*అవతార్ మెహర్ బాబా - 32*

🪷

రచన: శ్రీ శార్వారి

మెహర్ బాబా సదాశివంని పిలిచి ఉపాసినీ మహరాజ్, సాయిబాబా ఫొటోలు సాకోరి లో అందచేసి ఉపాసినీ జీవిత చరిత్ర సిద్దమైందని, అచ్చు వేయడానికి డబ్బు ఏర్పాటు చేయమని కబురుచేశారు.

ఉపాసినీ మహరాజ్ కి కోపం వచ్చింది. "బోడి జీవితచరిత్ర ఎవడు రాయమన్నా డు? నేను అడిగానా? అచ్చు వేసేవాడెవడో లాభంలో ముందుగా సగం ఇక్కడికి పంపండి. లేకపోతే మానుకోండి" అని కబురుపెట్టారు.

దాని అర్థం ఉపాసినీకి డబ్బు ఆశ అని కాదు! "ఆ జీవిత చరిత్రలో సగమే నాది, మిగత సగం తనది. ఇద్దరిదీ చెరి సగం" అని. ఉపాసినీ తన తపశ్శక్తి సగం మెహర్ బాబా పరం చేసినట్లు చెప్పక చెప్పినట్లయింది.

📖

మండలి సభ్యులంతా ఇళ్లకి వెళ్లిపోయారు. రాంజీకి తన మిత్రుడు ఉస్మాన్ సాహిబ్ లోనవాలా స్టేషన్ లో కలిశాడు. అతను గులిస్తాన్ 'దోహా' ఒకటి మెహర్ బాబా పరంగా అన్వయించి చెప్పాడు.

"గురువు పాదాలతో స్వర్గంలోకి నడవడం కంటే మించిన నరకం మరొకటి ఉండదు.”

మంజిల్ కి తిరిగివచ్చిన తర్వాత ఉస్మాన్ తనని కలిసిన విషయం చెప్పాడు. అతను వినిపించిన ‘దోహా' పై చర్చ జరిగింది. మెహర్ దానిపైన వివరణ ఇచ్చారు.

"ఉస్మాన్ చెప్పిన మాట సత్యం. స్వర్గాన్ని మనం స్వయంసాధనతో స్వయంకృషితో సంపాదించుకోవాలి. స్వర్గం ఒకరు ఇచ్చేది కాదు. ఒకరు రికమెండ్ చేస్తే స్వర్గం లభించదు. అందుకు చాలా అర్హతకావాలి. నిజానికి సంపాదించుకోవలసింది అర్హత ... స్వర్గం కాదు. స్వర్గం దారిలో ఒక మాయ ఉంటుంది. స్వర్గం చేరినా మనిషికి మాయా మోహాలు నశించవు.

"అర్హత లేకుండా, యోగ్యత సంపాదించ కుండా, ఎవరి దయతోనో, సహాయంతోనో స్వర్గం చేరినా అది నరకమే. నరకం కన్న హీనం". ఏదైనా స్వయంగా సంపాదించు కోవాలి. సాధించుకోవాలి. అద్భుతమైన అనుభవాలు కలిగితే అది స్వర్గం. హీనమైన, నీచమైన అనుభవాలు కలిగితే అది నరకం. ఆ రెండింటిని బైపాస్ చేసేది ఆధ్యాత్మిక మార్గం. ఆధ్యాత్మిక మార్గం అంటే ఎవరికి వారు స్వతంత్రంగా,సూటిగా సచ్చిదానందాన్ని అనుభవించడం ఫలితం పొందడం. ఎవరికి వారుగానే పరమాత్మను అనుభూతించాలి. అది ముఖ్యం. అయితే గురువు సహాయం, ఆదరణ లేకుండా ఎవరూ ఆత్మజ్ఞానం పొందలేరన్నదీనిజమే. అర్హత, యోగ్యత ఉన్నవారికి గురువు సహకారం తప్పక లభిస్తుందన్నదీ సత్యమే.

మౌలానా రుమీ అంటాడు :

"మార్గదర్శి లేకుండా ప్రేమపథంలో పయనించలేవు. అలా పయనించి, ప్రయత్నించి నేను వందలసార్లు విఫలమైనాను”.

📖

మరొకనాడు మెహర్ బాబా ఘనీని పిలిచి కాళ్లొత్తమని అడిగాడు. అతను కాళ్లు వొత్తుతుండగా “ఆహా! భగవంతుడు ఎంత మంచివాడు. నా కాళ్లొత్తడానికి ఒకడ్ని కుదిర్చాడు" అన్నాడు.

