నీ బలం కేవలం నీలోనే లేదు, నీతో నడుస్తున్న వారిలో కూడా ఉంది.

నీ బలం
''''''''''''

ఒక బాలుడు, అతని తండ్రీ కలిసి చిట్టడివిలో నడుచుకుంటూ వెళ్తున్నారు.

ఒక చోట దారికి అడ్డంగా ఒక మొద్దు పడివుంది. ఆ బాలుడు తండ్రి వైపు తిరిగి, "నాన్నా, ఈ మొద్దును ఎత్తగలనా?" అని అడిగాడు.

"నీకున్న బలాన్నంతా ఉపయోగిస్తే, తప్పకుండా ఎత్తగలవు." అని తండ్రి బదులిచ్చాడు.

ఆ కుర్రవాడు చొక్కా చేతులు మడిచి, క్రిందికి వంగి, ఆ మొద్దు క్రిందికి చేతులు పోనిచ్చాడు.

చేతులు బిగించి తనకున్న సత్తువనంతా ఉపయోగిస్తూ మొద్దుని లేపడానికి ప్రయత్నించాడు. కానీ ఆ మొద్దు ఇసుమంత కూడా కదల్లేదు.

మళ్ళీ మళ్ళీ ప్రయత్నించి అలిసిపోయి ఆ ప్రయత్నాన్ని విరమించుకున్నాడు.

తండ్రి వైపు నిరుత్సాహంగా, నిరాశగా చూసి "నేను దీన్ని ఎత్తగలనన్నావ్!" అన్నాడు.

అప్పుడు వాళ్ళ నాన్న నవ్వుతూ సౌమ్యంగా "నీకున్న మొత్తం బలాన్ని ఉపయోగిస్తే ఎత్తగలవు అన్నాను.

నన్ను సాయం పట్టమని నువ్వు అడగలేదు." అన్నాడు.

అప్పుడు ఆ కుర్రాడు తండ్రిని సాయం చెయ్యమని అడిగాడు, ఇద్దరూ కలిసి మొద్దుని దారి లోంచి పక్కకి పడేసారు.

నీతి: నీ బలం కేవలం నీలోనే లేదు,
నీతో నడుస్తున్న వారిలో కూడా ఉంది.
నీ ముందున్న పనికి నువ్వు సమవుజ్జీవి కాదనుకుంటున్నావంటే,...

నీకున్న బలాలన్నింటినీ నువ్వు ఉపయోగించుకోవట్లేదన్నమాట.