చమత్కారం అంటే ఏమిటి?

ఓ విషయం చెబితే " ఇదేమిటి, అదెలా, అలా ఎలా " అని ఉత్సుకత కలిగించాలి. దీనిలో ఏదైనా మతలబు ఉందా అనిపించాలి. అసలు విషయం ఏమిటో తెలుసుకోవాలనే ఆతృత కలిగించాలి. విషయం అలా చెప్పడం చమత్కారం అంటారు.

 ఓ గ్రామం లో  సర్వమంగళశాస్త్రి గారని ఓ వేదపండితుడు ఉండేవారు.  వారి మనుమడికి ఉపనయనం చేస్తూ ఆహ్వానపత్రికలో 

" మా మనుమడి ఉపనయనానికి మీరందరూ విచ్చేసి వటువుని ఆశీర్వదించి భోజనం చేసి వెళ్ళవలెను.

 భోజనాల తరువాత నా ఉపనయన కార్యక్రమాన్ని కూడా వీక్షించి వెళ్ళవలసినదిగా కోరుకుంటున్నాను " 

అని వ్రాసారు;  అందరికీ ఆశ్చర్యం వేసింది --

 మనుమడికి

వడుగు వరకు సరే, 

ఈయనకు మళ్ళీ  

వడుగు ఏమిటీ అని.

సరే ఈ విషయం తెలుసుకోవాలనే ఆసక్తితో మొత్తం బంధువులందరూ వచ్చేసారు. భోజనాలయాయి. శాస్త్రిగారు కుర్చీలో కూర్చున్నారు, బంధువులు, అతిధులు ఎదర చాపలమీద ఆశీనులయారు.

శాస్త్రిగారి భార్య ఓ చిన్న అందమైన పెట్టె తెచ్చి శాస్త్రిగారికి ఇచ్చారు. ఆయన ఆ పెట్టె మెల్లిగా తెరచి అందులోనుంచి ఓ కళ్ళజోడు తీసారు.

అందరికీ చూపెట్టి " నాకు చత్వారం వచ్చింది. ఈ మధ్యనే, డాక్టర్ గారు ఈ కళ్ళజోడు పెట్టుకోమన్నారు. ఈరోజు ముహూర్తం బాగుందని పెట్టుకుంటున్నాను. మీరందరూ నా ఈ ఉప_నయనం ( నయనం అంటే కన్ను, ఉప అంటే దగ్గరగా ఉండేది ) కార్యక్రమం కూడా చూసి వెడుతూన్నందుకు ధన్యవాదాలు " అని అది పెట్టుకున్నారు.

లేచామా, తిన్నామా,  టీవీ ఫోన్ చూసినామా,  పడుకున్నామా అనికాకుండా ప్రతీ పనిలోనూ హాస్యాన్ని ఆస్వాదించాలి.