ఘనీ పకపకనవ్వి “మీరే భగవంతుడు గదా! వేరే భగవంతుడు నన్ను ఈ పనికి పంపాడంటారా? మీ మాటలు విచిత్రంగా ఉంటాయి. అర్ధం అయినట్లే ఉంటాయి కాని అర్థంకావు. మహాశయా! నిన్నటి దాకా బాగానే ఉన్నారు. ఇవాళ ఒళ్ళు నొప్పులు, కాళ్ళ నొప్పులు అంటున్నారు. అవతార పురుషుడికీ రోగం వస్తుందా సారూ?" అన్నాడు.

https://chat.whatsapp.com/IWSgPdEjJqNHgK1WdzQkJe

ఈసారి ఘనీ జోక్ కి మెహర్ బాబా ఫకాలున నవ్వి అన్నాడు "అదేనయ్యా! నాకూ అర్థం కాని రహస్యం. భగవత్సాక్షా త్కారం పొందిన తర్వాత కూడ మనిషి మనిషిగానే ఉంటున్నాడు. ఎందుచేత? నాలుగు తలలు, పది చేతులు మొలవడం  లేదు. అతను జ్ఞాని అని చెప్పదగ్గది అదనంగా ఒక్కటీ కనిపించదు కదా! అంటే ఏమిటి? జ్ఞానికి అజ్ఞానికి పెద్ద తేడా లేదు. ఆకలి, నిద్ర, బాధ అన్నీ ఇద్దరికీ సమానమే కాస్త హెచ్చు తగ్గులుంటాయనుకో."

“ఘనీ! ఈ జ్ఞానం అన్నది తెలుసుకోవల సిందే తప్ప కంటికి కనిపించదు. జ్ఞానం రెండు విధాలు : ఒకటి ప్రపంచ జ్ఞానం. భౌతిక ప్రపంచానికి, లౌకిక జీవనానికి సంబంధించిన వివేకం జ్ఞానం. అందరికీ కావలసింది ఆ జ్ఞానమే. రెండవది దివ్య జ్ఞానం. అది ఆత్మగతం! ఎవరికి కావాలి? దివ్యస్పర్శ పొందిన వారి చర్యలు చాలా విచిత్రంగా ఉంటాయి. గుడ్డివాడికి జ్యోతి విలువ తెలియదు. పేదవాడికి రత్నం విలువ తెలియదు. అట్లాగే అజ్ఞానికి జ్ఞానం విలువ తెలియదు." 

దాచి ఉంచినంత కాలం రత్నం విలువ లేనిదే అవుతుంది. దాచుకున్నంత కాలం మన దివ్యజ్ఞానమూ నిరుపయోగమే. ."

📖

ఒక రోజున పెద్ద ఆధ్యాత్మిక చర్చ జరిగింది. చర్చాంశం :

"ఆధ్యాత్మికంగా అనుభవాలు పొంది మహత్తులు, అతీంద్రియ శక్తులు ప్రదర్శించే మహాత్మునికి, మామూలు వ్యక్తికి ఉండే తేడా ఏమిటి?"

చివరన మెహర్ బాబా చెప్పారు :

"ఎంత జ్ఞానం పొందినా, అతీంద్రియ శక్తులు ఎన్ని సంపాదించినా మనిషి స్వభావం మారదు. చూడడానికి ఎంతటి మహాయోగి అయినా, మహర్షి అయినా సామాన్యంగానే కనిపిస్తాడు. తేడా ఎక్కడంటే మామూలు మనిషికి కోపం, తాపం, ఆగ్రహం, ఆనందం ఎక్కువగా ఉంటాయి. వాటిని కంట్రోల్ చేసుకోలేడు. ఆధ్యాత్మిక శక్తి ఉన్న వారిలో అవి ఎక్కువ కనిపించవు. ఆత్మజ్ఞానికి 'అహంకారం' ఉండదు. కనుక అహంకారాన్ని బైటపెట్టే గుణాలు ఏవీ అతనిలో కనిపించవు. జ్ఞానం పొందిన కొద్దీ మనిషిలో 'సౌమ్యత' అలవడుతుంది. సుమనస్కుడవుతాడు. జ్ఞాని అయిన వాని మాటలు, చూపులు, చేతలు భిన్నంగా ఉంటాయి. భిన్నం అంటే అందరికీ ఉపయోగకరంగా ఉంటాయి. అది అప్రయత్నంగా జ్ఞానికి లభించే వరం. అది జ్ఞాన సిద్ధికి ఫలం."

“ఒక వ్యక్తి చిన్నతనం నుండి దురుసుగా ఉండే తత్వం గలవాడైతే కొట్టడం, తిట్టడం అలవాటైతే, మహాయోగి అయినా, మహాజ్ఞాని అయినా ఆ స్వభావం పూర్తిగా పోదు. అయితే ఆ తిట్లకు వేరే కారణాలు చెబుతారు. స్వార్థం ఉండదు కనుక వారి కోపం ప్రమాదకరం కాదు. అది జస్ట్ ఒక అలవాటు అంతే ”

"మనిషి ఆవృత్తులు, ప్రవృత్తులు, వ్యావృత్తులు మారాలి. కోపతాపాలు, ఆలోచనలు, ఆవేదనలు వర్ణించాలి.

అప్పటికిగాని సత్యం దరిదాపులకు చేరడం సాధ్యపడదు. లోగడ భగవంతుని కోసం ఆరాటపడి, అన్వేషించిన వారందరూ అవస్థలు పడ్డారు. కోరి అనేక కష్టాలు తెచ్చుకున్నారు. ఆధ్యాత్మిక రంగంలో సుఖం అన్నది ఎండమావి, ఆనందం అన్నది మృగతృష్ణ."

