(530) (01.02.2026)

ఓ కోడలా! నీవు అడుగు పెడుతూనే అత్తమ్మా అని పిలిచినావు

అత్తమ్మ లోనే అమ్మని కూడా చూచుకున్నావు   

ఈ జన్మకి నీవు పిలిచిన పిలుపు చాలమ్మా

ఆ పిలుపు వినగానే నా జన్మ ధన్యమైనదమ్మా //

ఏ వార్త చదివినా అత్త-కోడలి మధ్య సఖ్యత లేదనే

పెళ్ళి అవగానే వేరు కాపురం పెడదామనే

ఆలుమగలు మాత్రమే ఉండాలని

ఎవరితోనూ కలిసి-మెలిసి ఉండకూడదని //

కానీ నీవు పిలిచే పిలుపులో తెలిసింది నీకు అటువంటి ఆలోచన లేదని

ఇది నీకు నిను కన్న వాళ్ళు నేర్పిన సంస్కారమని

ముందుగా నిను కన్న వాళ్ళకి చేతులెత్తి నమస్కరించాలి

కోడలిగా మా ఇంట అడుగు పెట్టిన నిను అభినందించాలి //

ఈ ఉమ్మడి కుటుంబంలో మన మంతా కలిసే ఉంటాము

అత్త – కోడలు అన్న బేధాన్ని చూపించకుంటాము

అందుకే పెళ్లై ఇన్నేళ్ళైనా పెద్ద కోడలు మాతో కలిసే ఉంది

ఆపై నీవు రాగానే చెల్లెలిగా భావించి నీకు స్వాగతం పలికింది //

రేపటి రోజు మేము ఉన్నా లేకున్నా మీరు కలిసే ఉండాలి

మీ అందరి మధ్య బంధం ఇలానే కొనసాగుతుండాలి

రేపటి రోజున ఇలాటి పరిస్ధితే మీకూ ఎదురు కావచ్చు

సమాధానం చెప్పడానికి తడబడవచ్చు //

నేటి అనుభవం రేపటి రోజున పనికి వస్తుంది

మీ జీవితాలను ఎంతో ఆనందంగా ముందుకు నడిపిస్తుంది

ఈ విషయాలను తోడికోడళ్ళు ఇద్దరూ మనసులో పెట్టుకోండి

మీకు వచ్చే కోడళ్ళకు తెలియపరచండి //

మధిర వెంకట రమణ, హైదరాబాద్