గెట్ టు గెదర్
విచ్చేశారు అందరూ
బానపొట్టలూ అరగుండ్లతో
పురుష పుంగవులు.!
బారెడు జడలు
మూరెడు కాగా
సోడాబుడ్డీ కళ్ళద్దాలతో
మహిళా మణులు .!!
వాడు వీడేనా
వీడు వాడేనా.?
ఆమె ఈమేనా
ఈమె ఆమేనా ?
గుర్తింపుల గుబాళింపు.!!
పలకరింపులూ
షేక్ హాండ్ లూ
కౌగిలింతలూ
పరామర్శ లూ
తాతలుగామారిన
అలనాటి అబ్బాయి లు
అమ్మమ్మ లూ నానమ్మ లుగా
మారిన అమ్మాయి లు
మరోవైపు
కాళ్ళనొప్పులు కీళ్ళనొప్పులు
కవర్ చేస్తూ
చెంగు చెంగున అలనాటి
గెంతులస్ధానంలో
జాగ్రత్త గా అడుగు లేస్తూ
చేరారంతా ఒకచోటికి
అలనాటి అల్లరులూ
కొట్లాటలు
ఆటలు పాటలు
సరదా సన్నివేశాలు
క్లాస్ రూమ్ లన్నీ
కలయ తిరుగుతూ
నాటి జ్ఞాపకాలు కలబోసుకుంటూ
తమకలల రాణి కోసం
గుంపులో వెతుకులాడుతూ
దొంగ చూపులు చూస్తూ
గుర్తించలేని మార్పు
కోల్పోయిన వ్యధ
ఎన్నెన్నో జ్ఞాపకాలలో
మరెన్నో మార్పుల వాస్తవాలు.!
బ్రతుకు పండించుకున్న
వారు కొందరై తే
పోగొట్టుకున్న వారు కొందరు.!
అందరి మోములోనూ
చెరగని చిరునవ్వు
నాటిమేటి విద్యార్ధి
ఏదో సాధిస్తాడను కున్నవాడు
బడుగు జీవిలా
సంసార సాగరాన్ని
ఈదుతూ అలసి పోగా
ఎందుకూ పనికిరాడను కున్నవాడు
గొప్పవాడై కనుల ముందు .!!
అరేయ్ ఒరేయ్
మావ బావ నాటి పిలుపుల
ఆప్యాయతల స్థానాల్లో
సార్, గారు మర్యాదల మార్పులు.!!
కాలగర్భంలో జారిపోయి
కరిగిపోయి న కొందరు
నేస్తాల కన్నీటి జ్ఞాపకాలు.!
ఏదైతేనేం
సుఖదుఃఖాల కలబోత
జ్ఞాపకాల దొంతరల వెదుకులాట.!
చేరుకున్నావా?జాగ్రత్త.
చరవాణి హెచ్చరిక ల మోత.!
తెలియకుండానే కరిగి పోయిన కాలం.!!
బాధాతప్త హృదయాలతో
అడ్డుపడే కన్నీటి పొరల
మసకచూపుల తడిలో
వీడ్కోలు తీసుకునే సమయం.!!
మరలా కలిసే మరో రోజుకు
అందరూ కలవాలనే ఆశతో.!
కాలగమనంలో ఎందరో .!!
చదువులు ముగించి
వెళ్ళేవారికి వీడ్కోలు
వచ్చేవారికి స్వాగతాలు పలుకు తూ!!
ఏమార్పులేని కాలేజీ
చిద్విలాసంగా నవ్వుకుంటూ
వెళ్ళి రండని ఆప్యాయంగా
ఆశీర్వదిస్తూ, మరోకలయిక కోసం
ఎదురుచూస్తూ..!!
No comments:
Post a Comment