"ఆ రోజులు వేరు, నేటి పరిస్థితులు వేరు. సంప్రదాయం అంటూ కష్టాల కొలిమిలో కాళ్లు దూర్చేవారిని వదిలితే నేడు ఆధ్యాత్మికత అంత గడసరి కాదు, భౌతిక జీవితం కాదనకుండా ఆధ్యాత్మికంగా ఉన్నత శిఖరాలు చేరవచ్చు. కావలసింది గురుకటాక్ష వీక్షణం. అలవాట్లు దురలవా ట్లుగా, ఆచరణలు వ్యసనాలుగా మారకుండా జాగ్రత్తపడితే చాలు. మంచి గురువంటూ లభిస్తే మీ బరువుబాధ్యతలు తను మోస్తూ మిమ్మల్ని సత్యమార్గాన సుఖంగా నడిపిస్తాడు."

https://chat.whatsapp.com/IWSgPdEjJqNHgK1WdzQkJe

"ఈ సువిశాల సుందర విశ్వం, అద్భుతమైన జీవితం అన్నీ మనకోసమే సృష్టించబడ్డాయని, వాటిని మనం అనుభవించి తీరాలనుకోవడం వెర్రితనం, భ్రమ. ఎన్ని పరిశోధనలు జరిపినా అవి ఉపరిశోధనలే. ఎంతగా శాస్త్రం అభివృద్ధి చెందినా అది పంచభూతాలకే పరిమితం. ఎంత ఘోరతపస్సు చేసినా అసలు సృష్టి రహస్యం మహర్షులకూ తెలియదు. నాయకమ్మన్యులు, శాస్త్రజ్ఞులు, డాక్టర్లు, జ్యోతిష్కులు అందరూ ప్రకృతి ముందు తలవంచవలసినవారే. ఓడిపోవలసిన వారే. అందరి గమ్యం మృత్యువు వైపే.. మృత్యువు ముందు ఓడిపోనివాడెవడు? అజ్ఞాని, జ్ఞాని, వివేకి, అవివేకి ఎవరు ఎంతటి ప్రజ్ఞాప్రాభవాలు సంపాదించినా మృత్యువు ముందు ఓటమి తప్పదు. మహర్షులు, మహా యోగులు సైతం కొంతమేరకే విజయాన్ని సాధిస్తున్నారు, సత్యాన్ని గ్రహిస్తున్నారు. అసలు సత్యం భృక్తంగానే ఉంటోంది. మన బంధాలు, అనుబంధాలు తాత్కాలికాలు. అంతా నటన.

"స్వామి వివేకానంద అంటారు :

"తల్లి, తండ్రి, భార్య, పిల్లలు, బంధువులు, మిత్రులు అంతా భ్రాంతి. కలల్లో బ్రతికే వాడికి సత్యం తెలియదు. కలలు కనే వాడికి వాస్తవికత రుచించదు. ఆ మత్తు, నిద్రమత్తు వదిలితేగాని ఎవరికీ వాస్తవం అవగతం కాదు.”

"భగవంతుడు అందరివాడు. మనం కలవరించే ప్రేమ ఎక్కడ ఉంది? ఉపాసినీ తరచుగా ఎన్నోసార్లు నన్ను సాకోరి రమ్మని పిలుస్తుంటారు, ఎందుకు? ఆధ్యాత్మికంగా మంచి అనుభవం పొందడానికి సమఉజ్జీ ఒకరు అవసరం.”

"దివ్యశక్తి దిగి వచ్చినప్పుడు ఒక్కరు భరించడం కష్టం. తోడుగా మరొకరు ఉండాలి."

ఆ తర్వాత సంభాషణ ప్రపంచ మతాలపైన సాగింది.

"జొరాస్టర్ మహా తేజస్వి. ఆ తేజస్సు ఆయన అనుయాయులే తర్వాత లేకుండా చేశారు. జొరాస్టర్ సూఫీ ఆత్మతత్వం. అది అగ్నితత్వం. అది తేజస్వంతం. ఇప్పుడు జొరాస్టర్ మళ్లీ అవతరిస్తే తన సిద్ధాంతాల్ని తానేగుర్తించలేడు. అంతగా ఆసిద్ధాంతాలు నిర్వీర్యమైనాయి. బహుశః అన్ని మతాల స్థితి అంతే. ఏ మతమూ ఈనాడు మూల సూత్రాలను తు.చ. తప్పకుండా అనుసరించడం లేదు.”

🪷

*సశేషం*

꧁☆•┉┅━•••❀❀•••━┅┉•☆꧂

*కథల ప్రపంచం* 

https://chat.whatsapp.com/IWSgPdEjJqNHgK1WdzQkJe

*తెలుగు భాషా రక్షతి రక్షితః* 

*ఏడాది చందా 120/-, ఫోన్ పే & గూగుల్ పే నెంబర్ 9849656434*

*1 YEAR* *SUBSCRIPTION 120/-*

*phone pe & Gpay to 9849656434*

꧁☆•┉┅━•••❀❀•••━┅┉•☆꧂