాసి బెయిలీ, రుస్తుంలను పంపాడు.

"ఇది ఉపాసినీ మహరాజ్ జీవితచరిత్ర వ్రాతప్రతి. సగౌరవంగా ‘హ్యుమా’ మీకు సమర్పిస్తున్నాడు" అని రాసి 'హ్యుమ' అని సంతకం చేశాడు.

"స్క్రిప్టుతో పాటు ఉత్తరం అక్కడ పెట్టి వచ్చేయండి. ఆయన సమాధానం కోసం చూడకండి" అని పంపారు.

వారిద్దరిని చూడగానే షోరాబ్జీ మండి పడ్డాడు. వాళ్లు తమాయించుకుని, "హ్యుమా సార్ మీ కిమ్మన్నారు” అన్నారు.

హ్యుమా పేరు చెవిని పడగానే అంతకోపం పాదాల్లోకి దిగింది. స్వయంగా జవాబు రాశాడు.

“నేను మీ గజల్స్ అభిమానిని. మీరు మీరని తెలియక చాలా పొరపాటు జరిగిపోయింది. క్షమించండి.”

షోరాబ్జీ చదవడం మొదలుపెట్టినప్పటి నుండి అతనికి అనేక ఆధ్యాత్మిక అనుభూతులు, అనుభవాలు, అనుమానాలు, సందేహాలు అనేకం కలగసాగాయి. ఆ ఉత్తరం పోస్టు చేసిన కాస్సేప్పటికే జవాబు పోస్టులో వచ్చేది. తన ఉత్తరం మెహర్ కి అందకుండానే అవే విషయాలపై ఆయన సమాధానం రాసి పంపేవారు.

ఇలాంటి అనుభవాలు గురు అనుభవాల్లో అనేకం జరుగుతుంటాయి.

🪷

*సశేషం*

꧁☆•┉┅━•••❀❀•••━┅┉•☆꧂

*కథల ప్రపంచం* 

https://chat.whatsapp.com/IWSgPdEjJqNHgK1WdzQkJe

*తెలుగు భాషా రక్షతి రక్షితః* 

*ఏడాది చందా 120/-, ఫోన్ పే & గూగుల్ పే నెంబర్ 9849656434*

*1 YEAR* *SUBSCRIPTION 120/-*

*phone pe & Gpay to 9849656434*

꧁☆•┉┅━•••❀❀•••━┅┉•☆꧂